Esekiel 32 - ICIGHAN BIBILO

¹ Sha inyom i sha pue kar uhar, uwer di u sha pue kar uhar, sha iyange i u i hiihii la, kwaghôron u TER va her a mo er:

² Wan u or, dugh kwelegh, ter Farao tor u Igipiti, kaa a na wer: Gumbegha u ken akuraior, u saa ve! U lu er darakon ken uzegembamngerev nahan; u duen ken uifi ou, u buusu mngerem sha angahar a ou, u hundu uifi vev.

³ Ter AÔNDO ngu kaan nahan er: Me samber kper Wam sha a we; Me tindi ikpelaior i i kohol ken akuraior kpishi, vea kpela u sha kper Wam.

⁴ Me gbihi u sha tar, Me kende u ken ikôngo, Me na inyon i sha cii ia tema sha a we, Me na inyam i toho sha won cii ia ide sha awe.

⁵ Me haa inyam you sha iwo, Me iv apev sha mkehem ou.

⁶ Me ur tar sha awambe a ou a a dugh ken a we la, zan zan á ar sha iwo; iwagh ia iv sha a we.

⁷ Zum u Me pir u la, Me cir Sha, Me na asan a na a̱ wa ime; Me cir iyange sha ibeen, uwer kpaa ua kera na iwanger i u ga.

⁸ Iwanger i i mondo Sha cii, Me gema i, ia hingir ime sha a we, Me na ime ia wa sha tar wou, kape Ter AÔNDO A kaa ne.

⁹ Me na ishima ia nyian akuraior kpishi, zum u Me pase mtim wou ken akuraior, zan zan á za ar sha ityar i u lu a vande fan i ga la kpaa.

¹⁰ Een, Me na akuraior kpishi, á kpiligh a iyol sha ci wou, utor mba a kpaa vea cia u tsung, zum u Me kunde sanker Wam sha ishiv vev la; vea zer gbidyen ikarikase iyol gbem, hanma or sha ci u uma u nan, sha iyange i u gba la.

¹¹ Gadia Ter AÔNDO ngu kaan nahan er: Sanker u tor u Babilon una va sha a we.

¹² Me na, á wua ikpelaior you sha usanker mba mbaageev; ikurior i hemban vihin kwagh a akuraior agen cii, vea vihi ihagh i Igipiti kera, ikpelaior na cii kpaa ia tim.

¹³ Shi Me tim uzendenya nav cii kera, mba hen kpe u mngerem ma kpishim la; ma nguhar u or kua gbuusu ma ga, ma apande a uzendenya kpaa aa hundu ma ga.

¹⁴ Nahan Me na mngerem vem maa wanger, Me na uifi vev vea kuwa er mkurem nahan, kape Ter AÔNDO A kaa ne.

¹⁵ Zum u Me gema tar u Igipiti ua hingir ice man gbilinkwagh, tar u i kar a akaa a a mgbough kimi la kera; zum u Me tsaha mba ve tem ken u cii yô, shighe la man vea fa er Mo M lu TER ye.

¹⁶ Ngun ka kwelegh u vea gber je ne; ônkasev mba akuraior vea gber un; ka sha Igipiti man ikpelaior na cii vea gber un ye, kape Ter AÔNDO A kaa ne.

¹⁷ Tsô sha inyom i sha pue kar uhar la, sha ayange pue kar ataan a uwer shon la, kwaghôron u TER va her a mo er:

¹⁸ Wan u or, vaa sha ci u ikpelaior i Igipiti, haa ve (ka wen man ônkasev mba akuraior a a lun a agee la) shin ajiir a zan kweng a taregh, a mba ve hongo shin ihungwa la imôngo.

¹⁹ Ka an je u hemba nan dooashee? Hungwa, za kohol mbaipusuv.

²⁰ Ve haa inya ken atô u mba i woo ve sha sanker. I na sanker ve; kura un kera a ikpelaior na cii.

²¹ Shin atô u Sheol mbaageev mba taver ayol vea ôr kwagh na kua mba ve wasen un la, er: Ve sen, ve yav ving, ve mbaipusuv, mba i woo ve sha sanker la.

²² Ashur ngu her a ikpelaior na cii; iwar na kase un; ka mba i woo ve cii; i wua ve sha sanker;

²³ i time iwar ve ken ajiir a hemban zan a shin ihungwa, man ikpelaior na kase uwar na, ve cii i wua ve, i wua ve sha sanker, ka ve mba ve tan ior mciem iyol ken tar u mbaumav je la.

²⁴ Elam kpaa ngu her a ikpelaior na cii, ve kase uwar na; ve cii i wua ve, i wua ve sha sanker, ka mba ve sen a ipusu shin ajiir a zan kweng a taregh la; ve mba ve tan ior mciem iyol ken tar u mbaumav, mba yan kunya ve a mba ve hongo shin ihungwa la imôngo.

²⁵ Ve tar un gambe ken atô u mba i woo ve, a ikpelaior na imôngo cii; iwar na kase un; ve cii ka mbaipusuv, i wua ve sha sanker; gadia ve taan ior mciem iyol ken tar u mbaumav, mba yan kunya ve a mba ve hongo shin ihungwa la imôngo; i wa un ken atô u mba i woo ve la.

²⁶ Mesheki man Tubal mba her a ikpelaior ve cii; iwar ve kase ve; ve cii ka mbaipusuv, i wua ve sha sanker; gadia ve taan ior mciem iyol ken tar u mbaumav

²⁷ Ve kera yav a anomaior a mbaipusuv, a i wua la, imôngo ga; a a sen shin Sheol a ikav mbi utyav mbi a, i gbir usanker vev ve ver ityouv vev sha mi, man aferakaa a ve cir ve, nga sha akuhe ve; gadia anomaior ta ior mciem iyol ken tar u mbaumav.

²⁸ We kpaa á sombo u ken atô u mbaipusuv, ú yav a mba i woo ve sha sanker la imôngo.

²⁹ Edom ngu heregh, a utor nav man atiator a na cii, shin er ve lu a agee nahan kpaa, i gbir ve a mba i woo ve sha sanker la imôngo.

³⁰ Mbatarev mba shin imbusutarimese kpaa, mba her, ve cii, kua Mbashidon cii, mba ve sen a mba i woo ve la imôngo. Mciem ma ve taan ior iyol cii sha tahav vev la, hingir ve kwagh u kunya; ve yav ipusu a mba i woo ve sha sanker la imôngo, mba yan kunya ve a mba ve hongo shin ihungwa la imôngo.

³¹ Farao una nenge a ve nahan ishima ia sur un sha ci u ikpelaior na cii; Farao man ikumutya na cii; i wua ve sha sanker, kape Ter AÔNDO A kaa ne.

³² Gadia M ver un, lu kwagh u cier iyol ken tar u mbaumav; nahan á gbir un ken atô u mbaipusuv, mba i woo ve sha sanker la imôngo, ka Farao a ikpelaior na cii la, kape Ter AÔNDO A kaa ne.