Ekesodu 28 - ICIGHAN BIBILO

¹ Due a anngôu Aron kua ônov nav, ken atô u Mbaiserael, ve̱ kporom her a we sha er a̱ eren Mo tom u pristi yô, ka Aron man Nadabi man Abihu man Eleasar kua Itamar, ônov mban Aron.

² Kor anngôu Aron uicighanmbaakondov, ve̱ lu kwagh u icivirigh u doon ashe.

³ Man shi kaa mbafaneev cii, mba m iv ve a jijingi u mfe, ve̱ er Aron akondo, sha u á tsegha un a̱ eren Mo tom u pristi yô.

⁴ Akondo a ve̱ er yô, ka ikpa i sha vanger man efodi man togo man riga u i er hwe sha mi man atsar a sha ityou man tsar u shin iwenge; ve̱ er uicighanmbaakondov sha ci u anngôu Aron man ônov nav, sha u a̱ eren Mo tom u pristi yô.

⁵ Ve̱ tôô zenaria man ikondo i kwel man i nyian dindee man i nyian bong man ikondo i pupuu i kôngor.

⁶ Ve̱ er efodi sha zenaria man sha ikondo i kwel man i nyian dindee man i nyian bong man ikondo i pupuu i kôngor i sha mou u sendan, i̱ lu or u fan eev nana̱ er ye.

⁷ I̱ er un abamber ahar a sha avande sha u zuan un, i̱ zua un sha akur a na a ahar la.

⁸ Tsar na u zeren un mi, u a lu sha mi la, a̱ lu injatom i môm a na, shi a̱ lu kwagh môm a na kpaa, sha zenaria man ikondo i kwel man i nyian dindee man i nyian bong man i pupuu i kôngor i sha mou u sendan.

⁹ Man shi tôô awen a oniki ahar, gber ati a ônov mba Iserael sha a;

¹⁰ ati a ve ataratar sha iwen i môm man ati a ve ataratar agen la di sha iwen igen sha dondo dondo.

¹¹ I̱ lu or u fan u gberen akav sha iwen nana̱ er ye, er ka i gber akav sha kwagh nahan; gber ati a ônov mba Iserael sha awen ahar la; i̱ er a agbende a zenaria ken ijime.

¹² Var awen ahar la sha abamber a sha avande a efodi la, a̱ lu awen a umbur Mbaiserael a mi; Aron a̱ tôôn ati a ve sha avande a na ahar sha ishigh ki TER, sha er á umbur ve yô.

¹³ Man shi er agbende a zenaria,

¹⁴ kua mshirim mhar kpaa sha zenaria u wang; ishir ma er kwar nahan, zer mshirim ma ishir mara sha agbende la.

¹⁵ Man shi er ikpa i sha vanger i kuren kwagh, i̱ lu or u fan eev nana̱ er i ye; er i, i̱ lu injatom i môm a efodi; ka sha zenaria man ikondo i kwel, man i nyian dindee man i nyian bong man ikondo i pupuu i kôngor i sha mou u sendan ú er i ye.

¹⁶ A̱ lu ambusu akuku kpa uhar; iniembe na i̱ kuma abe môm, igbanger na kpaa i̱ kuma abe môm.

¹⁷ Var awen sha mi, iniongo inyiin; nongo u̱ sardiu man topashi kua karbunkel, u̱ lu nongo u hiihii;

¹⁸ nongo u sha uhar yô, u̱ lu emeraldi man safir kua diamondi;

¹⁹ nongo u sha utar yô, hiakinto man agati kua ametise;

²⁰ nongo u sha unyiin yô, beril man oniki kua yasepi; i̱ kase a zenaria i̱ var a sha ajiir a a.

²¹ Awen la, a̱ lu pue kar ahar sha ati a ônov mba Iserael vough, sha ati a ve ser ser, er ka i gber ikav sha kwagh nahan; hanmô i̱ lu a iti i i; a̱ lu sha ci u ikwe i pue ka ihiar la.

²² Er ikpa i sha vanger la mshirim ma i; ishir ma a ishir er kwar nahan, sha zenaria u wang.

²³ Var ikpa i sha vanger la ikunya i zenaria ihiar, zer ikunya ihiar la sha azongo ahar a ikpa i sha vanger la.

²⁴ Ta mshirim ma mhar ma i ishir ma sha zenaria la, sha ikunya ihiar i sha azongo a ikpa la.

²⁵ Ijô ihiar i mshirim mhar ma ishir la, zer i sha agbende ahar la, gema a var sha abamber a sha avande a efodi la vegher u ken ishi la.

²⁶ Var ikunya i zenaria ihiar, zer i sha azongo ahar a ikpa i sha vanger la, sha kur u kimi vegher u a lian ken efodi la.

²⁷ Shi er ikunya i zenaria ihiar zer i sha abamber a sha avande a efodi la vegher u shin, ken ishigh nagh, hen ijiir i i zough un la, i̱ gbihi tsar u efodi shin.

²⁸ Ve̱ zer ikpa i sha vanger la sha efodi, ve̱ ta ikunya i i ikar i kwel ve̱ zer i sha ikunya i efodi la, i̱ gbihi tsar u efodi shin, sha er ikpa i sha vanger ia kera bugh sha efodi kera ga yô.

²⁹ Nahan Aron una tôô ati a ônov mba Iserael sha ikpa i kuren kwagh la, sha ishima na, zum u una nyôron ken icighanjiir yô, sha er a̱ lu kwagh u á umbur sha ishigh ki TER gbem yô.

³⁰ Man wa Urim kua Tumim ken ikpa i kuren kwagh la; ve̱ lu Aron sha ishima, zum u una nyôr hen ishigh ki TER yô. Nahan Aron una tôôn kwagh u kuren kwagh u Mbaiserael sha ishima na, sha ishigh ki TER.

³¹ Man shi er togo u efodi, u̱ lu kwel cii.

³² U̱ lu a mon hen atô jighjigh, wa u tsar u i tume a tume yô, guu yisa er mon u riga u utya nahan, sha er ua ande ga yô.

³³ Shin mka na la, er anzôr a sha ikondo i kwel man i nyian dindee man i nyian bong, a̱ ningir mka la a̱ tser, man anmemem ma zenaria hen uharegh mba anzôrov mbala kpaa, ve̱ ningir ve̱ tser;

³⁴ animem u zenaria man injôr man animem u zenaria man injôr shin mka u togo la, ve̱ ningir ve̱ tser.

³⁵ Aron a̱ lu a mi iyol shighe u una eren tom yô, á ungwan iov i u shighe u una nyôron ken icighankpar sha ishigh ki TER, man shighe u una duen kpaa, sha er una kpe ga yô.

³⁶ Er kpande sha zenaria u wang, nger sha mi, er ka i gber ikav sha kwagh nahan wer: I TSEGHA UN SHA CI U TER.

³⁷ Zer u sha kwar u kwel, u̱ lu sha atsar a sha ityou; ka vegher u ken ishigh ki tsar la ua lu ye.

³⁸ Ua luun Aron sha icul, nahan Aron una tôô ibo i uicighanmbaakaav, mba Mbaiserael vea tseghan sha uicighanmbainiav vev la; ua luun un sha icul gbem, sha u á rumun ve sha ishigh ki TER yô.

³⁹ Man tume riga la sha hwe sha ikondo i pupuu i kôngor, man shi er atsar a sha ityou sha ikondo i pupuu i kôngor, shi er tsar u shin iwenge, i̱ lu or u nan fe u eren hwe sha kwagh nana̱ er ye.

⁴⁰ Man shi kor ônov mba Aron uriga, er ve atsar a shin iwenge, man shi kor ve ader, i̱ lu kwagh u icivirigh u doon ashe.

⁴¹ Yô, haa anngôu Aron ikav mbila iyol kua ônov nav kpaa a na imôngo; shighe ve mkurem, ver ve sha tom, tsegha ve, ve̱ eren Mo tom u Pristi.

⁴² Kor ve afo a pupuu sha u cirin idyelegh ve, a̱ hii sha iwenge a saa sha anam;

⁴³ Aron man ônov nav ve̱ huwan a shighe u vea nyôron ken tenti u kohol ker la, shin shighe u vea kporom hen atse sha u eren tom ken icighanjiir, sha u ve̱ de kpel ibo, ve̱ kpeen ga yô; i̱ lu un tindi u gbem kua tsombor na u ken ijime na.