Ekesodu 35 - ICIGHAN BIBILO

¹ Tsô Mose kohol mkohol u Mbaiserael cii, kaa a ve er: Ka akaaôron a TER A kaa ne, er ne̱ eren a ne:

² I̱ eren tom ayange ataratar, kpa iyange i ataankarahar la yô, i̱ lu ne icighanyange i memen i civir TER; hanma or u nana er nyityôtom sha i yô, i̱ wua nan.

³ Ken uya enev cii, de keer nen usu sha iyange i memen ga.

⁴ Tsô Mose ôr kwagh a mkohol u Mbaiserael cii, kaa er: Ka kwagh u TER A kaa er né er un ne:

⁵ Tsuwa nen nagh ken akaa a en, sha u nan TER; hanma or u i doo nan u nan yô, nana̱ va a mi, ka nagh ku á na TER ne: zenaria man azurfa man togula

⁶ man ikondo i kwel man i nyian dindee man i nyian bong man ikondo i pupuu i kôngor man aive a ivo

⁷ man akôv a anomaiyôngo a i nyian a yô, man akôv a ayu man ikon i saa,

⁸ man mkurem sha ci u tsaren, man ilyôghonov sha ci u mkurem ma shighen, kua kwaghhumandoon u nanden nagh a mi kpaa,

⁹ man awen a oniki man shi awen a varen sha efodi kua sha ikpa i sha vanger kpaa.

¹⁰ Hanma orfaneev ken a ven nana̱ va er hanma kwagh u TER A kaa yô;

¹¹ tabernakel man tenti na man ikondo i sanen un a mi, man uiwever nav, man mtôm nam ma ipeem, man itiran na, man mtôm nam, man agbur a na;

¹² areki man igbough nav man ijiir i nan iwom la man ikondo i yisan;

¹³ tebul man igbough nav kua ikav nav cii man ubredi mba sha ishi;

¹⁴ man daarimenger sha ci u tan iwanger, a ikav nav man amenger a na, kua mkurem sha ci u tsaren iwanger;

¹⁵ man atse a nanden kwaghhumandoon sha mi a igbough mbi a, man mkurem ma shighen, man kwaghhumandoon u nanden nagh a mi, man ikondo i yisan hunda u tabernakel;

¹⁶ man atse a nanden nagh sha mi, a kperiyôô u togula u a man igbough mbi a, man ikav mbi a cii, man tasa u ôôn iyol a ityô na;

¹⁷ man akondo a kasen tembe la, man mtôm ma a kua agbur a ma, man ikondo i yisan hunda u tembe la;

¹⁸ man amande a tabernakel man amande a tembe kua ikor i a;

¹⁹ man akondo a i kor a tsembelee a eren tom a mi ken icighanjiir yô, man uicighanmbaakondov sha ci u pristi Aron, kua akondo a ônov nav a eren tom u pristi a mi.

²⁰ Tsô mkohol u Mbaiserael cii hembe hen ishigh ki Mose kera.

²¹ Nahan hanma or u ishima i tor nan ityô man hanma or u jijingi u nan a mgbegh nan yô, ve va a nagh ku TER sha ci u tom u tenti u kohol ker la, man sha ci u ityom i keregh cii, man sha ci u uicighanmbaakondov.

²² Ve va nomso man kasev, hanmôv mba asema a doo ve, ve va a akaa a hweegh a sha vanger man inyarev mbi wan ken ato man ikunya i lun a akav man akaahweegh a zeren sha iker, lu akaa a sha zenaria cii. Hanma or u nan lu a nagh ku zenaria ku nan TER,

²³ man shi hanma or u nan lu a ikondo i kwel man i nyian dindee man i nyian bong, man ikondo i pupuu i kôngor man aive a ivo man akôv a anomaiyôngo a i nyian a man akôv a ayu yô, nan va a mi.

²⁴ Hanma or u i lu nan ka nan nagh ku azurfa shin ku togula yô, nan va a nagh ku TER; man hanma or u nan lu a kon u saa sha ci u eren hanma tom a mi yô, nan va a mi.

²⁵ Kasev mba fan eev cii kpaa ve ta mou sha ave ve, ve va a u ve te la; ikondo i kwel, man i nyian dindee man i nyian bong man ikondo i pupuu i kôngor.

²⁶ Man kasev mba fan eev cii mba asema a mgbegh ve, ve ta aive a ivo.

²⁷ Mbavesen va a awen a oniki, man awen a varen sha efodi kua sha ikpa i sha vanger;

²⁸ man ilyôghonov kua mkurem sha ci u tsaren, man mkurem ma shighen, kua kwaghhumandoon u nanden nagh a mi la.

²⁹ Mbaiserael na TER nagh sha ishima i dedoo, hanma nomsoor man hanma kwase mba asema a mgbegh ve u van a kwagh sha ci u tom u TER A kaa a Mose er i̱ er a la cii yô; Mbaiserael na TER nagh sha mi sha asema a dedoo.

³⁰ Tsô Mose kaa a Mbaiserael er: Nenge, Besalel wan u Uri wan u Hur u ken tsombor u Yuda, TER yila un sha iti je;

³¹ A iv un a Jijingi u Aôndo, a kwaghfan man mkav man sha u eren hanma injatom cii;

³² u dughun mbamfe sha uee sha u eren tom sha zenaria man azurfa man togula,

³³ man u kuan awen a varen sha akaa man u ngeren ikon, u eren hanma injatom i sha uee cii.

³⁴ A shi A wa un ishima i tesen kwagh, un vea Oholiabi wan u Ahisamaki, u ken tsombor u Dan.

³⁵ Ka ve, A iv ve a kwaghfan ken ishima u vea er hanma injatom, u gban akaa man u eren tom u sha uee, man u eren tom u hweegh sha akondo a kwel man a nyian dindee man a nyian bong man sha ikondo i pupuu i kôngor, man u tumen akondo; ka mba ve eren hanma injatom, man mbadughun mbamfe sha uee.