Esekiel 29 - ICIGHAN BIBILO

¹ Sha inyom i sha pue, uwer u sha pue kpaa, ayange a u pue kar ahar la, kwaghôron u TER va her a mo er:

² Wan u or, ver ishigh sha Farao tor u Igipiti, ôr kwaghôron u profeti sha a na man sha Igipiti cii;

³ ôr kwagh, kaa wer: Ter AÔNDO ngu kaan nahan er: Nenge, M ngu num a we, we, Farao tor u Igipiti, zegedarakon u a yaven shin atô u iwagh ne, u a kaa er: Ifi wam ka u wam iyol yam je, m er un sha ci u wam iyol yam.

⁴ Me wa u utsuwe ken azegher, Me na ishu i ken uifi ou ia var sha avuu a ou; Me dugh u shin uifi ou kera, a ishu i ken uifi ou cii, i i var sha avuu a ou la.

⁵ Nahan Me kende u ken desereti, we kua ishu i ken uifi ou cii; ú gba ken ikôngough ki kpuun kpuun, á kera kohol we ijiir i môm ga, man á ii u kpaa ga; Me gema u ú hingir kwaghyan u inyamtoho man inyon i sha.

⁶ Tsô mba ve tem ken Igipiti cii vea fa er Mo M lu TER yô, sha ci u ve lu ya u Iserael gbough ku sha iyia yô.

⁷ Zum u ve kôr u sha uwe, u sombo kera, man u ande avandeaveegh a ve cii; man zum u ve lian sha a we, u sombo, man u na awenge a ve cii tenger.

⁸ Nahan yô, Ter AÔNDO ngu kaan nahan er: Nenge, Me va a sanker sha a we, man Me tim or man zendenya ken a we kera cii.

⁹ Tar u Igipiti kpaa ua hingir ice man tihialôgh; man vea fa er Mo M lu TER ye; sha ci u a kaa er: Ifi ka u wam, man ka mo m er un ye.

¹⁰ Nahan yô, nenge, M ngu num a we, man a uifi ou kpaa; Me er tar u Igipiti ua hingir tihialôgh man ice dedoo, hii hen Mikedol zan zan za ar hen Shiene man ikighirtar i Etiopia.

¹¹ Ma nguhar u or kar sha u ga, man ma pandegh ku zendenya kpaa kua kar sha u ga, ma or nana tema ken u kpaa ga, zan zan anyom á kar akunduahar.

¹² Me gema tar u Igipiti ua hingir ice ken atô u ityar igen i i lu atse yô, agar a na kpaa ken atô u agar agen a i yôhôl a la; aa hingir atse zan zan anyom akunduahar; man Me sambe Mbaigipiti ken akuraior, Me tsenda ve sha ityar ityar.

¹³ Gadia Ter AÔNDO ngu kaan nahan er: Sha mbee u anyom akunduahar la, Me kohol Mbaigipiti ken akuraior a lu i sambe ve ker la.

¹⁴ Me gema mlu u Mbaigipiti, Me na, vea hide ken tar u Pateroshi, hen tar u i mar ve la; vea hingir tartor u gban ijime heregh.

¹⁵ Tartor ve ua hemba ndahar a ityartor igen; ua kera kende iyol i u sha ken akuraior ga; Me hide a ve ijime je, vea kera shi teman tor sha akuraior ga.

¹⁶ Ua kera lu ishuur u ya u Iserael kpaa ga, er i umbur iferkwagh ve, zum u ve gema ashe hen a ve, la; man vea fa er Mo M lu Ter AÔNDO ye.

¹⁷ Tsô sha inyom i sha ikundu kar utaankaruhar, uwer u hiihii sha iyange i u di i hiihii la, kwaghôron u TER va her a mo er:

¹⁸ Wan u or, Nebukadinesar tor Babilon, na ikumutya na, i nôngo num a Tiru sha ican; hanma ityough ki orough kpur, man hanma vandegh kpaa torough; nahan kpaa un kua ikumutya na zua a ma injar hen Tiru, sha ci u ityav mbi a nôngo a na la ga;

¹⁹ nahan yô, Ter AÔNDO ngu kaan nahan er: Nenge, Me na tar u Igipiti sha ikev i Nebukadinesar tor u Babilon, una kura ior i u, una ya ishar i u, una sar un, á hingir injar i ikumutya na.

²⁰ M na un tar u Igipiti sha ci u tom na u a er yô, gadia ve erem tom, kape Ter AÔNDO A kaa ne.

²¹ Sha iyange la Me na korough kua mende hen ya u Iserael, man Me na, ú ôr kwagh vangertiôr ken a ve; nahan vea fa er Mo M lu TER yô.