Ekesodu 26 - ICIGHAN BIBILO

¹ Man shi er tabernakel la sha akondo a yisan pue; sha ikondo i pupuu i kôngor i sha mou u sendan man i kwel man i̱ nyian dindee man i nyian bong a ucerubi sha mi, i̱ lu or u fan eev nana̱ er ye.

² Iniembe i hanma ikondo i yisan i̱ lu aseva ikundu kar anigheni, igbangese i hanma ikondo i yisan i̱ lu aseva anyiin; akondo a yisan la cii, a̱ lu vough vough.

³ Akondo a yisan ataan i̱ zua a, i̱ kor; ataan agen la kpaa shi i̱ zua a, i̱ kor.

⁴ Er ahura a wever a kwel sha kur u ikondo i ken kpe, i ikondo i yisan i i zough i la; kape shi ú er sha kur u ikondo i ken kpe, i ikondo i yisan i sha uhar i i zough a zua i kpaa la.

⁵ Er ahura a wever akunduahargber sha ikondo i yisan i môm la, man shi er ahura a wever akunduahargber sha kur u ikondo i yisan i ken kpe, i ikondo i sha uhar i i zough i la; ahura a wever a̱ ngara cii, a̱ zua sha akar akar.

⁶ Er uiwever mba zenaria akunduahargber, zua akondo a yisan la sha uiwever, sha u tabernakel una lu kwagh môm yô.

⁷ Tume akondo a yisan sha aive a ivo, a̱ lu tenti u á cirin tabernakel a mi yô; ka akondo a yisan pue kar môm ú tume ye.

⁸ Iniembe i hanma ikondo i yisan i̱ lu aseva ikundugber, igbanger i hanma ikondo i yisan aseva anyiin; akondo a yisan a pue kar môm la, a̱ lu vough vough.

⁹ Zua akondo a yisan ataan kor, shi zua akondo a yisan ataratar kor, hure ikondo i yisan i sha ataratar i sha hunda u tenti la kpar uhar.

¹⁰ Er ahura a wever akunduahargber sha kur u ikondo i ken kpe, i ikondo i yisan i i zough i la, man ahura a wever akunduahargber sha kur u ikondo i yisan i sha uhar i i zough i la.

¹¹ Er uiwever mba togula akunduahargber, wever uiwever mbala sha ahura a wever la, zua tenti imôngo sha u una lu kwagh môm yô.

¹² Vegher u akondo a yisan u a neer a shir la, ka vegher u ikondo i yisan i i neer je la, gema un cir un ken ijime i tabernakel.

¹³ Man ishiva i môm i ken imbusu i keen man ishiva i môm i ken imbusu i keela a neer sha iniembe i akondo a yisan a tenti la, a̱ shir ken ambusu a tabernakel keen man keela, a̱ cir un.

¹⁴ Er kwagh u cirin tenti a mi sha akôv a anomaiyôngo a i nyian a yô; man kwagh u cirin un sha akôv a ayu, a̱ mase sha.

¹⁵ Man shi gba mtôm ma ipeem ma tabernakel sha kon u saa.

¹⁶ Ityaven i ityô i̱ lu aseva pue man igbanger i hanma ityôgh i̱ lu ishiva i môm cir tiôn.

¹⁷ Hanma ityôgh ki̱ lu a azongo ahar a i zough a zua a yô; ka ape u er mtôm ma ipeem ma tabernakel cii la.

¹⁸ Gba mtôm ma ipeem sha ci u tabernakel; mtôm ma ipeem ikundu sha ci u vegher u ken imbusutariyan ken ian i imbusutariyan la.

¹⁹ Shi er agbur akunduahar sha azurfa shin atô a mtôm ma ipeem ikundu, agbur ahar shin ityôgh i môm, sha ci u azongo a ki ahar la, man shi agbur ahar shin ityôgh kigenegh sha ci u azongo a ki ahar la;

²⁰ man vegher u tabernakel ugen kpaa, vegher u ken imbusutarimese la, mtôm ma ipeem ikundu;

²¹ man agbur a ve akunduahar mba sha azurfa; agbur ahar shin ityôgh i môm, man agbur ahar shin ityôgh kigenegh.

²² Gba mtôm mtaratar sha ci u vegher u ken ijime i tabernakel shin ian i ityôtar la.

²³ Gba mtôm mhar sha ci u azongo a tabernakel ken ijime;

²⁴ i̱ zua ma mhar ken akur (ma guvur), ma̱ lu kwagh môm vegher u shin kua vegher u sha, zan zan ar sha ihye la; kape ma mhar mara cii ma̱ lu la; maa lu sha ci u azongo ahar la.

²⁵ Mtôm ma ipeem maa lu anigheni kua agbur a ma a sha azurfa la; agbur pue kar ataratar, agbur ahar shin ityôgh i môm, shi agbur ahar shin ityôgh kigenegh.

²⁶ Er itiran i sha kon u saa; itiran sha ci u mtôm ma ipeem ken imbusu i tabernakel i môm.

²⁷ Man itiran itian sha ci u mtôm ma ipeem ma ken imbusu i tabernakel igen la; shi itiran itian kpaa sha ci u mtôm ma ken ijime i tabernakel, vegher u shin ityôtar la.

²⁸ Teran u hen atô la, u̱ tera hen atô u mtôm ma ipeem mara, hii hen kpe ungun zan zan u̱ za ar ken kpe ungula.

²⁹ Cir mtôm ma ipeem mara zenaria iyol, er ahye a ma sha zenaria, a̱ lu ajiir a itiran la; shi cir itiran la zenaria iyol kpaa.

³⁰ Tim tabernakel la, er i tese u ikav na sha uwo nahan.

³¹ Kor ikondo i yisan, sha ikondo i kwel man i nyian dindee man i nyian bong man i pupuu i kôngor, i sha mou u sendan, a ucerubi sha mi, i̱ lu or u fan eev nana̱ er ye.

³² Wever i sha mtôm ma saa mnyiin ma i cir ma zenaria iyol ma ma lu a uiwever mba zenaria ma ma til sha agbur a anyiin a azurfa la.

³³ Wever ikondo i yisan la sha uiwever; yô, nyôr a areki u shiada ken kpar u ikondo i yisan la; ikondo i yisan la i̱ lu ne ndor hen atô u icighankpar a icighankpar u hemban cii la.

³⁴ Man shi ver ijiir i nan iwom her la, sha areki u shiada ken icighankpar u hemban cii la.

³⁵ Ver tebul ken won u ikondo i yisan la, man daarimenger kpaa, a̱ lu sha ishigh ki tebul vegher u tabernakel ken ian i imbusutariyan la; ver tebul hen vegher u ken imbusutarimese.

³⁶ Er ikondo i yisan hunda u tenti a mi, i kwel man i nyian dindee man i nyian bong man ikondo i pupuu i kôngor i sha mou u sendan, i̱ lu or u eren kwagh sha hwe nana̱ er ye.

³⁷ Gba mtôm ma saa mtaan sha ci u ikondo i yisan la, cir ma zenaria iyol; uiwever mba ma kpaa ve̱ lu mba zenaria; haa ma agbur a togula ataan.