Ekesodu 24 - ICIGHAN BIBILO

¹ Tsô A kaa a Mose er: Unde va nen hen TER, we vea Aron man Nadabi man Abihu man mbatamen mba Iserael akunduatargber; gure nen ca je;

² ka Mose tsegh a̱ kporom a TER ikua ikua ye; kpa ve yô, ve̱ de ve ikua ikua ga; ior kpaa ve̱ de undu a na imôngo ga.

³ Tsô Mose va ôr ior akaaôron a TER cii, kua akaaôron a jirigh cii; ior cii rumun zwa môm, er: Akaaôron a TER A kaa cii, sé er sha mi.

⁴ Tsô Mose nger akaaôron a TER cii; shi a mough pepe pepe, a ta atse a nan nagh sha mi hen tinewoogh la, man a tim mtôm ma awenem pue kar mhar sha ikwe i Mbaiserael pue kar ihiar la vough.

⁵ Shi a tindi mbayevikaior mba ken Mbaiserael ve na TER nagh ku nanden, shi ve sôngo TER nagh ku bem sha anomabua.

⁶ Nahan Mose pande awambe la haa shin utasa; agen la yô, a mishi sha atse a nanden nagh sha mi la.

⁷ A tôô Ruamabera u ikuryan la, a ôr, ior ungwa dedoo; ve kaa er: Akaa a TER A kaa la cii, sé er, shi sé waan a iko kpaa.

⁸ Tsô Mose tôô awambe la, mishi sha ior, a kaa er: Ka awambe a ikuryan i TER A ye a ven sha akaaôron ne cii je ne.

⁹ Nahan Mose vea Aron man Nadabi man Abihu man mbatamen mba Iserael akunduatargber mbala ve unde,

¹⁰ ve nenge a Aôndo u Iserael; ape angahar a Na a lu, vegher u shin, lu er tembe u i kôngor u sha iwen i safir yô, wanger wang je, er kwavaôndo nahan.

¹¹ A bende mbatamen mba Iserael ave ga, ve nenge a Aôndo, ve ya kwagh, ve ma kwagh.

¹² Tsô TER kaa a Mose er: Unde va her a Mo sha uwo, lu sha mi; yô, Me na u ikpande i awen man atindiakaa kua akaawan a M nger sha u tesen ve a yô.

¹³ Tso Mose mough, un vea Yosua, wanakiriki na; nahan Mose unde sha uwo u Aôndo.

¹⁴ A gema a kaa a mbatamen er: Keghen nen se heen zan zan se hire hen a ven; nenge, Aron vea Hur mba a ven imôngo; hanma or u nan lu a ijir i yilan yô, nana̱ za hen ve.

¹⁵ Nahan Mose unde sha uwo; tsô ibeenegh cir uwo la.

¹⁶ Iengem i TER lu sha uwo u Senai, ibeenegh kpaa cir u ayange ataratar; sha iyange i ataankarahar la, A yila Mose ken atô u ibeen.

¹⁷ M-ande u iengem i TER lu er usu u yeghen nahan sha ityough ki uwoogh sha ashe a Mbaiserael.

¹⁸ Tsô Mose nyôr ken atô u ibeenegh kila, gba unden sha uwo. Mose tsa sha uwo ayange akunduahar man aime akunduahar.