Ekesodu 29 - ICIGHAN BIBILO

¹ Kwagh u ú er ve, sha u tseghan ve, sha u ve̱ eren Mo tom u pristi yô: Kôr gumbua kua anomaiyôngo ahar, ve cii ve̱ de luun a ihogholough iyol ga,

² man shi tôô bredi u i we kwa sha mi ga, man umasa mba i we kwa sha mi ga, mba i nongo sha mkure yô, man umasa mba par par mba i we kwa sha mi ga, mba i shigh ve mkurem yô. Ka sha mwem ma alakema ma kengese ú er ve ye.

³ Haa ve shin ikese i môm, tôô ve hen ikese, va a mi, kua nombua man anomaiyôngo ahar la kpaa.

⁴ Yô, va a Aron man ônov nav hen hunda u tenti u kohol ker la, ôô ve iyol sha mnger.

⁵ Tôô akondo la, haa Aron riga man togo u efodi man efodi kua ikpa i sha vanger la; kange un tsar u efodi la.

⁶ Kange un atsar sha ityou, shi kange icighantsar sha atsar la kpaa.

⁷ Gema tôô mkurem ma shighen, haa un sha ityou, shighe un.

⁸ Va a ônov nav kpaa, haa ve uriga.

⁹ Kange ve atsar shin awenge, Aron a ônov nav; cir ve ader sha ityou; tom u pristi u̱ lu u ve sha tindi gbem sha won; kape ú ver Aron a ônov nav sha tom je la.

¹⁰ Nombua la kpaa, va a mi sha ishigh ki tenti u kohol ker la; Aron a ônov nav ve̱ penda ave ve sha ityough ki nombua la.

¹¹ Sôngo nombua la sha ishigh ki TER hen hunda u tenti u kohol ker la.

¹² Er awambe a nombua la sha ihôwe, felegh sha akoratseegh; awambe agen la cii, gema a, haa hen ityôatsegh.

¹³ Tôô ahôm a a cir ikav mbi kimi la cii, kua ishwalegh ki mtema man ahi ahar kua ahôm a sha mi la, nande sha atse.

¹⁴ Kpa inyam i nombua la a ikôvough nagh man icômbov nav yô, nande sha usu ken akôngoafogh; ka nagh ku isholibo je la.

¹⁵ Shi kôr nomiyôngo la môm; Aron man ônov nav ve̱ penda ave ve sha ityough ki nomiyôngo la.

¹⁶ Sôngo nomiyôngo la, kura awambe a na haa sha ambusuatsegh la, ningir tser.

¹⁷ Bur nomiyôngo la, ôô ikav nav mbi ker atô la man akusu a na, penda sha aci a na kua ityough nagh.

¹⁸ Nande nomiyôngo la jimin cii sha atse, ka nagh ku nanden TER, ka ihuma i doon, man nagh ku usugh ku nan TER je la.

¹⁹ Shi kôr nomiyôngo ugen; Aron man ônov nav ve̱ penda ave a ve̱ sha ityough ki iyôngo la.

²⁰ Sôngo nomiyôngo la kpaa; er awambe a na, felegh Aron hen kpe u togh ku yanegh man hen akpeatogh a ônov nav a yan, man sha ihôwe ve u tamen u ken yan man ihônguhar ve u tamen u ken yan, gema awambe haa sha ambusuatsegh ningir tser.

²¹ Er awambe a sha atse la, kua mkurem ma shighen kpaa, mishi Aron iyol kua sha akondo a na, man ônov nav, kua sha akondo a ônov nav kpaa; nahan á tsegha un kua akondo a na man ônov nav kua akondo a ônov nav kpaa.

²² Shi tôô ahôm a anomaiyôngo la man tsa u ahômough man ahôm a a cir sha ikav mbi kimi man ishwalegh ki mtema man shi ahi ahar man ahôm a sha a, kua namegh ku yanegh (gadia ka nomiyôngo u tseghan or min je),

²³ man shi dugh kpenbredi môm man masa môm u i we un mkurem, man shi masa u par par môm, shin ikese i umasa mba i we kwa sha mi ga yô, i i lu sha ishigh ki TER la;

²⁴ gema ve cii penda sha ave a Aron kua a ônov nav cia ve, i̱ hingir nagh ku cian sha ishigh ki TER.

²⁵ Shi hire ngohol ve sha ave ve, nande sha atse sha nagh ku nanden la, i̱ lu ihuma i doon sha ishigh ki TER, ka nagh ku usugh ku nan TER je la.

²⁶ Tôô gugu u nomiyôngo u tseghan Aron mi la, cia un, a̱ hingir nagh ku cian sha ishigh ki TER; maa á hingir kwar wou.

²⁷ Tsegha gugu u nagh ku cian la, kua namegh ku kenden sha, ku i cie ku man ku i kende ku sha, sha nomiyôngo u tseghan or mi u a lu sha ci u Aron kua ônov nav la,

²⁸ ve̱ hingir kwar u Aron kua ônov nav gbem je, u Mbaiserael vea naan ve yô, gadia ka nagh ku kenden sha je, ka nagh ku kenden sha, ku Mbaiserael ve̱ kenden ku sha, sha iniav vev mbi bem, ka nagh vegh ku kenden sha ku ve ne TER je la.

²⁹ Uicighanmbaakondov mba Aron la, vea hingir mba ônov nav ken ijime na, sha er á shighe ve mkurem, á tsegha ve a mi iyol yô.

³⁰ Wan na u nana hingir pristi sha ityough nagh, u nana va nyôr ken tenti u kohol ker la, sha u eren tom ken icighanjiir yô, nana̱ haa ve ayange ataankarahar.

³¹ Tôô nomiyôngo u tseghan or mi la, jiir inyam na ken icighanjiir.

³² Aron a ônov nav, ve̱ ya inyam i iyôngo la kua bredi u shin ikese, hen hunda u tenti u kohol ker la.

³³ Man shi ve̱ ya akaa a i na iwom a mi sha u veren ve sha tom man tseghan ve la; or u ken inya yô, nana̱ de ye ga, gadia ka icighankwagh je.

³⁴ Man aluer inyam i tseghan or mi la, shin bredi kpaa vea lu her zan zan sev á av yô, nande kwagh u a shi la sha usu, i̱ de ye ga, gadia ka icighankwagh je.

³⁵ Kape ú er a Aron kua ônov nav la, er M kaa u nahan vough; ayange ataankarahar cii, i̱ tseghan ve a tsegha.

³⁶ Hanma iyange ú na nagh ku isholibo sha nombua, ku̱ lu iwom; wanger atse la sha u nan iwom sha a, shighe a mkurem, tsegha a.

³⁷ Ayange a ataankarahar la cii ú naan iwom sha atse sha u tseghan a yô; nahan atse aa hingir icighankwagh u hemban cii; hanma kwagh u a bende a atse la yô, una hingir icighankwagh.

³⁸ Kwagh u ú na nagh a min sha atse la yô, a̱ lu agumaiyôngo ahar a a kom inyom i môm i môm, ayange ayange, i̱ de bundu ga.

³⁹ Gumiyôngo u môm, ú na nagh a min pepe, ugen ú gema ú na aikighe,

⁴⁰ man shi mwem ma kengese ma ma kom môm-ken-upue u efa ma i nongo mkurem sha mi, ma kumen a kume, ma ma kom môm ken unyiin u hin, man wain u a kom môm ken unyiin u hin sha ci u nagh ku man, a gumiyôngo u môm imôngo.

⁴¹ Gumiyôngo ugen la yô, ú na nagh a mi aikighe, vough er u ne nagh ku sha samuyia ku pepe man nagh ku man la nahan, ku̱ lu ihuma i dedoo, ka nagh ku usugh ku nan TER je la.

⁴² I̱ hingir ne nagh ku nanden gbem sha ikov ikov hen hunda u tenti u kohol ker la, sha ishigh ki TER, henpe Me kohol ne sha u ôron kwagh a we her yô.

⁴³ Ka heregh kpaa Me kohol Mbaiserael ye; man ijiir la ia hingir icighanjiir sha ci u icivir Yam.

⁴⁴ Me tsegha tenti u kohol ker la, kua atse a nanden nagh sha min la kpaa; Aron man ônov nav kpaa Me tsegha ve, ve̱ eren Mo tom u pristi.

⁴⁵ Man Me tema a ônov mba Iserael imôngo, Me lu Aôndo ve kpaa.

⁴⁶ Nahan vea fa er Mo TER M lu Aôndo ve, u M dugh a ve ken tar u Igipiti, sha er Me tema hen atô ve yô; Mo M ngu TER, Aôndo ve.