Esekiel 30 - ICIGHAN BIBILO

¹ Kwaghôron u TER shi va her a mo er:

² Wan u or, ôr kwaghôron u profeti kaa wer: Ter AÔNDO ngu kaan nahan er: Vaa nen, wuu! iyange la!

³ Gadia iyange la mgbôghom, ka iyange i TER i mgbôghom ye, ka iyange i abeen; ka shighe u akuraior je la.

⁴ Sanker una nyôr ken Igipiti, man ican kpishi ia lu ken Etiopia, zum u mba i woo ve vea haa inya ken Igipiti, man á kura ikumior na kera man á yôhôl amagh a na kpaa.

⁵ Etiopia man Puti man Ludi, man ior anza kposo kposo, man Kubi, man ior mba tar u u ye ikur a ve la, á wua ve sha sanker a ve imôngo.

⁶ TER ngu kaan nahan er: Ve mba ve tuur Igipiti la vea gba; imanger i tahav nav ia gba inya, á hii hen Mikedol zan zan za ar hen Shiene; á wua ve kimi sha sanker, kape Ter AÔNDO A kaa ne.

⁷ Vea hingir ice ken atô u ityar igen i i lu atse yô, agar a na aa lu ken atô u agar agen a i yôhôl a la.

⁸ Nahan vea fa er Mo M lu TER yô, zum u Me haa usu ken Igipiti, man mbawasen un cii vea tim.

⁹ Sha iyange la mbatyomov vea due sha ishigh Yagh vea yem shin utso sha u za tan Mbaetiopia mba ve tem gbidaa la mciem iyol, ican kpishi ia tser ve er sha iyange i Igipiti nahan; gadia, nenge, ngi van.

¹⁰ Ter AÔNDO ngu kaan nahan er: Me tim ikpelaior i Igipiti kera sha ikev i Nebukadinesar tor u Babilon la.

¹¹ Un a ior nav imôngo, ka ior mba hemban vihin kwagh a akuraior cii, á va a ve sha u vea tim tar la; vea tsuwa usanker vev sha u nôngon ityav a Igipiti, vea iv tar la a mba i woo ve.

¹² Me er uifi vea uma, Me gema tar Me wa u sha ikev i mbaaferev; Me gema tar ua hingir ice kua akaa a a lu kimi cii, sha ikev i ior mba ve lu nongo ugen; Ka Mo TER M kaa nahan ye.

¹³ Ter AÔNDO ngu kaan nahan er: Me tim akombo kera, Me na mbaaôndo mba gbiliniv vea bee ken Nofe; ma tor una kera due ken tar u Igipiti ga; man Me haa mciem ken tar u Igipiti.

¹⁴ Me gema Pateroshi kpaa una hingir ice, Me haa usu ken Soan, man Me ôr No ijir, Me tsaha un.

¹⁵ Me haa iyugh Yam sha Shin, garutya u Igipiti la; man me tim ikpelaior i No.

¹⁶ Me haa usu ken Igipiti; Shin una ya ican tsung; á hembe No kera; Nofe una zua a mbaahendanev atetan.

¹⁷ Ikaior i Aven man i Pibeseti, á wua ve sha sanker; man kasev vea nyôr ken kwar.

¹⁸ Hen Tehafeneheshi kpaa iyange ia wa ime, zum u Me kever igbouv mbi Igipiti heregh kera, man imanger i agee a na kpaa ia bee ker a na; un yô, ibeenegh kia cir un; man ônov nav mba kasev á yem a ve uikangen.

¹⁹ Kape Me ôr Igipiti ijir Me tsaha un la, nahan man vea fa er Mo M lu TER ye.

²⁰ Tsô sha inyom i sha pue kar môm, uwer u hiihii, ayange a u ataankarahar la, kwaghôron u TER va her a mo er:

²¹ Wan u or, M kever uwegh ku Farao tor u Igipiti; man nenge, i kange ku sha u á sôr ku ga, man i kange ku tsarikondo sha u ku̱ taver er kua kusu sanker kpaa ga.

²² Nahan yô, Ter AÔNDO ngu kaan nahan er: Nenge, M ngu num a Farao tor u Igipiti, Me kever ave a na, uwegh ku taver man ku ku vande kever la kpaa; Me na er sanker una osough sha uwegh nagh yô.

²³ Me sambe Mbaigipiti ken akuraior, me tsenda ve sha ityar ityar.

²⁴ Me taver ave a tor u Babilon, Me na sanker Wam sha uwegh nagh; kpa ave a Farao yô, Me kever a, nahan una toghor sha ishigh nagh er ka or u i gber nan ivav i kuugh yô.

²⁵ Me tuur ave a tor u Babilon, kpa ave a Farao yô, aa shir; nahan man vea fa er Mo M lu TER ye, zum u Me wa sanker Wam sha uwegh ku tor u Babilon, man una naregh ku sha tar u Igipiti yô.

²⁶ Me sambe Mba Igipiti ken akuraior, Me tsenda ve sha ityar ityar; nahan man vea fa er Mo M lu TER ye.