Ekesodu 38 - ICIGHAN BIBILO

¹ Shi a er atse a nanden nagh sha kon u saa, iniembe i a lu aseva ataan, igbanger i a kpaa aseva ataan; lu a ambusu anyiin akuku, ityaven i a lu aseva atar.

² Man a er akor a a sha azongo a a anyiin; akor a a la, lu kwagh môm a a, ijoron lu ga; a cir a togula iyol.

³ A er ikav mbi atse la cii: ityev man indyuhar man utasa man iyôv mbi dughun inyam a mi man ugbande mba tôôn usu a mi; ikav mbi a cii a er sha togula.

⁴ A er kperiyôô sha ci u atse la, sha togula, shin tsembe u atse vegher u shin la, va saa hen atô u a.

⁵ A haa ahye anyiin sha azongo a anyiin a kperiyôô u togula la, lu ajiir a igbough la.

⁶ A gba igbough sha kon u saa, a cir mbi togula iyol.

⁷ A shindi igbough mbila ken ahye a ken ambusu a atsegh la, sha u tôôn a mi; a er a sha ikpande, lu a ho kimi.

⁸ Shi a er tasa u togula a ityô na sha ajingi a kasev mba ve lu eren tom hen hunda u tenti u kohol ker yô.

⁹ Shi a er kwa u kasen tembe a mi vegher u imbusutariyan ken ian i imbusutariyan la; akondo a kasen tembe la lu ikondo i kôngor i sha mou u sendan, lihe kuma aseva akunduataan;

¹⁰ mtôm lu ikundu man agbur a togula a ma kpaa lu ikundu; uiwever mba mtôm mara kua ahye a ma la ve lu mba azurfa.

¹¹ Vegher u imbusutarimese kpaa lu aseva akunduataan; mtôm lu ikundu, agbur a togula a ma kpaa lu ikundu; uiwever mba mtôm mara kua ahye a ma la, ve lu mba azurfa.

¹² Vegher u shin ityôtar yô, akondo a kasen lu aseva akunduahargber, mtôm lu pue, agbur a ma kpaa lu pue; uiwever mba mtôm kua ahye a ma la ve lu mba azurfa.

¹³ Vegher u sha ityoughkitaregh hen ian i ityoughkitaregh kpaa lu aseva akunduahargber.

¹⁴ Akondo a kasen vegher môm lu aseva pue kar ataan, mtôm lu mtar, agbur a ma kpaa lu atar;

¹⁵ vegher ugen la kpaa, hanma vegher u hunda u tembe, akondo a kasen lu aseva pue kar ataan, mtôm lu mtar man agbur a ma kpaa lu atar.

¹⁶ Akondo a kasen tembe a mi cii lu akondo a pupuu a kôngor a sha mou u sendan.

¹⁷ Agbur a mtôm lu a togula; uiwever mba mtôm kua ahye a ma la, lu mba azurfa; sha ityouv mbi ma la kpaa, i cir mbi azurfa; mtôm ma tembe cii lu a ahye a azurfa.

¹⁸ Kwaghyisan hunda u tembe lu tom u orfan u eren hwe sha akaa, lu ikondo i kwel man i nyian dindee man i nyian bong man ikondo i pupuu i kôngor i sha mou u sendan; iniembe na lu aseva ikundu, ityaven na, ka igbangese i ikondo je la, lu aseva ataan, vough er akondo a i kasen tembe mi la nahan.

¹⁹ Mtôm nam lu mnyiin, agbur a ma kpaa lu anyiin a togula; uiwever mba ma lu azurfa; kwagh u cirin ma sha ityouv kua ahye a ma kpaa lu azurfa.

²⁰ Amande a tabernakel kua a tembe u i kase la cii, lu a togula.

²¹ Inyaregh ki i er tabernakel a min ne, ka tabernakel u shiada la, er i ôr iyenge i ki sha imo i Mose yô, lu Mbalevi ve ôr ki sha ikev i Itamar wan u pristi Aron ye.

²² Besalel wan u Uri, wan u Hur u ken tsombor u Yuda er akaa cii a TER kaa Mose er a̱ er yô,

²³ un vea Oholiabi wan u Ahisamaki u ken tsombor u Dan, or u gban akaa, u fan u eren tom u sha uee man u tumen akondo sha hwe, a kwel man a nyian dindee man a nyian bong man akondo a pupuu a kôngor.

²⁴ Zenaria u i er tom a mi cii, sha tom u icighanjiir la cii, lu zenaria u i na nagh a mi yô, kuma utalenti ikundu kar utaankarunyiin man ushekel deri utaankaruhar man ikundugber, lu ushekel mba icighanjiir.

²⁵ Azurfa u ior mba i ôr iyenge ve ken mkohol u ior la yô, kuma utalenti deri man ushekel dubu man deri utaankaruhar man akunduatargber kar utaan, lu ushekel mba icighanjiir;

²⁶ beka môm, ka vegher u shekel je la, lu shekel u icighanjiir, sha ci u hanma or u nan kar nan za kohol mba i er iyenge ve la, hii sha mba ve kom anyom ikundu man mba ve hembe nahan kpaa, nahan ka ior dubu deri ataratar man dubu utar man deri utaan man akunduahargber.

²⁷ Utalenti mba azurfa deri la lu sha ci u haan agbur a icighanjiir kua agbur a kwaghyisan la a mi; utalenti deri kuma agbur deri; talenti môm kuma igbur i môm.

²⁸ Ushekel mba dubu môm man deri utaankaruhar man akunduatargber kar utaan la yô, a er uiwever a mi sha ci u mtôm mara, shi a cir ityouv mbi ma man a wa ahye sha ma kpaa.

²⁹ Man togula u i na nagh a mi yô, kuma utalenti akunduatargber man ushekel dubu uhar man deri unyiin.

³⁰ A er agbur a hunda u tenti u kohol ker la, a mi, man atse a togula kua kperiyôô u togula u a la, man ikav mbi atse cii,

³¹ man agbur a a kase tembe la ningir tser, man agbur a hunda u tembe man amande a tabernakel cii, kua amande la cii a a kase tembe la ningir tser.