Esekiel 22 - ICIGHAN BIBILO

¹ Kwaghôron u TER va her a mo, er:

² We wan u or, ú ôr gar u haan awambe ne ijir, ú ôr un ijiri? Yô, pase un aeren a na a ndôhôrshima cii.

³ Kaa wer: Ter AÔNDO ngu kaan nahan er: Gar u a hee awambe ken atô na, sha u shighe na a̱ kuma, man u a er akombo sha u hôngor iyol na a min!

⁴ U hingir u lun a ibo iyol sha awambe a u hee la, man shi u hôngor kpaa sha akombo a u er la; u kôvor ayange a ou, u ar sha ikighir i anyom a ou; nahan yô, M gema u, u hingir kwagh u iheen hen akuraior, man kwagh u nahan tar sha ityar cii.

⁵ Mba ve lu ikua, man mba ve lu ca a we kpaa, vea naha u tar, we, kwagh u dang u mgboughon a ayôôso ne.

⁶ Nenge, mbatarev mba Iserael mba ken a we, hanmô sha tahav mbu nan, nan lu haan awambe.

⁷ I civir ter man ngô ken a we ga; shiror kpaa i er nan ican, ken a we; ancôghol man kwasecôghol kpaa i nzughul a ve ken a we.

⁸ U laha akaatseghan a Am, man u hôngor a ayange a memen Am.

⁹ Mbaangerev tema ken a we sha u haan awambe, man ve ya kwagh sha iwo ken a we, ve er ijimba ker atô wou.

¹⁰ Ken a we, i bugh idyelegh u uter; ken a we kpaa, i tsa a kwase hen shighe u nan dugh won la.

¹¹ Orgen er idya a kwase u or u wan ndor a nan; man orgen hôngor iyol a kwase u wan u nan; man orgen ken a we kpaa nan vihi anngô u nan u kwase, wan u ter u nan.

¹² Ken a we, i ngohol inyaregh ki yamen ishô sha ci u haan awambe; u ngohol mngerem man mtsera u ganden ikaa inya, man u ngohol mtsera hen orwanndor a we sha mkighir je, man Mo M hungul we, kape Ter AÔNDO A kaa ne.

¹³ Nahan yô, nenge, M kure ave, sha mtsera u bo u u ye la, man sha awambe a haan a ken atô wou la.

¹⁴ Ishima you ia fatyô u taver her, ave ou kpaa a a fatyô u taver sha ayange a Me ta num sha a we laa? Ka Mo TER M kaa kwagh ne ye, shi Me kure un kpaa.

¹⁵ Me sambe u ken akuraior man Me tsenda u sha ityar ityar, Me tim akaa a ou a hôngorough ken a we kera.

¹⁶ Ú hôngor a iyol you sha ashe a akuraior cii man wea fa er Mo M lu TER ye.

¹⁷ Kwaghôron u TER va her a mo, kaa er:

¹⁸ Wan u or, ya u Iserael hingir Mo er ka atsaase a kwagh nahan; ve cii, ve mba iyôgh ki togula man kwaza man iyôgh ki iligh man inyelegh ken atô u adum; ve hingir atsaase a azurfa je.

¹⁹ Nahan yô, Ter AÔNDO ngu kaan nahan er: Sha ci u ne hingir atsaase cii yô, nahan nenge, Me kohol ne ken atô u Yerusalem.

²⁰ Er ka i kohol azurfa man togula man iyôgh ki iligh man inyelegh man kwaza ken atô u adum sha u á suwe usu u̱ sough mbi yô, kape Mo kpaa Me kohol ne ken ishimavihin Yam man iyugh Yam la, Me haa ne ker, man Me sough ne.

²¹ Een, Me kohol ne, Me suwe ne usu u iyugh Yam, man né sough ken atô u u.

²² Er ka i sough azurfa ken atô u adum nahan, kape á sough ne ker atô u u la, man nea fa er i lu Mo TER M hee ne iyugh Yam yô.

²³ Kwaghôron u TER va her a Mo, kaa er:

²⁴ Wan u or, kaa a u wer: U ngu tar u i wanger u ga, man i nee ura sha u sha iyange i iyugh kpaa ga yô.

²⁵ Uprofeti Nav zua zwa u bo ker atô u u, er ka begha u tan kume anden inyam i a ker yô; ve ya uuma mba iorov, ve kura inyarev man akaa a injaa, ve seer kasev mba côgholov ken u kpishi.

²⁶ Upristi nav vihi atindi a Am, ve hôngor a uicighanmbaakaav Av; ve kera pav icighankwagh kposo a kwagh u a lu u tseghan ga la, ga; man shi ve tese ior u kaven mkposo u kwagh u a lu wang ga, a kwagh u a lu wang la, ga; man ve kusu ashe ve sha ayange a memen a Am; i laham, i kera civir Mo ker atô ve ga.

²⁷ Mbatarev nav ken a na mba er ugbaseela mba anden inyam i ve ker yô, sha u haan awambe, man u timin uuma mba iorov, sha u vea zua a mtsera u sha mimi ga yô.

²⁸ Uprofeti nav shighe ivue sha ci ve, mba nengen mpase u icughugh man mtsengeôron u aiegh, mba kaan er: Kape Ter AÔNDO A kaa ne, man TER kpaa kaa ga.

²⁹ Ior mba ken tar la mba ngohol kwagh sha agee man mba numun gbenda, een, ve er atsanaior man mbaibanave ican, man ve kighir shiror sha apera.

³⁰ M ker or môm ken ve u nana sôr kpekpegar man nana tile hen ijiir i i hembe kpekpegar la sha ishigh Yagh sha u M̱ de kera timin tar la ga, kpa M tser a ma or ga.

³¹ Nahan yô, M haa ve ishimavihin Yam; M nande ve sha usu u iyugh Yam; M hire ve a ibo i gbenda ve sha ityouv vev, kape Ter AÔNDO A kaa ne.