Esekiel 13 - ICIGHAN BIBILO

¹ Kwaghôron u TER va her a mo kaa er:

² Wan u or, ôr kwaghôron u profeti sha uprofeti mba Iserael mba ve er kwaghôron u profeti la, kaa a mba ve er kwaghôron u profeti sha asema a ve la wer: Ungwa nen kwaghôron u TER:

³ Ter AÔNDO ngu kaan nahan er: Kwagh á tser udangmbaprofeti mba ve dondon sha jijingi ve ayol a ve, mba ve nenge a ma kwagh ga yô.

⁴ We, Iserael, uprofeti ou mba er ugbaseela mba hen ice nahan.

⁵ Ne za tile sha ajiir a i hembe kpekpegar la ga, man ne maa kpekpegar sha ci u ya u Iserael sha u tilen ken utya sha iyange i TER kpaa ga.

⁶ Ve nenge kwagh u icughugh man mtsengepasen u aiegh, ve mba ve kaan er: TER ngu kaan nahan, kpa TER tindi ve ga; nahan kpaa ve ver ishima er kwaghôron la una kure sha mi.

⁷ Kera ka mpase u icughugh ne nenge, man mtsengepasen u aiegh ne ôr, er ne kaan ner: TER ngu kaan nahan, kpa M kaa ga ne, gaa?

⁸ Nahan yô, Ter AÔNDO ngu kaan nahan er: Er ne ôr kwagh u icughugh man ne nenge mpase u aiegh, sha ci u nahan yô, nenge, M ngu ihom a ven, kape Ter AÔNDO A kaa ne.

⁹ Uwegh Agh kua lu ihom a uprofeti mba ve nengen mbampase mba icughugh man ve tsengepasen sha aie la: vea lu ken mkohol u ior Av ga, man á nger ati a ve ken ruamabera u ya u Iserael ga, shi vea nyôr ken tar u Iserael kpaa ga; nahan vea fa er Mo M lu Ter AÔNDO ye.

¹⁰ Ka sha ci u, een, ka sha ci u ve tsume a ior Av, ve kaan er: Bem; kpa bem ngu ga; man aluer ior ve maa kpekpe yô, nenge, ve gema, ve shighe un ivue.

¹¹ Kaa a mba ve shighe ivue la wer, una gba; á nôô zegeura, mngerem maa sar avenge; ne awombo a tamen nea haa; man ijeverahumbe ia kar.

¹² Tsô zum u kpekpe una gba yô, á kera pine ne er: kwagh u ne shighe un a mi la ngu han, gaa?

¹³ Nahan yô, Ter AÔNDO ngu kaan nahan er: Me yôhôl un sha ijeverahumbe sha ishima i vihin Yam; á nôô zegeura, mngerem maa sar avenge sha iyugh Yam, man uzegembaawombov sha ishimavihin, sha u timin un.

¹⁴ Kape Me yôhôl kpekpe u ne shighe un ivue la, Me yôhôl un je á mande shin inya; nahan imagh kia due sha; una gba man ne kpaa á tim ne kimi; man nea fa er Mo M lu TER ye.

¹⁵ Kape Me kure iyugh Yam sha kpekpe, man sha mba ve shigh un ivue je la, man Me kaa a ven Mer: Kpekpe shon kera ngu ga, mba ve shigh un la cii kpaa kera mba ga;

¹⁶ ka uprofeti mba Iserael je la, mba ve er kwaghôron u profeti sha Yerusalem, man mba nengen mbampase mba bem sha ci na, kpa bem ngu ga, kape Ter AÔNDO A kaa ne.

¹⁷ We wan u or, ver ishigh you sha u lun ihom a ônkasev mba ior ou, mba ve er kwaghôron u profeti sha asema a ve la; ôr kwaghôron u profeti a ve,

¹⁸ kaa wer: Ter AÔNDO ngu kaan nahan er: Kwagh á tser kasev mba ve kor atsar sha azuanaveegh cii, man mba ve er akondo a yisan sha ityough ki hanma injaor sha u kôron ior. Ne soo u kôron ior Av, man u yiman ior sha ci u ayol a ene?

¹⁹ Ne heem ken ior Av, sha ci u zuan akevaveegh a sam u shair man avur a bredi, sha u wuan ior mba ve doo u ma ve kpe ga la, man shi sha u den ior mba i doo u ma ve lu uma ga la ka sha mbaaie enev mba ne ôr ior Av mba ve veren ato sha mbaaie yô.

²⁰ Nahan yô, Ter AÔNDO ngu kaan nahan er: Nenge, M ngu ihom a atsar a en a kangen, a ne ker ior a mi er ka inyon la, Me tôndo a sha ave a en kera; Me pase ior mba ne ker ve er ka inyon la, Me tuhwa.

²¹ Akondo a en a yisan a sha ityou kpaa, Me ande a, man Me yima ior Av sha ikev yen, nahan vea kera lu sha ikev yen er ka kwagh u i ker un a kôr ga; man nea fa er Mo M lu TER ye.

²² Sha ci u ne vihi ishima i mbaperapera sha aie, mba M vihi ve asema ga, man ne taver ave a iferor, sha er nana̱ de kera hiden ijime sha gbenda u nan u bo, nana̱ war ga.

²³ Nahan yô, né kera nenge a mpase u icughugh ga, man né kera tsengapasen kwagh kpaa ga; Me yima ior Av sha ikev yen; man nea fa er Mo M lu TER ye.