Esekiel 12 - ICIGHAN BIBILO

¹ Kwaghôron u TER shi va her a mo er:

² Wan u or, u ngu teman ken atô u ior mba hendan kwagh, mba ve lu a ashe a nengen, kpa ve nengen ga yô, man ve lu a ato a ungwan, kpa ve ongo ga yô; gadia ka ior mba hendan kwagh je.

³ Nahan yô, we wan u or, wa ikav mbi kohol iyol u yemen ken uikangen, yem ken uikangen atetan je sha ashe a ve, mough hen ijiir you i teman la, yem ijiir igen sha ashe a ve; alaghga vea ver ishima, shin er ve lu ior mba hendan kwagh nahan kpaa.

⁴ Due a ikav you atetan sha ashe a ve, er ka ikav mbi yemen a mi ken uikangen, nahan we iyol you kpaa, mough aôndoaimegh sha ashe ve, er ka a yemen ken uikangen nahan.

⁵ Time ihura ken kpekpe, pev, sha ashe a ve je, due aa mbi hen i.

⁶ Tôô mbi sha vande sha ashe a ve je, due a mi ken ime; cir ishigh you sha er ú kera nenge a inya ga yô; gadia M ver u sha u u̱ lu ya u Iserael ikav.

⁷ Tsô m er er i kaam nahan, M due a ikav yav atetan, er ka ikav mbi yemen a mi ken uikangen yô; m time ihura sha kpekpe aôndoaimegh, m pev sha uwegh agh; m due a mbi ken ime, m tôô mbi sha vande sha ashe a ve.

⁸ Kwaghôron u TER va her a mo pepe er:

⁹ Wan u or, ya u Iserael, ior mba hendan kwagh mbala, ve kera pine u er: Ka nyi u eren gaa?

¹⁰ We yô, kaa a ve wer: Ter AÔNDO ngu kaan nahan er: Kwaghôron ne ngu tesen sha kwagh u tor u ken Yerusalem, man sha ya u Iserael cii, mba ve lu ker yô.

¹¹ Kaa wer: Mo m ngu ne ikav, er m er nahan, kape á er a ve je la; vea undu tar ve, vea yem ken uikangen.

¹² Tor u a lu ken a ve la, una tôô ikav sha vande ken ime, una due; vea time ihura ken kpekpe vea pev, sha u duen a ikav her; una yisa ishigh nagh, gadia una kera nenge a inya sha ashe na ga.

¹³ Me haa un kper Wam, man una gba ken kwaghhônon Wam; Me va a na hen Babilon ken tar u Mbakaldi; kpa una nenge a u ga, una kpe ker.

¹⁴ Mba ve lu a na imôngo sha u wasen un la cii, man akumautya na cii, Me sambe ve sha ahumbe, sha hanma vegher cii; Me tsuwa sanker, Me cir ve ijime.

¹⁵ Man vea fa er Mo m lu TER ye, zum u Me sambe ve ken akuraior man sha ityar ityar la.

¹⁶ Kpa Me undu ior kpeghee ken a ve, mba sanker man ijen man bouange ve tim ve ga yô; sha u ve̱ pase akaa a ve a ndôhôrshima hen akuraior henpe vea za la; nahan vea fa er Mo M lu TER ye.

¹⁷ Kwaghôron u TER shi va her a mo kaa er:

¹⁸ Wan u or, ya kwaghyan wou a akarkase iyol, man ma mngerem ou gir gi gir a ishima i nyian;

¹⁹ kaa a ior mba hen tar la wer: Ter AÔNDO ngu kaan sha mba ve tem ken Yerusalem man tar u Iserael ne nahan er: Vea ya kwaghyan ve a ishima i nyian man vea ma mngerem a mkondoyol, sha ci u tar ve ua hingir ice, man akaa a a lu ken u cii, aa saa kera, sha ci u ipila i mba ve tem ken u la cii.

²⁰ Agar a ior ve tem ken a kpaa, á gema a á hingir ice, man tar la kpaa ua hingir gbilin; man nea fa er Mo M lu TER ye.

²¹ Kwaghôron u TER va her a mo, er:

²² Wan u or, ka nyi injakwagh ne er ken tar u Iserael, ne kaan ner: Ayange nga karen man hanma mpase kpaa kur sha mi ga?

²³ Nahan yô, kaa a ver wer: Ter AÔNDO ngu kaan nahan er: Me na injakwagh i i lu ôron ne ia bee, man vea kera ôr kwagh sha mi er ka injakwagh nahan ken Iserael ga; kpa kaa a ve wer: Ayange mgbôghom, kua mkur u hanma mpase kpaa.

²⁴ Gadia mpase u icughugh una kera lu ga, shin mtsengeôron kwagh u sha zwanyohon ken ya u Iserael kpaa ga.

²⁵ Gadia Mo M ngu TER; Me ôr kwagh, man kwagh u M kaa la una kure sha mi kpaa, una kera ngôôr ga; gadia we, ya u hendan kwagh, Me ôr kwagh sha ayange a en, man Me kure un kpaa, kape Ter AÔNDO A kaa ne.

²⁶ Tsô kwaghôron u TER shi va her a mo, er:

²⁷ Wan u or, nenge, mba ken ya u Iserael mba kaan er: Mpase u a nengen la, ka u sha ayange a ken hemen kpishi je, man ngu ôron kwaghôron u profeti sha ayange a ken hemen ca.

²⁸ Nahan yô, kaa a ve wer: Ter AÔNDO ngu kaan nahan er: Ma kwaghôron Wam môm tsô kpaa, una kera timbir ga; kwaghôron u Me ôr una kure sha mi, kape Ter AÔNDO A kaa ne.