Esekiel 26 - ICIGHAN BIBILO

¹ Tsô sha inyom i sha pue kar môm, sha iyange i hiihii i uwer la, kwaghôron u TER va her a mo er:

² Wan u or, sha ci u Tiru a ter Yerusalem, a kaa er: Ehee! i hembe un u a lu hunda u akuraior la, i ver un ivegher her a mo; mo m iv, un yô, gema hingir gbilin,

³ nahan yô, Ter AÔNDO ngu kaan nahan er: Nenge, M ngu iyongo a we, we Tiru, Me na akuraior kpishi aa mough ityav a we, er zegemnger ngu a na agôndo na a moughon nahan.

⁴ Vea yôhôl ukpekpe mba Tiru man vea hembe ugôgômbaayoughouv nav; Me kember vuulevu na kera kpaa, Me gema un una hingir er vande u gbaam gbaam nahan.

⁵ Una hingir ijiir i tsenen ukper ken atô u zegemnger; gadia Mo M kaa nahan, kape Ter AÔNDO A kaa ne; una hingir ishar i yan hen akuraior kpaa.

⁶ Ônov nav mba kasev mba ve lu ken sule, á wua ve sha sanker; nahan vea fa er Mo M lu TER yô.

⁷ Gadia Ter AÔNDO ngu kaan nahan er: Nenge, Me va a Nebukadinesar tor u Babilon, tor u utor, sha imbusutarimese Mer, a̱ va ta num sha Tiru a anyinya man akekeautya man mbaanyinyav, ikumutya man ior kpishi.

⁸ Una wua ônov ou mba kasev ken sule sha sanker; una maa ayouautya sha u nôngon a we, una haa u atihi a inyaagh, man una kende iperutya i vesen sha, sha u nôngon a we.

⁹ Una ver akeke a hemben kpekpegar sha ugilmbaagarev ou, man una hembe ugôgômbaayoughouv ou sha azembe a na.

¹⁰ Sha mngee u anyinya a na la, ihundu i a ia cir u; ukpekpe ou vea tenger sha iov i mbaanyinyav man akaver man akekeautya, zum u una nyôr sha ihinda you, er ior ka ve nyôr ken gar u i hembe kpekpe na yô.

¹¹ Sha apande a anyinya a na una vughul igbenda you cii; una wua ior ou sha sanker, man mtôm ma awenem ma sha agee ou la maa yôhôl maa gbidye inya.

¹² Vea kura inyaregh you man vea ya ishar sha akaa a ou a teen; vea yôhôl ukpekpe ou, man vea vihi uya ou mba dedoo la kera; vea haa awen a ou man ikpande you man alôgh a ou ken atô u mnger.

¹³ Me na ikenge i atsam a ou ia bee; man imo i umolo ou kpaa á kera ungwa i ga.

¹⁴ Me gema u ú hingir vande u gbaam gbaam; ú hingir ijiir i tsenen ukper; á kera kimbir u maan we ga; gadia ka Mo TER M kaa nahan ye, kape Ter AÔNDO A kaa ne.

¹⁵ Ter AÔNDO ngu kaan a Tiru nahan er: Ityar i shin kpe u zegemnger ia kera tenger sha iov i mgbe wou, zum u mba i gber ve avav vea toghor, man iwoo-or ia lu ken atô wou la gaa?

¹⁶ Nahan utor mba hen zegemnger cii vea hungwa sha mkônom vem ma torom, vea er uriga vev, man vea bugh akondo ve a sha hwe la kera; vea gema vea cir ikarikase iyol, vea tema inya, vea zer gbidyen ikarikase iyol, man á kondo ve iyol sha ci wou.

¹⁷ Vea gber kwelegh vea vaa u, vea kaa a we er: Nenge er u timi, we u ior i zegemnger ve tema ken a we ne, zegegar u zan iti, u lun taveraa ken zegemnger, wen a mba ve tem kimi, mba ve na mcieryol ve gba sha mba ve tem her cii!

¹⁸ Hegen yô, ityar i shin kpe u zegemnger ia tenger sha iyange i mgbe wou la; een, acile a a lu ken zegemnger la á cier a iyol sha mkarkera wou.

¹⁹ Gadia Ter AÔNDO ngu kaan nahan er: Zum u Me gema u ú hingir gar u gbilinigh dang er agar a a lu a ior ker ga yô, zum u Me va a zegemnger sha a we, man uzegembamngerev vea cir u yô,

²⁰ sha shighe la Me hungwa a we a mba ve hongo shin ihungwa la imôngo, hen ior mba tsuaa la, Me na u ú tema ken ajiir a zan kweng a taregh la, ken udeserti mba ve vande lun gbem la, a mba ve hungwa shin ihungwa la imôngo, sha u i̱ de kera shi teman ken a we ga, man ú kera kôndo ú tema sha tar u mbaumav ga;

²¹ Me gema u, ú hingir kwagh u cieryol, man ú kera lu sha won ga, shin á ker kpaa á kera zua a we mayange ga, kape Ter AÔNDO a kaa ne.