Ekesodu 34 - ICIGHAN BIBILO

¹ Tsô TER kaa a Mose er: Er ikpande i awen ihiar, i̱ lu er i tsuaa la nahan; ikpande la, Me nger akaaôron sha mi a a lu sha ikpande i tsuaa i u hembe i la.

² Wa ago iyol sha use; pepe nahan unde sha uwo u Senai, za za tile her a Mo sha ityough ki uwoogh.

³ Or môm nana̱ de undu a we ga, uwo la cii kpaa i̱ de nengen a ma or sha u ga; ilev mbi kiriki man abua kpaa ve̱ de ye toho ikua ikua a uwo ne ga.

⁴ Nahan a er ikpande i awen ihiar er i tsuaa la nahan; tsô Mose mough pepe, unde sha uwo u Senai er TER kaa un nahan, a kôr ikpande i awen ihiar la sha uwegh nagh.

⁵ Tsô TER sen ken ibeen va tile a na heregh, A yôô iti i TER.

⁶ TER kar sha ishigh nagh gba yôôn er: TERE, TERE, Aôndo u mgboughon a mhôônom ma zungwen kua mrumun u sha mhôôn, u wan ishima man u lun a erdoo man mimi wuee je,

⁷ u eren a ior udubu imôngo dedoo, u deen ifer man tindi u peren man isholibo; kpa u tsahan yô, deen ga, tsahan ônov sha ci u ifer i uter kua ônov mba ônov kpaa, zan zan kov u sha utar man shi u sha unyiin kpaa.

⁸ Tsô Mose gure fese, wa ityough inya.

⁹ A kaa er: TERE, aluer doo U a mo yô, TER ma A ze a vese imôngo, gadia ka ior i taver ityough yum; de se ifer yase man isholibo yase kpaa, ngohol se, se̱ lu dyako Wou.

¹⁰ Tsô A kaa er: Nenge, yan Yam ikur ne, Me er akaakpilighyol sha ishigh ki ior ou, inja i mayange je i lu a er sha won je ga yô, shin hen hanma ikurior kpaa ga; ior mba u lu hen atô ve cii vea nenge a tom u TER; gadia kwagh u M lu eren a we ne, ka kwagh u cieryol je.

¹¹ Ver ishima sha kwagh u M we u nyian ne; nenge, M zenda Mbaamor sha ishigh you kera kua Mbakanaan man Mbahiti man Mbaperishi man Mbahivi man Mbayebushi kpaa.

¹² Ver ishima, de ye ikur a mba ve tem ken tar u, ú za nyôr ker la, ve̱ hôn u ga.

¹³ Kpa yôhôl atse a ve a nanden nagh sha mi kera, hembe mtôm vem ma awenem, shi gber mtôm vem ma ikonom kera kpaa.

¹⁴ We yô, de gur ma aôndo ugen kposo inya ga; gayô TER u i yer Un er iwuhe la, ka Aôndo u iwuhegh je.

¹⁵ De ye ikur a ior mba ken tar la je ga, gadia zum u vea eren idya sha u dondon mbaaôndo vev, shi nan mbaaôndo vev nagh kpaa yô, vea lôhô u, we kpaa ú za ya nagh vegh kura;

¹⁶ shi ú er ônov vev mba kasev ú na ônov ou mba nomso kpaa; nahan ônov vev mba kasev mbala zum u vea eren idya sha u dondon mbaaôndo vev yô, vea na ônov ou mba nomso kpaa vea er idya sha u dondon mbaaôndo vev mbala.

¹⁷ De eren mbaaôndo mba keren a ker ga.

¹⁸ Eren nen iniongo i bredi u i we kwa sha mi ga la. Ayange ataankarahar cii, ú ya bredi u i we kwa sha mi ga yô, er M kaa u yô, sha shighe u i ver, sha uwer u Abiba la; gadia ka sha uwer u Abiba la, u due ken Igipiti ye.

¹⁹ Mba ve hii duen ken uya cii ka mba Av je, anomauile a ou cii, ônovmbaiundav mba ibuav kua mba iyôngov.

²⁰ Kpa waniunda u jaki yô, paa un sha waniyôngo; man aluer wea paa un ga yô, sombo un mon. Ônovmbaiundav ou mba nomso cii, paa ve. Ma or nana̱ de ve sha ishigh Yagh aveve ga.

²¹ Er tom ayange ataratar, kpa sha iyange i ataankarahar la yô, ú mem; sha shighe u kahan sule man shighe u sundan la kpaa, ú mem.

²² Eren nen iniongo i ulahadi la, ka iyiav mbi tsutswav mbi alakema je la, man iniongo i kurun a iyiav kpaa, sha mkur u inyom la.

²³ Hanma inyom, nomsombaiorov ou cii, ve̱ va sha ishigh ki ter AÔNDO, Aôndo u Iserael, kwa tar je.

²⁴ Gadia Me zenda akuraior sha ishigh you kera, shi Me er tar wou u̱ gbanger kpaa; ma or nana tôm tar wou zum u ú zaan hen ishigh ki TER, Aôndo wou, hanma inyom kwa tar la ga.

²⁵ De senge awambe a nagh Agh a kwagh u i we kwa sha mi imôngo ga; shi nagh ku iniongo i Paseka ku̱ de luun her zan zan sev mbu̱ aven ga.

²⁶ Iyiav mbi tsutswav mbi hemban doon mbi ken sule wou, ú za a mi ken iyou i TER, Aôndo wou. De jiir wanivo sha atumba a ngô na ga.

²⁷ TER shi kaa a Mose er: Nger akaaôron ne; gadia ka sha akaaôron ne M ya ikur a we kua Iserael kpaa ye.

²⁸ A lu her, a TER imôngo ayange akunduahar man aime akunduahar; a ya kwagh ga, mngerem tsô kpaa, a ma ga. Nahan a nger akaaôron a ikuryan la sha ikpande, ka Akaaôron a pue je la.

²⁹ Tsô Mose hungwa sha uwo u Senai, ikpande i shiada ihiar lu un sha uwe zum u a hungwa sha uwo la; Mose fa er kwav u ishigh nagh u engem ga, sha er a lu ôron kwagh a Na yô.

³⁰ Zum u Aron man Mbaiserael cii nenge a Mose yô, kwav u ishigh nagh engem, nahan ve cia u mgbôghom a na.

³¹ Tsô Mose yila ve; nahan Aron kua mbavesen mba mkohol u ior cii ve hire hen na; tsô Mose gba ôron kwagh a ve.

³² Ken masejime la, Mbaiserael cii kporom, a gema a wa ve kwagh sha akaa a TER A er un sha uwo u Senai la cii.

³³ Tsô zum u Mose mem kwaghôron a ve yô, a cir ikondo sha ishi.

³⁴ Kpa zum u Mose una nyôron hen ishigh ki TER u ôron kwagh a Na yô, a bugh ikondo i yisan la kera zan zan a kar duen; una duen yô, a za ôr Mbaiserael kwagh u i kaa un la.

³⁵ Mbaiserael vea nengen ishigh ki Mose, er kwavshi u Mose u lu engem yô, Mose a shi a cir ikondo sha ishi zan zan saa shi una nyôron u ôron kwagh a Na.