Esekiel 25 - ICIGHAN BIBILO

¹ Kwaghôron u TER va her a mo, er:

² Wan u or, ver ishigh you sha Mbaamon, ôr kwaghôron u profeti sha a ve;

³ kaa Mbaamon wer: Ungwa nen kwaghôron u Ter AÔNDO: Ter AÔNDO ngu kaan nahan er: Sha ci u u kaa wer: Ehee! sha icighanjiir Wam la, zum u i hôngor a mi yô, man sha tar u Iserael kpaa, zum u i gema u u hingir ice la, man sha ya u Yuda kpaa, zum u i yem a ve ken uikangen la,

⁴ nahan yô, nenge, M ngu nan we sha ikev i ior mba sha ityoughkitaregh, ú hingir kwagh ve, vea wa afo ve ken atô wou, man vea maa uya vev ken a we, vea ya atam a ikon a ou man vea ma atumba a ou.

⁵ Me gema Raba una hingir ijiir i urakumi vea yan toho her, man Mbaamon vea hingir ijiir i yaven i ikumuile; nahan nea fa er Mo M lu TER yô.

⁶ Gadia Ter AÔNDO ngu kaan nahan er: Sha ci u u kur ave man u kur angahar inya man u ember a mlaha u uma wou cii sha tar u Iserael yô,

⁷ nahan, nenge, M naregh uwegh Agh sha a we, Me na u sha ikev i akuraior, ú hingir ishar, Me gber u ken ior kera kpaa, man Me na u, ú saa ishe ken ityar kera; Me tim u, nahan man ú fa er Mo M lu TER ye.

⁸ Ter AÔNDO ngu kaan nahan er: Sha ci u Moabi man Seir ve kaan er: Nenge, ya u Yuda ngu er akuraior agen cii nahan;

⁹ nahan yô, nenge, Me bugh kpe u Moabi vegher u hen agar, hen vegher u agar a na a a lu sha akighiratar a na, icivir i tar la cii, Bete-yeshimon man Baal-meon man Kiriataim.

¹⁰ Me gema un Me na un a Mbaamon imôngo, sha ikev i ior mba sha ityoughkitaregh, vea hingir kwagh ve, sha u á kera umbur Mbaamon ken akuraior ga yô;

¹¹ Me ôr Moabi ijir Me tsaha un, man vea fa er Mo M lu TER ye.

¹² Ter AÔNDO ngu kaan nahan er: Sha ci u Edom a tese ihom sha ya u Yuda sha iyev i oron yô, man a vihi kwagh kpishi, a or iyev sha ve,

¹³ nahan yô, Ter AÔNDO ngu kaan nahan er: Me naregh uwegh Agh sha Edom, man Me wua or kua zendenya cii ker kera; Me gema un, una hingir ice, hii hen Teman zan zan za ar hen Dedan, á wua ve sha sanker.

¹⁴ Me na ior Av Iserael vea or Edom iyev sha ci Wam; vea er kwagh ken Edom sha ishima Yam i vihin, man sha iyugh Yam; nahan vea fa iyev Yam i oron, kape Ter AÔNDO A kaa ne.

¹⁵ Ter AÔNDO ngu kaan nahan er: Sha ci u Mbafiliti ve er kwagh sha iyevoron man ve or iyev a mlaha ken ishima sha u timin sha ihom i gbem,

¹⁶ nahan yô, Ter AÔNDO ngu kaan nahan er: Nenge, Me naregh uwegh Agh sha Mbafiliti, Me wua Mbakereti, man Me tim asande a a shi hen kpe u zegemnger la.

¹⁷ Me or ve iyev i vesen sha mbamtsaha mba sha ishimavihin tsung; tsô vea fa er Mo M lu TER yô, zum u Me va a iyevoron Yam sha a ve la.