Esekiel 10 - ICIGHAN BIBILO

¹ Tsô m kenger, man nenge, sha kwavaôndo u lu sha ityough ki ucerubi la, kwagh lu ve vegher u sha er ka iwen i safir nahan, mwe na lu er ka ikônough ki torough nahan.

² Man A ôr kwagh a or u a cir ikondo i pupuu iyol la, a kaa er: Nyôr ken atô u akaver a ningir fing fing la, ka shin ityô i cerubi je la, iv ave ou ahar cii a akausu a kpenger kpenger hen atô u ucerubi, tsenda a sha gar. Nahan a nyôr sha ashe am.

³ Ucerubi yô, tile hen iyou vegher u ken iyan, zum u or la za nyôr yô; ibeenegh gema iv sha tembe u her atô u iyou la.

⁴ Tsô iengem i TER mough sha cerubi kera, kar yem hen kpandehunda u iyou; nahan iyou la iv a ibeenegh, man tembe kpaa iv a iengem i icivir i TER.

⁵ I ungwa iov i akper a ucerubi zan zan hen tembe u ken won la, lu er ka imo i Aôndo u hemba agee cii zum u ka Una ôr kwagh yô.

⁶ Tsô zum u A kaa a or u a cir ikondo i pupuu iyol la, er: Tôô usu ken atô u akaver a ningir fing fing la, ken atô u ucerubi yô—a nyôr a za tile ikua a ikaver.

⁷ Tsô cerubi naregh uwegh nagh ker atô u ucerubi hen usu u u lu her atô u ucerubi la, a dugh u, a penda sha ave a or u a cir ikondo i pupuu iyol la, a maa a tôô u, a due.

⁸ Tsô i nenge a kwagh hen ucerubi lu er ka uwegh ku orough nahan, lu ker akper a ve.

⁹ Tsô m kenger, yô, nenge, akaver anyiin lu hen ucerubi mbala, ikaver môm hen cerubi môm, man ikaver ugen di hen cerubi ugen; man mluashe u akaver la lu er ka iwen i kerisoliti nahan.

¹⁰ Man sha inja i mlu u a yô, a anyiin cii, lu inja i môm, lu er ikaver ken atô u ikaver nahan.

¹¹ Zum u a zenden yô, a zaan sha avegher a anyiin la cii; a kahan shighe u a lu zenden la ga, kpa henpe ityough kia ver ishigh yô, ka heregh a dondo ki ye; zum u a zenden yô, a kahan ga.

¹² Iyol ve cii, ajime a ve, man ave a ve, man akper a ve, kua akaver, mgbough a ashe ningir tser, ka akaver a ve anyiin a ve lu a mi la.

¹³ Sha kwagh u akaver la yô, i yila iti sha ato am er: Ka akaver a ningir fing fing.

¹⁴ Hanmô ve lu a ishiv inyiin, ishigh ki hiihii lu ishigh ki cerubi, man ishigh ki sha uhar lu ishigh ki orough, man ki sha utar lu ishigh ki begha, man ki sha unyiin lu ishigh ki gafa.

¹⁵ Ucerubi kôndo sha; ka kwaghuma u lu m nenge hen kpeifi u Cebar je la.

¹⁶ Zum u ucerubi vea yemen yô, akaver di kpaa a yemen a ve imôngo ken ambusu; man zum u ucerubi vea kenden akper a ve sha, sha u moughon shin tar yô, akaver di kpaa a kera gema sha ambusu a ve kera ga.

¹⁷ Zum u vea tile yô, a kpaa a tile; man zum u vea mough yô, a kpaa a mough a ve imôngo; gadia jijingi u kwaghuma lu ken a.

¹⁸ Tsô iengem i TER mough hen kpandehunda u iyou va tile sha ucerubi.

¹⁹ Tsô ucerubi kende a kper a ve sha, ve mough shin tar kera, sha ashe am; er ve yemen yô, akaver kpaa lu a ve nongo; ve za tile hen ijiir i nyôron i hunda u iyou i TER u u lu vegher u sha ityoughkitaregh la; iengem i Aôndo u Iserael gema lu sha a ve vegher u sha.

²⁰ Ka kwaghuma u lu m nenge a mi ne, a lu Aôndo u Iserael vegher u shin hen ifi u Cebar la; man m kav er ve lu ucerubi yô.

²¹ Hanmô ve lu a ishiv inyiin man hanmô kpaa lu a akper anyiin; kwagh u lun er ave a or nahan gema lu ken akper a ve.

²² Man sha kwagh u mlu u ishiv vev yô, ka mbi m nenge a mi hen ifi u Cebar la, mluashe ve man ayol a ve kpaa, hanmô yem ken hemen jighilii.