Ekesodu 5 - ICIGHAN BIBILO

¹ Ken masejime la, Mose man Aron ve za, ve za kaa a Farao er: TER, Aôndo u Iserael, kaa nahan er: De ior Av, ve̱ za, ve̱ za erem iniongo ken desereti.

² Kpa Farao kaa er: Ka an nan lu TER je, u me ungwa imo Na me de Iserael una yemee? M fa TER ga, man den yam Iserael mer, a̱ yem je ga.

³ Ve kaa er: Ka Aôndo u Mbaheberu je A va ande hen vese ye, ma u shi de se, ma se ze ken desereti, zende u tsan gbenda ayange atar, ma se za ne TER, Aôndo wase nagh; sha u A̱ de kera hee se angev mbu tsaren ga, shi A̱ de woo se sha sanker kpaa ga yô.

⁴ Tor u Igipiti kaa a ve er: We Mose man Aron! Ka nyi ne timbir ior tomo? Yem nen sha tom wen.

⁵ Farao shi kaa er: Nenge, ior mba ken inya ngee kpishi, man ka ne ka ve̱ de tom ve zee?

⁶ Sha iyange la je, Farao maa kaa a mbatorough a ior kua mbanengen sha mbatomov er:

⁷ Hii hegen je de kera naan ior hici er vea gbidye akam a mi er ngise nahan ga, ve̱ yem ve̱ za keren hici ayol a ve je.

⁸ Shi na ve iyenge i akamegh her er ngise nahan, de panden nen ma kwagh ga; gadia ve wa hwev yum, ka nahan man ve vaan ve kaan er: De se, se̱ za, se̱ za na Aôndo wase nagh ye.

⁹ I̱ seer ior mban tom tsung, ve nôngon a mi, ve̱ de kera veren ato sha akaaôron a aiegh ga.

¹⁰ Tsô mbatorough a ior kua mbanengen sha mbatomov mbala ve due ve za ôr ior, ve kaa er: Farao kaa nahan er: Me kera naan ne hici ga.

¹¹ Za nen ayol a en, gba za kuran nen hici han han tsô; tom wen kpa á pande u ga.

¹² Nahan ior samber ken tar u Igipiti cii u vea kura adenga a alakema a̱ hingir ve hici.

¹³ Mbatorough mbala gba torough a ve kaan er: Eren nen tom ayange ayange u̱ kuman vough er yan i naan ne hici la nahan.

¹⁴ I gba gbidyen mbanengen sha mbatomov mba Mbaiserael, mba mbatorough a ior, mba Farao, ve ver sha a ve la, i kaa a ve er: Ka nyi ne er tom wen u nyen man nyian u kom sha akam a ngise i ver ne er ne̱ gbiren la nahan ga?

¹⁵ Tsô mbanengen sha mbatomov, mba Mbaiserael, ve gba za vaan a Farao, kaan er: Ka nyi u eren a ikpan you nahana?

¹⁶ Mba kera ne ikpan you hici ga, tsô ka ve kaa a vese er: Gbire nen akam; man nenge, mba gbidyen ikpan you kpaa; kpa ibo yô, ka ior ou ve lu a mi ye.

¹⁷ Kpa a kaa er: Ka hwev, ne mba hwev yum! Ka nahan man ne kaan ner: De se, se̱ za, se̱ za na TER nagh ye.

¹⁸ Yô, yem za er nen tom; kpa hici yô, á naan ne ga, nahan kpaa né gbidye iyenge i akam la vough.

¹⁹ Tsô mbanengen sha mbatomov, mba Mbaiserael, kav er kwagh a tser ve yô; gadia i kaa a ve er: De kera panden nen akam a en a ayange ayange la ga.

²⁰ Tsô mba dugh hen Farao yô, ve kohol Mose vea Aron, tile lu keghen ve,

²¹ ve kaa a ve er: TER A̱ nenge sha a ven, A̱ ôr ijir; gadia ka ne je, ne ne, se dugh Farao ishima kua mbatomov nav kpaa; shi ne we ve sanker sha ikev ner, ve̱ wua se kpaa ye.

²² Tsô Mose hide hen TER kaa er: Tere! Ka nyi U er ican i tser ior mban nahana, shi ka nyi U tindim kpee?

²³ Gadia er m va hen Farao sha u ôron kwagh ken iti You je, tsô a hii u eren ior mban ican je, man U kera yima ior Ou kpaa ga.