Ekesodu 39 - ICIGHAN BIBILO

¹ Akondo a kwel man a nyian dindee man a nyian bong la, ve gema ve kor akondo a tsembelee a mi, a eren tom a mi ken icighanjiir, shi ve er Aron uicighanmbaakondov kpaa, er TER kaa Mose nahan.

² Shi a er efodi sha zenaria man ikondo i kwel man i nyian dindee man i nyian bong man ikondo i pupuu i kôngor i sha mou u sendan.

³ Ve var zenaria hingir par par, ve ov un hingir kor u iyôô, sha u eren tom a mi sha ikondo i kwel man i nyian dindee man i nyian bong kua sha ikondo i pupuu i kôngor; lu tom u orfaneev je.

⁴ Ve er un abamber ahar a sha avande sha u zuan un; ka sha akur a na ahar i zua un ye.

⁵ Tsar na u zeren un a mi u a lu sha mi la, lu kwagh môm a na, shi lu inja i môm a na, sha ikondo i kwel man i nyian dindee man i nyian bong man ikondo i pupuu i kôngor i sha mou u sendan, er TER kaa Mose nahan.

⁶ Shi ve sôr awen a oniki a i wa a agbende a zenaria ken ijime, i gber ati a ônov mba Iserael sha mi, er ka i nger ikav sha kwagh nahan.

⁷ A var a sha abamber a sha avande a efodi la, sha er a̱ lu awen a umbur Mbaiserael a mi; er TER kaa Mose nahan.

⁸ A shi a er ikpa i sha vanger, lu tom u orfaneev je, er tom u efodi nahan, sha zenaria man ikondo i kwel man i nyian dindee man i nyian bong man ikondo i pupuu i kôngor i sha mou u sendan.

⁹ I lu a ambusu anyiin akuku; ve er ikpa i sha vanger kpa uhar; iniembe i i kuma abe môm, igbanger na kpaa kuma abe môm, lu kpa uhar.

¹⁰ Ve var awen iniongo inyiin sha mi, nongo u sardiu man topashi kua karbunkel, ka nongo u hiihii je la.

¹¹ Nongo u sha uhar yô, lu emeraldi man safir kua diamondi.

¹² Nongo u sha utar yô, lu hiakinto man agati kua ametise.

¹³ Nongo u sha unyiin yô, lu beril man oniki kua yasepi; a lu ken agbende a zenaria sha ajiir a i var a la.

¹⁴ Awen la, lu pue kar ahar sha ati a ônov mba Iserael, sha ati a ve ser ser, er ka i gber ikav sha kwagh nahan, hanmô lu a iti i i, a lu sha ci u ikwe i pue kar ihiar la.

¹⁵ Ve er ikpa i sha vanger la mshirim er ikar i i ishir i, sha zenaria u wang je.

¹⁶ Shi ve er agbende a zenaria ahar kua ikunya ihiar i zenaria, ve wa ikunya ihiar la sha azongo a ahar a ikpa i sha vanger la.

¹⁷ Ve ta mshirim ma mhar ma i ishir ma sha zenaria mara sha ikunya ihiar i sha azongo a ikpa i sha vanger la.

¹⁸ Ijô ihiar igen i mshirim ma mhar mara ve zer i sha agbende a ahar la, ve var a sha abamber a sha avande a efodi vegher u ken ishi la.

¹⁹ Ve er ikunya i zenaria ihiar, ve wa i sha azongo a ahar a ikpa i sha vanger la, sha kur u kimi vegher u a lian ken efodi la.

²⁰ Shi ve er ikunya i zenaria ihiar ve zer i sha abamber a sha avande a ahar a efodi vegher u shin, ken ishigh nagh, hen ijiir i i zough un la, i gbihi tsar u efodi la shin.

²¹ Ve zer ikpa i sha vanger la sha efodi, ve ta ikunya i i ikar i kwel, ve zer i sha ikunya i efodi la, i tema i gbihi tsar u efodi la shin, sha er ikpa la ia kera bugh sha efodi kera ga yô, er TER kaa Mose nahan.

²² Shi a er togo u efodi, a tume a tume un, lu kwel cii;

²³ mon na lu hen atô jighjigh er ka mon u riga u utya yô, man i wa mon la tsar, i guu u, i yisa, sha er ua ande ga yô.

²⁴ Ve er anzôr a sha ikondo i kwel man i nyian dindee man i nyian bong i sha mon u sendan sha mka u togo.

²⁵ Shi ve er anmemem sha zenaria u wang, ve zer anmemem mara hen uharegh mba anzôr a a kase mka u togo la, ningir tser,

²⁶ animem man shi injôr man shi animem man injôr, sha mka u togo la ningir tser, sha u eren tom mi, er TER kaa Mose nahan.

²⁷ Shi ve kor uriga sha ikondo i pupuu i kôngor i i tum a tume i yô, sha ci u Aron a ônov nav.

²⁸ Man atsar a sha ityou a sha ikondo i pupuu i kôngor, man ader a dedoo sha ikondo i pupuu i kôngor kua afo a sha ikondo i pupuu i kôngor i sha mou u sendan,

²⁹ man tsar u shin iwenge u sha ikondo i pupuu i kôngor i sha mou u sendan man ikondo i kwel man i nyian dindee man i nyian bong, lu tom u or u tumen akondo sha hwe; er TER kaa Mose nahan.

³⁰ Shi ve er kpande u icighantsar la sha zenaria u wang, ve nger sha mi er ka i gber ikav sha kwagh nahan, er: I TSEGHA UN SHA CI U TER.

³¹ Ve ta u kwar u kwel sha u zeren u sha atsar a sha ityou la; er TER kaa Mose nahan.

³² Kape i kure tom u tabernakel u tenti u kohol ker la cii; Mbaiserael er er TER kaa Mose nahan vough, kape ve er la.

³³ Tsô ve va na Mose tabernakel la, tenti kua ikav nav cii, uiwever nav man mtôm nam ma ipeem man itiran na man mtôm nam man agbur a na;

³⁴ man kwagh u cirin u i er sha akôv a anomaiyôngo a i nyian a yô, man kwagh u cirin u i er sha akôv a ayu, man ikondo i yisan;

³⁵ man areki u shiada a igbough nav, man ijiir i nan iwom,

³⁶ man tebul a ikav nav cii, man ubredi mba sha ishi;

³⁷ man daarimenger u wang a amenger a na, ka amenger a sôron a, pendan a sha mi la, man ikav nav cii, kua mkurem sha ci u tsaren,

³⁸ man atse a zenaria man mkurem ma shighen man kwaghhumandoon u nanden man kwagh u yisan hunda u tenti mi;

³⁹ man atse a togula man kperiyôô u a u togula man igbough mbi a kua ikav mbi a cii man tasa a ityô na,

⁴⁰ man akondo a yisan a tembe man mtôm ma u, kua agbur a u man kwaghyisan hunda u tembe man ikor i u, kua amande a u man ikav mbi eren tom a mi ken tabernakel u tenti u kohol ker la cii,

⁴¹ man akondo a i kor a tsembelee a eren tom a mi ken icighanjiir man uicighanmbaakondov mba pristi Aron la, kua akondo a ônov nav, a eren tom u pristi mi la.

⁴² Er TER kaa Mose nahan, kape Mbaiserael kure tom la cii, la.

⁴³ Mose nenge tom la cii ve er u er TER kaa nahan; kape ve er u je la; tsô Mose ver ve doo doo.