Esekiel 18 - ICIGHAN BIBILO

¹ Kwaghôron u TER shi va her a mo er:

² Er nan man ne er injakwagh ne sha tar u Iserael, ne kaan ner: Uter ya atam a wain a angen, man anyi kar dura mbayeve?

³ Er M lu u uma ne, kape, Ter AÔNDO A kaa ne: Né zua a ityôkwagh i ôron injakwagh ne ken Iserael ga.

⁴ Nenge, uuma cii ka mba Av je, uma u ter kua uma u wan kpaa ka u Wam je; or u nan eren isholibo yô, ka nan nana kpe ye.

⁵ Kpa aluer or nana lu or u perapera, nana er kwagh u a lu sha tindi vough man sha mimi kpaa,

⁶ nana ya kwagh sha iwo ga, nana kende ashe sha akombo a ya u Iserael kpaa ga, nana vihi kwase u or u wan ndor a nan ga, man nana va ikua a kwase hen shighe u a dugh won kpaa ga,

⁷ man nan kighir orgen sha apera ga, kpa nan hidi a ityungu hen or u yan nan injô, man nan ngohol ma or kwagh sha agee ga, kpa nan ne mba ijen i ker ve kwaghyan, man nan cirin mbalun idyelegh akondo iyol,

⁸ man nan ne injô, nan we mngerem ga, man nan ngohol mtsera kpaa ga, nan dugh uwegh ku nan sha kwaghbo kera, nan er ijir sha mimi hen atô u orgen a orgen,

⁹ nan zenden ken akaawan a Am, man nan we akaaôron a Am a jirigh iko, sha u eren sha mimi, ka nan nan lu orperapera ye, nana lu uma kpee je, kape Ter AÔNDO A kaa ne.

¹⁰ Aluer nana mar wan u numun gbenda, u haan awambe a ior inya, u eren ma kwagh ken akaa ne yô,

¹¹ man a we ma kwagh ken a iko ga, kpa una ya kwagh sha iwo, man una vihi kwase u or u wan ndor a na kpaa,

¹² una kighir mbaatsanev man mbaibanave sha apera, una ngohol kwagh sha agee man una hide a ityungu ga, man una kende ashe na sha akombo, una er akaa a ndôhôrshima,

¹³ una na injô una wa mngerem una ngohol mtsera, nahan shi una lu umaa? Mayange una lu uma ga. A er akaa a ndôhôrshima ne cii; á wua un kpee; ike i awambe a na ia hide sha ityough nagh.

¹⁴ Kpa nenge, aluer nana mar wan u a nengen a asorabo a ter na a eren la cii, kpa a cie, a er ambaakaa ne ga,

¹⁵ man a ye kwagh sha iwo ga, a kenden ashe sha akombo a ya u Iserael la kpaa ga, a vihi kwase u or u wan ndor a na ga,

¹⁶ a kighir ma or sha apera kpaa ga, a ngohol ma kwagh sha ityungu ga, a ngohol kwagh sha agee kpaa ga, kpa a ne mbaijenev kwaghyan na, man a cirin mbalun idyelegh ikondo iyol,

¹⁷ a dugh uwegh ku nan sha kwaghbo kera, a ngohol mngerem sha injô ga, shin mtsera kpaa ga, a eren sha akaaôron Am a jirigh, man a zenden sha akaawan a Am, una kpe sha ci u iferkwagh i ter na la ga, una lu uma kpee je.

¹⁸ Kpa ter na la yô, er a kighir sha apera man a ngohol anngô na kwagh sha agee, man a er kwagh u a lu dedoo a ior nav kpaa ga, nenge, una kpe sha ci u ifer na.

¹⁹ Kpa ne mba kaan ner: Ka sha ci u nyi man wan á ya ican sha ci u ibo i ter na ga? Kpa wan yô, er kwagh sha tindi vough man sha mimi, man a wa akaawan a Am cii iko, a er sha a kpaa, una lu uma kpee je.

²⁰ Or u nan er isholibo yô, ka nan nana kpe ye; wan una ya ican sha ci u ibo i ter na ga, man ter di kpaa una ya ican sha ci u ibo i wan na ga; perapera u ormimi una lu sha a nan, man ifer i or u bo di kpaa ia hide sha ityough ki nan.

²¹ Kpa aluer iferor nana gema á undu asorabo a nan cii, a nan lu eren la, man nana waan akaawan a Am cii iko, man nana eren sha tindi vough man sha mimi kpaa yô, nana lu uma kpee je, nana kpe ga.

²² Á kera umbur ma iferkwagh i môm i nan er ga; sha perapera u nan er la, nana lu uma.

²³ Ku u iferor doomoo? Kape Ter AÔNDO A kaa ne; kera sarem er ma nan gem ishima ma nan undu gbenda u nan, ma nan zough a uma gaa?

²⁴ Kpa aluer orperapera nana gema á undu perapera u nan man nana er iferkwagh nana eren akaa a ndôhôrshima a iferor nan eren yô, nahan nana lu uma jee? Á kera umbur aerenakaa a nan a perapera a nan lu eren la kwa môm tsô kpaa ga; ka sha ci u mimi ga u nan man sha ci isholibo i nan er la je, nana kpe ye.

²⁵ Nahan kpaa, ne mba kaan ner: Gbenda u TER ngu vough ga. Ungwa nen ase; we ya u Iserael: Gbenda Wam ngu vough ga zee? Kera ka igbenda yen i lu vough ga ye, gaa?

²⁶ Zum u orperapera nan gem nan undu perapera u nan, man nan er iferkwagh yô, nana kpe sha i; ka sha iferkwagh i nan er la, nana kpe ye.

²⁷ Shi zum u iferor nan gem nan undu iferkwagh i nan i nan er la, man nan er kwagh sha tindi vough man sha mimi yô, nana lu uma her.

²⁸ Er nan gem nan undu aeren a sha mi ga, a nan la cii, a nan er la yô, nana lu uma kpee je, nana kpe ga.

²⁹ Nahan kpaa ya u Iserael ngu kaan er: Gbenda u TER ngu vough ga. We, ya u Iserael igbenda Yam ngi vough ga zee? Kera ka igbenda yen i lu vough ga ye, gaa?

³⁰ Sha ci u nahan yô, we ya u Iserael, Me kure ne ijir, hanmô sha aeren a nan, kape Ter AÔNDO A kaa ne. Gema nen asema, undu nen asorabo a en cii; a̱ de kera hingir ne kwagh u nan gbev mbu nôngon eren iferkwagh ga.

³¹ Haa nen asorabo a en, a ne er la cii kera, wa nen ishima i he man jijingi u he kpaa, gadia ka sha ci u nyi né kpe, we ya u Iseraele?

³² Gadia saan Mo iyol a ku u or u nan kpe la ga, kape Ter AÔNDO A kaa ne; nahan yô, gema nen asema lu nen uma.