Ekesodu 7 - ICIGHAN BIBILO

¹ Tsô TER kaa a Mose er: Nenge, M ver u, lu Farao er Aôndo nahan; anngôu Aron a̱ gema a̱ lu profeti wou.

² We, ú ôr hanma kwagh u M kaa u yô, man anngôu Aron a̱ gema a̱ ôr kwagh a Farao, a̱ de Mbaiserael ve̱ due ken tar na kera.

³ Mo Me cighir Farao ishima, Me er uivande Av man akaa a Am a kpilighyol aa ngee ken tar u Igipiti kpishi.

⁴ Kpa Farao una ungwa ne ga, Mo Me penda uwegh Agh sha Igipiti, Me due a akum a Am, ior Av Mbaiserael, ken tar u Igipiti kera, sha ajiraôron a vesen.

⁵ Mbaigipiti vea fa er Mo M lu TER yô, zum u Me naregh uwegh Agh sha Igipiti, Me due a Mbaiserael ken atô ve kera la.

⁶ Mose man Aron ve er, er TER kaa ve la, kape ve er je la.

⁷ Anyom a Mose lu akunduanyiin, a Aron gema lu anyom akunduanyiin kar atar, zum u ve lu ôron kwagh a Farao la.

⁸ TER ôr kwagh a Mose kua Aron, A kaa er:

⁹ Aluer Farao una ôr kwagh a ven er: Tese nen ikav i kpilighyol yôô; nahan we gema kaa a Aron wer: Gema gbough ough gbihi inya sha ishigh ki Farao, ku̱ hingir iyô.

¹⁰ Tsô Mose vea Aron ve za hen Farao, ve za er er TER kaa ve la vough; Aron gbihi gbough nagh inya sha ishigh ki Farao a mbatomov nav, ku hingir iyô.

¹¹ Tsô Farao yila mbafankwagh man mbaahiriv; ve mbaahiriv mba Igipiti kpaa ve er nahan sha ahir a ve.

¹² Hanmô ve gbihi gbough ku nan inya hingir iyô; kpa gbough ku Aron gema mena igbough vegh cii.

¹³ Kpa ishima i Farao cighir, a wa ve iko ga, er TER kaa yô.

¹⁴ TER kaa a Mose er: Ishima i Farao i cighir, a rumun er ior ve̱ yem ga.

¹⁵ Za hen Farao pepe, shighe u una zaan shin kpemnger la; za tile hen kpeifi u Nil sha er ú kohol un yô; kôr gbough ku ku hingir iyô la, ken uwegh ough;

¹⁶ kaa un wer: TER, Aôndo u Mbaheberu tindim her a we, A kaa er: De ior Av ve̱ yem, sha er vea za civir Mo ken desereti yô; man nenge zan zan hegen je kpaa u wa iko ga.

¹⁷ TER ngu kaan nahan er: Kwagh u ú fa min, er Mo M lu TER je yô, nenge, ka sha gbough ku ku lu sha uwegh agh kun me gbidye mngerem ma shin ifi ne maa gema maa hingir awambe ye.

¹⁸ Ishu i shin ifi ia kpe, ifi una huma; Mbaigipiti vea kanshio u man mngerem ma ifi u Nil.

¹⁹ TER shi kaa a Mose er: Kaa Aron wer: Tôô gbough ough, naregh uwegh ough sha mngerem ma Igipiti, sha uifi vev man sha mbaakpambamngerev vev man sha atungu a ve man sha ajiir a ve a mngerem ma kohol cii, ve̱ hingir awambe; á zua a awambe han han kpaa, ken tar u Igipiti cii, ken ikav mbi ikonov man mbi awenev kpaa.

²⁰ Mose vea Aron er er TER kaa nahan; a kende gbough, a gbidye mngerem ma shin ifi sha ashe a Farao kua mbatomov nav kpaa; mngerem ma shin ifi cii maa hingir awambe.

²¹ Ishu i shin ifi kpe; ifi huma je Mbaigipiti fatyô u man mngerem ma shin ifi ga; awambe ngohol ken tar u Igipiti cii.

²² Mbaahiriv mba Igipiti kpaa er nahan, sha ahir a ve; ishima i Farao cighir, a wa ve iko ga, er TER kaa yô,

²³ Farao hide yem ken ya na, kwagh ne kpaa a wa iko sha min ga.

²⁴ Mbaigipiti cii gba timen ahungwa hen kpeifi keren mngerem ma manem; gadia ve fatyô u man mngerem ma ifi ga.

²⁵ Tsô ayange kar ataankarahar er TER gbidye ifi la.