Esekiel 21 - ICIGHAN BIBILO

¹ Tsô kwaghôron u TER va her a mo, er:

² Wan u or, ver ishigh sha Yerusalem, ôr kwagh sha ajiir a tseghan, man ôr kwaghôron u profeti sha tar u Iserael;

³ kaa a tar u Iserael wer: TER ngu kaan nahan er: Nenge, M ngu ihom a we, Me tsuwe sanker Wam ken var na, man Me wua mbaperapera kua mbaaferev cii ken a we kera.

⁴ Er M wua mbaperapera kua mbaaferev cii ken a we yô, nahan, sanker Wam una tsuwa ken var na, una ta num sha uuma cii, á hii sha imbusutariyan zan zan i imese.

⁵ Nahan uuma cii vea fa er Mo TER M tsough sanker ken var na yô, una kera hide á nyôr ker ga.

⁶ Nahan yô, shir ishima, we wan u or; shir ishima a mkondoyol man ishima i vihin tsung, sha ashe a ve.

⁷ Tsô zum u vea pine u er: Ka nyi man u shirin ishima? Yô, kaa wer: Ka sha ci u loho, gadia ngu van; hanma ishima ia sough, ave cii aa shir livaa, hanma jijingi una vôr, man anu cii aa taver ga er mngerem nahan, nenge, ngu van, kwagh una va er kpee, kape Ter AÔNDO A kaa ne.

⁸ Kwaghôron u TER shi va her a mo, kaa er:

⁹ Wan u or, ôr kwaghôron u profeti, kaa wer: TER ngu kaan nahan er: Kaa wer: Sanker, sanker! i wua un, i kile un kpaa;

¹⁰ i wua un sha u sôngon kwagh; i kile un sha u a̱ engem er inyiar nahan. Nahan kpaa se gba ember kera tsô? Tôgh ku wan wam ku laha hanma kon.

¹¹ I na sanker er i̱ kile un sha u eren tom a mi; i wua un, man i kile un kpaa, sha u nan sha ikev i orsôngonkwagh.

¹² Genger imo, vaa, wan u or; gadia á va ta sha ior Av, á va ta sha mbatarev mba Iserael cii, i gema ve i na sanker, a ior Av imôngo; nahan yô, kure ave hen ikooso.

¹³ Gadia ikaren va kera kpaa; tsô á lu nana, aluer tôgh ku tor ku ku laha la kpaa kua kera lu ga? Kape Ter AÔNDO A kaa ne.

¹⁴ Nahan yô, we, wan u or, ôr kwaghôron u profeti man kure ave ou, sanker a̱ gber, kwa har shin kwa tar je, sanker u mba á wua ve la; ka sanker u vesen u mba á wua ve la, u a kase ve hanma ian cii.

¹⁵ M ver ku u sha sanker sha ihinda ve cii, sha u ishima ve i̱ sough, man gbev vev mbu nôngon kpaa mbu̱ seer ngeen; kpei! i er un er ka inyiar nahan, i wua un sha u sôngon kwagh.

¹⁶ Kohol iyol, gber ken iyan; wa ago iyol, gber ken imese; hanma vegher u kur wou a ver ishigh cii.

¹⁷ Mo kpaa Me kure ave, Me na ishimavihin Yam ia mem; ka Mo TER M kaa nahan ye.

¹⁸ Kwaghôron u TER shi va her a mo, er:

¹⁹ We wan u or, ver igbenda ihiar, henpe sanker u tor u Babilon una va kar la; ihiar cii i̱ due tar môm; ver ikav i tesen ijiir, ver ikav sha mhii u gbenda u zan ken gar.

²⁰ Yô, ver gbenda u sanker una va ken Raba u Mbaamon, man hen Yuda ken Yerusalem u a lu a gilgar la.

²¹ Gadia tor u Babilon tile sha akahar a igbenda, sha mhii u igbenda ihiar la, sha u kpehen ishor; a tsongor avaan keen man keen, a za hen kwagh a terafim, a nenge sha mtema.

²² Sha uwegh nagh ku yanegh la ishor i gba sha Yerusalem sha u veren akeke a hemben kpekpegar a min, u gbidyen vaa, u wuan, u genger imo, veren akeke a hemben ihindagar, u haan atihi a inyaagh, man u maan ayou a taver.

²³ Kpa ishor i kpehen la lu ve gbilinkwagh sha ishi, ve mba iyange ve bum la; kpa á va umbur iferkwagh ve, sha u ma i ker ve.

²⁴ Nahan yô, Ter AÔNDO ngu kaan nahan er: Er ne ne, i umbur iferkwagh yen, er i pase afer a en ken igbar yô, nahan ken aeren a en cii, asorabo a en hingir ken igbar; sha ci u mba umbur ne, nahan á kôr ne sha ave je.

²⁵ Man we, dangor u ifer, ityoor u Iserael u iyange you i ve, sha shighe u mtsaha u masetyô la,

²⁶ Ter AÔNDO ngu kaan nahan er: Sagh atsar kera, bugh idyer i tor kpaa; kwagh una kera va lu nahan ga; kende kwagh u gban ijime la sha, gema hide a u a kende sha la ijime.

²⁷ Mtim, mtim, Me tim un kera; kwagh ne kpaa una kera va ga, zan zan un u i lu kwagh na jim, una kar van, u Me na un yô.

²⁸ We, wan u or, ôr kwaghôron u profeti, kaa wer: Ter AÔNDO ngu kaan sha kwagh u Mbaamon, man sha tarnahan ve la; kaa wer: Sanker, i tsuwa sanker sha ci u sôngon kwagh, i kile un je engem er inyar nahan—

²⁹ er mba nengen mbampase mba gbilinigh sha ci wou man mba tsengan ôron we kwagh sha aie— sha u veren un sha imon i aferaior a dang, a iyange ve i ve kera, sha shighe u mtsaha u masetyô.

³⁰ Hide a sanker, wa ken var. Ka sha ijiir i i gbe u, ken tar u i mar u la, Me ôr u ijir ye.

³¹ Me haa u iyugh Yam, Me fehe u usu u ishimanyoon Yam; Me na u sha ikev i ior mba vihin kwagh tsung, mba fan u timin kwagh.

³² Ú hingir kwagh u keer usu a mi; awambe a ou aa lu ken atô u tar, á kera umbur we sha won ga; gadia ka Mo TER M kaa nahan ye.