Ekesodu 4 - ICIGHAN BIBILO

¹ Mose gema kaa er: Kpa nenge, vea nam jighjigh ga, man vea ver ato sha kwaghôron wam kpaa ga; gadia vea kaa er: TER ande hen a we ga.

² Tsô TER kaa a na er: Ka nyi u lu a mi sha uwe laa? A kaa er: Ka gbough.

³ A kaa er: Kende ku hen inya. A kende ku hen inya, ku hingir iyô; Mose yevese kar kera.

⁴ Tsô TER kaa a Mose er: Za uwegh, kôr i shin tsa; tsô a za uwegh a kôr i, i gema i hingir gbough ken ikev na;

⁵ sha u ve̱ na jighjigh er TER, Aôndo u uter vev, Aôndo u Aberaham man Aôndo u Isaka man Aôndo u Yakob, A ande hen a we yô.

⁶ TER shi kaa a na er: Za uwegh ough ken vanger wou. A za uwegh nagh ken vanger na; dughun ku yô, nenge, uwegh nagh gba imande, kungu segh segh er awombo yô.

⁷ A shi A kaa er: Shi za uwegh ough ken vanger wou. Tsô a shi a za uwegh nagh ken vanger na; dughun ku ken vanger na kera yô, nenge, ku hingir er alegh a na agen yô.

⁸ Man aluer vea na u jighjigh ga yô, man shi vea wa ivande i hiihii la iko ga yô, vea na ivande igen la jighjigh.

⁹ Man aluer uivande mba uhar mban kpaa vea na jighjigh ga man vea ungwa imo you kpaa ga yô, kese mngerem shin ifi u Nil, haa hen inya; tsô mngerem ma u kese shin ifi la maa hingir awambe hen inya.

¹⁰ Tsô Mose kaa a TER er: Tere, mo m ngu or u fan kwaghôron ga, ngise kpaa ga, shin hegen er U er kwagh a wanakiriki Wou ne kpaa ze; gadia kwaghôron eren mo ican, nombor kpa yuhwam.

¹¹ TER kaa a na er: Ka an nan er or zwa? Ka an nan er orkondoniker, shin orkondonato, shin ornengen, shin orapirashee? Ka Mo TER gaa?

¹² Nahan yô, gba zan tsô, Mo Me lu a zwa wou imôngo, Me tesen we kwagh u ú ôr yô.

¹³ A kaa er: Ku, Tere, ma U shi tindi orgen.

¹⁴ Nahan ishima nyoon TER a Mose, A kaa er: Aron anngôu, Orlevi, ngu her gaa? M fa, a fa kwaghôron dedoo. Nenge, ngu van sha u va keghen we gbenda; zum u una nenge a we yô, a doo un ken ishima.

¹⁵ Ú ôron kwagh a na, ú waan un akaaôron ken zwa. Mo Me lu a zwa wou imôngo man zwa na kpaa, Me tesen ne kwagh u né er yô.

¹⁶ Una hingir we or u lun a imo hen ior; man una hingir zwa wou, we ú gema ú hingir un er Aôndo nahan.

¹⁷ Kôr gbough kun sha uwe, ku ú za eren uivande a mi yô.

¹⁸ Tsô Mose mough hide hen ter na kem, Yetero, va kaa a na er: Shi nam gbenda, m̱ za hen anngôôv av mba ve lu ken Igipiti, m̱ za nenge, shin mba uma her kpaou? Yetero kaa a Mose er: Za dedoo.

¹⁹ TER kaa a Mose ken Midian er: Hire yem ken Igipiti, gadia ior mba ve lu keren we a ku la cii, ve kpe.

²⁰ Tsô Mose kua a kwase na man ônov nav, penda ve sha jaki hide ken tar u Igipiti; Mose lu a gbough ku Aôndo ken uwe.

²¹ TER kaa a Mose er: Zum u ú hide ken Igipiti yô, ver ishima, akaakpilighyol a M ne sha ikev you cii, er a sha ishigh ki Farao; kpa Mo Me cighir un ishima, sha er a̱ de pasen ior Av ve̱ yemen ga yô.

²² Man kaa a Farao wer: TER kaa nahan er: Iserael ka wan Wam u iunda je.

²³ M kaa u mer: De wan Wam a̱ za, a̱ za civir Mo; kpa u venda wer a̱ de ze ga. Yô, Me wua wan wou u iunda.

²⁴ Tsô sha gbenda, hen ijiir i tsan la, TER va kohol un her, gba nôngon u wuan un.

²⁵ Tsô Shipora tôô iwen i esen, tôndo ipusu i wan na, kende shin angahar na, kaa er: Mimi je, u ngum orkwasehe u awambe.

²⁶ Tsô A de un. Nahan kwase la kaa er: Orkwasehe u awambe; sha ci u icôngo la.

²⁷ Shi TER kaa a Aron er: Za ken desereti, za kegh Mose gbenda; tsô a za, a za kohol un hen uwo u Aôndo, a suse un zwa.

²⁸ Mose ôr Aron akaaôron a TER tindi un a mi cii, man uivande mba A wa un sha ikev cii.

²⁹ Nahan Mose vea Aron ve gba yemen, ve za yila mbatamen mba Iserael cii, va kohol;

³⁰ Aron ôr akaaôron a TER A er Mose cii, shi a er uivande sha ishigh ki iorov kpaa.

³¹ Ior na jighjigh; man zum u ve ungwa er TER A va ser Mbaiserael, A nenge ican ve kpaa yô, ve gema ve kuma ityouv inya, ve wuese.