Esekiel 19 - ICIGHAN BIBILO

¹ Nahan yô, gber kwelegh sha ci u uityombaiorov mba Iserael;

² kaa wer: Ngôu lu ngôbegha zee! A yav her atô u ubegha; ka ker atô u agum a ubegha, a koson ônov nav ye.

³ A yese wan na ugen, hingir gumbegha; a hen ikôr i yaren, a ya ior.

⁴ Akuraior ungwa gwa na, i kôr un ken ihungwa ve i hônon; ve va a na sha utsuwe ken ta u Igipiti.

⁵ Yô, zum u a nenge er a kegh yum, man ishimaverenkeghen na kpaa bunde kera yô, a tôô wan na ugen, a gema un hingir gumbegha.

⁶ A zenden ker atô u ubegha; a hingir gumbegha; a hen ikôr i yaren, a ya ior.

⁷ A vihi uya mba utor, a hembe agar a ve a vesen; tar la hingir ice kua m-iv u u, sha ci u ihuran i ikume na la.

⁸ Nahan akuraior kohol iyol, mough iyongo a na sha hanma ipaventar; ve samber kper ve sha a na; i kôr un ken ihungwa ve i hônon.

⁹ Ve wa un ken keiji a utsuwe, ve va a na hen tor u Babilon, ve nyôr a na ken ayouautya a taver, sha er á kera ungwa imo na sha iwo i Iserael ga yô.

¹⁰ Ngôu lu er kon u wain nahan, zum u u lu iyev la, u i môôr un hen kpemnger; a ume atam dedoo, a mgbough a agbaa sha ci u mngee u mnger la.

¹¹ A lu a agbaa a taver, hingir atô a uityombaiorov; a tav je, a due a ityough sha hen ahu a wan mgbigh mgbigh; a tav sha tser tser a agbaa a u, a ngeen la.

¹² Kpa i wuhe un kera sha ishima i vihin, i ta un inya; ahumbe a sha ityoughkitaregh uma atam a u; i kever agbaa a u, a taver la, usu hia a kera.

¹³ Hegen i môôr un ken taaikôngo ken tar u iombor u imura i ker her yô.

¹⁴ Usu due ken agbaa a na hia atam a na, nahan i kera shi ma gbaa u taver u una va hingir tôgh ku torough ga. Ngun ka kwelegh je, hingir kwelegh kpaa.