Ekesodu 13 - ICIGHAN BIBILO

¹ Tsô TER ôr kwagh a Mose, kaa er:

² Tsegham hanma waniunda cii, kwagh u a hii duen ken uya ken Mbaiserael, a lu or shin zendenya kpaa, ka u Wam je.

³ Tsô Mose kaa a ior er: Umbur nen iyange i ne due ken Igipiti ken ya u ikpan ne; gadia ka sha uwegh ku ageegh je TER due a ven ken ajiir ne ye; i̱ de ye bredi u lun a kwa ga.

⁴ Ka nyian je ne lu duen ye, sha uwer u Abiba ne.

⁵ Yô, zum u TER Una za a we ken tar u Mbakanaan man Mbahiti man Mbaamor man Mbahivi man Mbayebushi, u A bum a uter ou er Una na u u la, tar u atumbabua man iyough ve dumbur ken u la yô; shighe la, wa iko u eren ieren ne sha uwer ne je

⁶ Ayange ataankarahar cii ú ya bredi u i we kwa sha mi ga yô, sha iyange i ataankarahar la yô, á er iniongo i civir TER.

⁷ Bredi u i we kwa sha mi ga la yô, á ya un sha ayange a ataankarahar la cii, i̱ de nengen we a bredi u lun a kwa ga; ken tar wou cii, i̱ de nengen we a kwa tsô kpaa ga.

⁸ Sha iyange la je, ú kaa wan wou wer: Kwagh ne ka sha ci u kwagh u TER lu er sha ci wam, zum u m due ken tar u Igipiti la.

⁹ A̱ hingir we ikav sha uwegh ough, kua ikav i umbur sha kungwa wou, sha u tindi u TER a̱ lu u ken zwa yô; gadia ka sha uwegh ku ageegh je, TER due a we ken tar u Igipiti ye.

¹⁰ Nahan yô, wa iko u eren sha tindi ne sha shighe na vough, sha anyom anyom.

¹¹ Tsô zum u TER Una nyôr a we ken tar u Mbakanaan er lu bum a we man uter ou la, Una za na u u yô,

¹² tsegha TER hanma wan u a hii duen ken uya; hanma waniunda u u lu a mi u a dugh ken zendenya, u a lu u nom yô, ka u TER je.

¹³ Hanma waniunda u jaki yô, ú paa un sha waniyôngo; man wea paa un ga yô, sombo un mon; hanma waniunda u or kpaa, u ken ônov ou, ú paa un.

¹⁴ Tsô zum u wan wou una pine u iyange igen er: Inja i kwagh ne ka nyi? Kaa un wer: Ka sha uwegh ku ageegh je TER due a vese ken tar u Igipiti ken ya u ikpan ye;

¹⁵ man shi er Farao venda er se̱ de yemen ga yô, TER wua hanma waniunda ken tar u Igipiti, waniunda u or kua waniunda u zendenya kpaa; ka nahan man m ne TER nagh mi; kpa ônov mba iundav mba ônov av yô, m paan ve.

¹⁶ A̱ hingir ikav sha uwegh ough man kwagh u zeren sha icul senen hen kungwa wou; gadia ka sha uwegh ku ageegh je TER due a vese ken Igipiti ye.

¹⁷ Man zum u Farao de ior er ve̱ yem yô, Aôndo kar a ve hen gbenda u ken tar u Mbafiliti ga, er u lu kôvoraa nahan kpaa; gadia Aôndo kaa er: Ior mban ve̱ de za nengen a ityav, ve̱ vaan afanyô, ve̱ hiden ken Igipiti ga.

¹⁸ Nahan Aôndo ningir a ior sha gbenda u ken desereti hen Zegemnger u Nyian la. Mbaiserael due ken tar u Igipiti a ikav mbi utyav iyol.

¹⁹ Mose tôô akuhe a Yosev kpaa, lu yemen a mi, gadia a er Mbaiserael ve bum sha ishima i môm, a kaa er: Aôndo Una va sôr ne kpee je; yô tôô nen akuhe am heen sha, yem nen a mi.

²⁰ Tsô ve hembe hen Sukoti ve za haa hen Etam hen kpe u desereti.

²¹ TER kar hemen ve gbenda atetan sha ibeenegh ki lun er ityôgh nahan sha u tesen ve gbenda; tugh yô, gema lu sha usu u lun er ityôgh nahan sha u nan ve iwanger, sha er ve̱ Zenden tugh kua tetan kpaa yô;

²² ibeenegh ki lun er ityôgh nahan la, ki undun ior atetan ga, man usu u lun er ityôgh nahan la kpaa, u undun ve tugh ga.