Ekesodu 37 - ICIGHAN BIBILO

¹ Besalel er areki sha kon u saa, iniembe na lu aseva ahar cir tiôn, igbangese na lu ishiva i môm cir tiôn, ityaven na kpaa lu ishiva i môm cir tiôn.

² A cir un zenaria u wang iyol kimi kua ken won kpaa, a kase un tsar u zenaria ningir tser.

³ A haa un ahye a zenaria anyiin shin angahar a na a anyiin la; vegher keen ahye ahar shi vegher keen kpaa ahye ahar.

⁴ A gba igbough sha kon u saa, a cir mbi zenaria iyol.

⁵ A shindi igbough mbila ken ahye a ken ambusu a areki la, sha u tôôn areki a mi.

⁶ A er ijiir i nan iwom her sha zenaria, iniembe na lu aseva ahar cir tiôn, igbangese na lu ishiva i môm cir tiôn.

⁷ A er ucerubi uhar sha zenaria, a var a var ve sha akur ahar a ijiir i nan iwom her la,

⁸ cerubi u môm ken kur ne, cerubi u môm ken kur ne; a er ucerubi mbala lu kwagh môm a ijiir i nan iwom her la, sha akur a i ahar la, ijoron lu ga.

⁹ Ucerubi mbala naregh akper a ve sha, cir ijiir i nan iwom her la sha akper a ve, man ve zua ishiv ayol a ve; ishiv mbi ucerubi mbila kenger ijiir i nan iwom her la.

¹⁰ A er tebul sha kon u saa, iniembe na lu aseva ahar, igbangese na ishiva i môm, ityaven na ishiva i môm cir tiôn;

¹¹ a cir un zenaria u wang iyol, a kase un tsar u zenaria a ningir a tser.

¹² A kase un kpande u ken ambusu na, igbangese er ikevwe nahan, a kase tsar u zenaria sha kpande la ningir tser.

¹³ A haa un ahye a zenaria anyiin, a wa ahye la sha azongo anyiin a sha angahar a na a anyiin la,

¹⁴ ahye la lu ikua ikua a kpande la; ka ajiir a igbough mbi tôôn tebul a mi je la.

¹⁵ A gba igbough mbila sha kon u saa, a cir mbi zenaria iyol, sha u tôôn tebul a mi.

¹⁶ Shi a er ikav mbi tebul, utasa nav man agbande a na man ayongo na kua ugber nav mba haan kwagh a mi, lu zenaria u wang cii.

¹⁷ A er daarimenger sha zenaria u wang, a var a var daarimenger la, ityô na man gôngor na man angbandev nav man adôôr a na man uimondon nav, ve lu kwagh môm a na, ijoron lu ga.

¹⁸ A lu a agbaa ataratar, due ken ambusu a na; agbaa a daarimenger atar ken imbusu ingin, shi agbaa a daarimenger atar ken imbusu ingin;

¹⁹ angbandev utar er uikparen mba amondi nahan sha gbaa môm, idyôôrough kua imondon; man angbandev utar kpaa er uikparen mba amondi nahan sha gbaa ugen, idyôôrough kua imondon; kape agbaa a ataratar a a dugh ken daarimenger la lu la.

²⁰ Daarimenger la iyol na kpaa lu a angbandev unyiin er uikparen mba amondi nahan, a adôôr kua uimondon;

²¹ idyôôrough môm shin agbaa ahar a a zer ken na, shi idyôôrough i môm shin agbaa ahar a a zer ken na, shi idyôôrough i môm shin agbaa ahar a a zer ken na, sha agbaa a ataratar a a dugh sha daarimenger la cii.

²² Adôôr a ve man agbaa a ve, lu kwagh môm a na, ijoron lu ga; un jimin cii i var un a var sha zenaria u wang.

²³ A er amenger a na a ataankarahar man akambe a na man utasa nav mba kuran il mi, sha zenaria u wang.

²⁴ Ka sha zenaria u wang u a kuma talenti môm a er un kua ikav nav cii kpaa ye.

²⁵ Shi a er atse a nanden kwaghhumandoon sha mi, sha kon u saa, iniembe i a lu ishiva i môm, igbanger i a kpaa lu ishiva i môm, lu a ambusu anyiin akuku, ityaven i a lu aseva ahar; akor a a, lu kwagh môm a a, ijoron lu ga.

²⁶ A cir a zenaria u wang iyol, tembe u a man ambusu a a ningir tser, kua akor a a kpaa; a kase a tsar u zenaria, a ningir a tser.

²⁷ A shi a er ahye a zenaria ahar shin kur u tsar u a kase a la, sha azongo a a sha ambusu a a ahar la, lu ajiir a igbough mbi tôôn a.

²⁸ Shi a er igbough mbila sha kon u saa, a cir mbi zenaria iyol.

²⁹ A er icighanmkure u shighen man kwaghhumandoon u wang u nanden la, sha ilyôghonov mbi dedoo, lu tom u orfan u eren kwaghhumandoon je.