Ekesodu 20 - ICIGHAN BIBILO

¹ Tsô Aôndo ôr akaa angan cii, A kaa er:

² Ka Mo TER, M lu Aôndo wou, u M dugh a we ken tar u Igipiti, ken ya u ikpan ye.

³ De lu a mbaaôndo mbagenev ga, saa Mo.

⁴ De gbe eev ga, shin kwagh u a bee ma kwagh u a lu sha kwavaôndo shin u a lu shin inya, shin u a lu shin mngerem ma shin mkur u inyaagh kpaa ga.

⁵ De gur ve inya ga, shi de civir ve kpaa ga; gadia Mo TER, Aôndo wou, M ngu Aôndo u gban iwuhe; M tsahan mbayev sha ci u iferkwagh i uter zan zan ikov itiar man inyiin kpaa i mba ve kerem ihom;

⁶ kpa mba M doo ve ishima man ve we atindi a Am iko yô, M eren a udubu vev imôngo dedoo.

⁷ De teren iti i TER Aôndo wou dang ga; gadia or u nan teren iti i TER dang dang yô, Una na nan ishô mayange ga.

⁸ Umbur iyange i memen sha er u tsegha i yô.

⁹ Ayange ataratar er tom man shi akaa a ou cii;

¹⁰ kpa iyange i ataankarahar la, ka iyange i memen i TER, Aôndo wou, je la; sha iyange ngila de ker ma tom ave ga, we, man shi wan wou u nomso, man shi wan wou u kwase, man shi or u shiren we tom, man shi kwase u eren we tom, man shi uzendenya ou, man shi shiror u nan nyer u a nyôr;

¹¹ gadia TER gba Sha man tar man zegemnger kua akaa a a lu ken ve cii, ayange ataratar, sha iyange i ataankarahar la A mem, ka nahan man TER A ver iyange i memen doo doo, A tsegh i kpaa ye.

¹² Civir teru man ngôu, er á seer we ayange ken tar u TER, Aôndo wou, A lu nan we yô.

¹³ De woo or ga.

¹⁴ De eren idya ga.

¹⁵ De iin ga.

¹⁶ De we or u wan ndor a we aie iyol ga.

¹⁷ De tem ya u or u wan ndor a we ga, shi de tem kwase u or u wan ndor a we ga, shin or u shiren nan tom, shin kwase u eren nan tom, shin bua u nan, shin jaki i nan kpaa, kwagh môm môm u a lu u or u wan ndor a we yô, de tem ga.

¹⁸ Ior cii lu nengen a idyuran man inyiar man imo i ikpamkor kua uwo u u lu duen mnyim la; er ior nenge a mi nahan yô, ve gbidye akarkase iyol, ve tile ca je.

¹⁹ Ve kaa a Mose er: We, gba ôron kwagh a vese tsô, kpa sé ungwa; i̱ de luun Aôndo A̱ ôron kwagh a vese ga, er sé kpe ga yô.

²⁰ Tsô Mose kaa a ior er: De cie nen ga, gadia Aôndo va sha u va karen ne a kar tsô, mciem ma cian Un ma lu ne sha ishi, sha er né er isholibo ga yô.

²¹ Tsô ior tile ca; kpa Mose yô, kporom hen angôghime henpe Aôndo lu la.

²² TER kaa a Mose er: Kaa Mbaiserael nahan wer: Ne ayol a en kpaa, ne nenge er M er kwagh a ven Sha je yô.

²³ De eren nen ma kwagh seer sha a Mo ga; de eren nen mbaaôndo mba sha azurfa shin mba sha zenaria ga.

²⁴ Tam atse a inyaagh; ka sha a, ú naan iniav mbi nanden man iniav mbi bem, iyôngo you kua abua ou ye; sha hanma ijiir i M ver Mer, i̱ umbur iti Yam ker yô, Me va kohol we her, Me ver u doo doo.

²⁵ Man aluer ú tam atse sha awen yô, de te a sha awen a i vande kuan a ga; gadia aluer ú kende ikagh ki tomough you sha, sha mi yô, u hôngor a je ve.

²⁶ Man de undu sha atse Am sha agbur a tan angahar sha mi ga, sha u idyelegh wou a̱ de bughun sha a ga yô.