Ekesodu 10 - ICIGHAN BIBILO

¹ Tsô TER kaa a Mose er: Za hen Farao, gadia Mo M cighir un ishima kua asema a mbatomov nav kpaa sha u Me er uivande Av mban hen atô ve yô;

² man shi sha u, ú ôr sha ato a wan wou man wan u wan wou kpaa, akaa a M er Mbaigipiti, man uivande Av mba M er hen a ve, sha er ne̱ fa er Mo M lu TER yô.

³ Tsô Mose man Aron ve za hen Farao, ve kaa a na er: TER, Aôndo u Mbaheberu, kaa nahan er: Ka hanma shighe je man ú de u vendan u shirigh a iyol you inya sha ishigh Yagha? De ior Av, ve̱ yem ve̱ za civir Mo.

⁴ Aluer u venda u den ior Av yô, nenge, kper Me haa ikomon ken tar wou;

⁵ ia cir tar cii je á kera fatyô u nengen a inya ga; ia ya akaa a a mase shin her, a a wer, awombo a shi ne her la, man shi ia ya hanma kon u u mende ne ken akôngo yô.

⁶ Ia iv ken ayou a ou man ayou a mbatomov ou cii kua ayou a Mbaigipiti cii kpaa; kwagh u uter ou man uter mba uter ou vande nengen ga je, hii sha iyange i ve lu je zan zan ne. Tsô a gema ijime a due hen Farao kera.

⁷ Nahan mbatomov mba Farao kaa a na er: Ka hanma shighe je man or ne una de hônon se? De ior ve̱ yem ve̱ za civir TER Aôndo ve; u ngu a fa er Igipiti a saa ishe je gaa?

⁸ Tsô i hire a Mose man Aron hen Farao; a kaa a ve er: Za, za civir nen TER, Aôndo wen; kpa ka unô jim je, sar ve u zana?

⁹ Mose kaa er: Sé za a mbayev asev mba kiriki kua mbatamen asev man ônov asev mba nomso kua mba kasev; man iyôngo man ivo yase kua ibua yase kpaa, sé za a mi; gadia ka u sé er TER iniongo je.

¹⁰ A kaa a ve er: TER A̱ lu a ven, aluer mo nahan mea na ne gbenda a mbayev enev mba kiriki yô; er nen teghelee, gadia kwaghbo ngu ne sha ishi.

¹¹ Ka nahan ga! Ne nomso mba vesen za nen ase, za civir nen TER, gadia ka kwagh u a sar ne je la. Tsô i zenda ve sha ishigh ki Farao kera.

¹² Nahan TER kaa a Mose er: Naregh uwegh ough sha tar u Igipiti sha u ikomon i̱ va haa ken tar u Igipiti i̱ ya hanma imendenegh ki ken tar la, ka hanma kwagh u awombo a shi la.

¹³ Tsô Mose naregh gbough nagh sha tar u Igipiti; nahan TER er ahumbe a sha ityoughkitaregh shi van ken tar la didi, tsa tugh kaka kpaa; sev mbu aven yô, ahumbe a sha ityoughkitaregh va a ikomon.

¹⁴ Ikomon la samber sha tar u Igipiti cii, haa ken tar u Igipiti ci ca cii, ngee je zua ga; mayange je ikomon lu a vande van er ingila nahan ga, man mayange imbaikomon la ia kera va kpaa ga.

¹⁵ I cir tar la cir je inya wa ime; i ya hanma imendenegh hen inya kua atam a ikon cii, a awombo a shi la, ma ihômon kera shi sha ikon ga, shin sha imendenev mbi ken akôngo ken tar u Igipiti cii kpaa ga.

¹⁶ Tsô Farao yila Mose vea Aron fese, a kaa er: M er kwaghbo sha ishigh ki TER, Aôndo wen kua sha ishigh yenegh kpaa.

¹⁷ Nahan yô, ma ne mase den mo kwaghbo wam kwa ne tsô, sôn nen TER, Aôndo wen, A̱ hirem a ku ne ijime tsô.

¹⁸ Tsô a due hen Farao, a sôn TER.

¹⁹ Nahan TER gema ahumbe a taver a ka a va shin ityôtar la, kura ikomon la, za haa shin Zegemnger u Nyian; ma orikomon môm kera shi ken tar u Igipiti je ga.

²⁰ Kpa TER cighir Farao ishima, a de Mbaiserael er ve̱ yem ga.

²¹ Tsô TER kaa a Mose er: Naregh uwegh ough Sha, sha er ime i̱ wa ken tar u Igipiti, imbaime i ia wa je á bende i ave yô.

²² Mose naregh uwegh nagh Sha, nahan angôghime wa ken tar u Igipiti cii, ayange atar;

²³ ve nengen a ayol a ve ga, ma or kpa moughon henpe nan lu la ga zan zan ayange atar je; kpa Mbaiserael cii yô, iwanger lu ken ajiir a ve a teman la.

²⁴ Tsô Farao yila Mose, kaa er: Za nen, za civir nen TER, kpa undu nen ivo man iyôngo yen kua ibua yen her; mbayev enev mba kiriki kpaa ve̱ za a ven imôngo.

²⁵ Mose kaa er: Man shi ú na iniav mbi sôngon kua mbi nanden kpaa, sha er sé za na TER, Aôndo wase, nagh yô.

²⁶ Uzendenya asev kpaa vea za a vese imôngo, pandegh môm tsô kpaa, á undu ku hen ya ga; gadia ka ve, sé pande ker, sé civir TER, Aôndo wase, a mi ye; se kpaa se fa kwagh u sé za civir TER a min ga, saa sé ar keela ve.

²⁷ Kpa TER cighir Farao ishima, nahan a rumun er ve̱ yem ga.

²⁸ Farao kaa a na er: Yem heen kera, er teghelee, de kera shi va kimbir kenger mo sha ishi ga, gadia iyange i ú shi ú kenger mo sha ishi yô, ú kpe.

²⁹ Mose kaa er: U kaa sha mi; me kera kenger we sha ishi mayange ga.