Ekesodu 31 - ICIGHAN BIBILO

¹ Tsô TER ôr kwagh a Mose, kaa er:

² Nenge, M yila Besalel wan u Uri wan u Hur u ken kwe u Yuda, sha iti na je;

³ M iv un a Jijingi u Aôndo, sha kwaghfan man mkav man sha u eren hanma injatom cii,

⁴ sha u dughun mbamfe sha uee, sha u eren tom sha zenaria man azurfa man togula,

⁵ man u kuan awen a varen sha akaa man u ngeren ikon, u eren hanma injatom cii.

⁶ Nenge, M ver Oholiabi, wan u Ahisamaki u ken kwe u Dan a na imôngo; shi M na kwaghfan ken asema a mba ve lu a mfe cii, sha er vea er akaa a M kaa cii yô;

⁷ ka tenti u kohol ker la, man areki u shiada man ijiir i nan iwom, i i lu sha mi la, man ikav mbi tabernakel cii,

⁸ man tebul a ikav nav, man daarimenger u wang a ikav nav cii, man atse a nanden kwaghhumandoon sha mi kpaa,

⁹ man atse a nagh ku nanden a ikav mbi a cii, man tasa u ôôn iyol mi a ityô na,

¹⁰ man akondo a i kor a tsembelee, uicighanmbaakondov mba pristi Aron, man akondo a ônov nav la, sha u eren tom u pristi a mi;

¹¹ man mkurem ma shighen man kwaghhumandoon u nanden u sha ilyôghonov sha ci u icighanjiir la. Er M kaa u nahan cii, kape ve̱ er je la.

¹² TER shi ôr kwagh a Mose, kaa er:

¹³ Ôr kwagh a Mbaiserael, kaa ve wer: Waan nen ayange a memen Am iko kpee je, gadia ka ikav i hen atô Wam a ven sha ikov ikov, sha u u̱ fa er Mo M lu TER u M tsegh ne, ne hingir wang yô.

¹⁴ Nahan yô, waan nen iyange i memen iko, i̱ hingir ne icighankwagh je; hanma or u nana hôngor a i yô, i̱ wua nan kpee; hanma or u nana er tom sha i yô, i̱ dugh or la ken nongo u nan kera.

¹⁵ I̱ er tom ayange ataratar, kpa iyange i sha utaankaruhar la yô, ka iyange i memen, i̱ memen tom cii, ka icighankwagh u TER je; hanma or u nana er tom sha iyange i memen yô, i̱ wua nan kpee je.

¹⁶ Mbaiserael ve̱ waan iyange i memen iko, ve̱ memen sha i sha ikov ikov, i̱ hingir ve ikuryan i tsôron.

¹⁷ Ka ikav i hen atô Wan a Mbaiserael gbem sha won je; gadia TER er Sha man tar ayange ataratar, sha iyange i sha utaankaruhar la yô, A mem, yôhôl Un iyol.

¹⁸ Tsô zum u A kure kwaghôron a Mose sha uwo u Senai yô, A na un ikpande i Shiada ihiar la, ka ikpande i awen i i nger i sha ihôwe u Aôndo yô.