Duteronomi 9 - ICIGHAN BIBILO

¹ Ver ato Iserael, nyian u ngu peren Yordan sha u u̱ nyôr u̱ za ngohol akuraior a a hembe u iyenge man agee kpaa, agar a vesen a vesen a i maa a ugir tav za tagher sha aôndo je,

² ior mba gban akôr, mba taven, Mbaanaki, mba u fe ve, mba u ongo, i er kwagh ve er: Ka an nana fatyô u tilen sha ishigh ki Mbaanaki laa?

³ Yô, fa nyian, TER, Aôndo wou, ka Un je A lu peren hemen ne, er usu u hian nahan ye; Una tim ve, Una er ve vea var inya sha ishigh you; nahan ú tim ve fese, er TER A kaa nahan.

⁴ Yô, de henen ken ishima you, zum u TER, Aôndo wou, A lu numun ve sha ishigh you kera la, wer: Ka sha ci u perapera wam man TER A nyer a mo er m̱ ya dyako u tar ne, ga; gadia ka sha ci u ifer i akuraior ne man TER A lu zendan ve sha ishigh you kera ye,

⁵ ka sha ci u perapera wou ga; shin ka sha er u lu ishima jighilii yum man u lu nyôron sha u ngohol tar ve ga, kpa ka sha ci u ifer i akuraior ne, man TER, Aôndo wou, A lu zendan ve sha ishigh you kera ye, man shi sha er Una er sha kwaghôron u TER lu bum a uter ou, Aberaham man Isaka man Yakob la.

⁶ Yô, fa ka sha ci u perapera wou man TER, Aôndo wou, A lu nan tar u dedoo la, er u̱ ngohol u ga; gadia we u ngu ikurior i nômbon ikôr je.

⁷ Yô, umbur, i̱ de hungul we er yan u bam TER, Aôndo wou, ken desereti la ga; hii sha iyange i u due ken tar u Igipiti la je zan zan shighe u ne ve hen ijiir ne, ne lu hendan kwagh a TER je.

⁸ Hen Horebi yô, ne bam TER, TER yuwe a ven je war timin ne.

⁹ Zum u m unde sha uwo sha u za ngohol ikpande i ikuryan i TER ya a ven la, shighe la m tsa sha uwo ayange akunduahar man aime akunduahar; m ya kwagh ga, mngerem kpaa m ma ga.

¹⁰ TER nam ikpandeawen ihiar i i nger i sha ihôwe u Aôndo yô; ka sha i je i nger akaaôron a TER ôr ne sha uwo ken atô u usu sha iyange i mkohol u ior cii la ye.

¹¹ Tsô ayange akunduahar man aime akunduahar la, nga kar kera yô, TER nam ikpandeawen ihiar la, ka ikpande i ikuryan je la.

¹² TER kaa a mo er: Mough heen, hungwa fese, gadia ior ou mba u dugh a ve ken Igipiti la, ve er kwagh u dang ve; ve undu gbenda u M kaa ve la fese je, ve gema ve ker eev.

¹³ Man shi TER ôr kwagh a mo, kaa er: M nenge ikurior ne, nahan ka ikurior i nômbon ikôr.

¹⁴ Dem, M̱ tim ve, M̱ ese iti ve sha won kera, nahan Me gema u, hingir ikurior i hemban ve agee man iyenge kpaa.

¹⁵ Tsô m gema m hungwa sha uwo, uwo la lu yeghen usu; ikpande i ikuryan ihiar la lu sha ave am ahar ne.

¹⁶ Tsô m nenge er ne er TER, Aôndo wen, isholibo je yô; ne er wanbua ne ker un a ker, ne undu gbenda u TER, Aôndo wen, A kaa ne la fese je.

¹⁷ Nahan m gema ikpande ihiar i sha ave am ahar la, m gbihi i kera, m hembe i sha ashe a en je.

¹⁸ M shi m gba inya sha ishigh ki TER, er tsuaa la nahan, ayange akunduahar man aime akunduahar; m ya kwagh ga, mngerem kpaa m ma ga, sha ci u isholibo yen i ne er cii yô, er ne er ifer sha ishigh ki TER ne bam Un yô.

¹⁹ Gadia m lu cian iyugh man ishima i nyoon i tsung i TER nyoon a ven sha u timin ne la. Hen shighe la kpaa TER shi ungwam.

²⁰ Aron kpaa ishima vihi TER a na tsung je er Una tim un yô, m er msen sha ci u Aron hen shighe la kpaa.

²¹ Kwaghbo wen, wanbua u ne er la, m tôô un m nande sha usu, m cagh un, m wua un dedoo, via je hingir er ihundu nahan, m gema ihundu na la m haa shin uwagh u u sen sha uwo la.

²² Man shi hen Tabera man hen Masa man hen Kiberoti-hataawa kpaa ne bam TER.

²³ Zum u ne lu hen Kadeshi-barnea kpaa, TER tindi ne, A kaa er: Kôndo nen, za ngohol nen tar u M ne ne la; shighen la kpaa shi ne hendan a imo i TER, Aôndo wen, ne na Un jighjigh je ga, ato kpaa ne ver sha kwaghôron Na ga.

²⁴ Hii sha iyange i M fa ne la je, ne lu mbahendan kwagh a TER.

²⁵ Tsô m gba inya sha ishigh ki TER, ayange akunduahar man aime akunduahar shon a m gba inya la, sha ci u TER lu kaan er Una tim ne yô.

²⁶ Tsô m sôn TER, m kaa mer: TER Aôndo, de timin ior Ou, dyako Wou, u U paa un sha mhembe Wou, u U due a na ken tar u Igipiti sha uwegh ku ageegh la, ga.

²⁷ Umbur mbayev Ou, Aberaham man Isaka man Yakob, de we iko sha ityough ki taver ki ior mban ga, shin sha ifer ve, shin sha isholibo ve kpaa ga;

²⁸ gayô, tar u U due a vese ken u la, ua va kaa er: Ka sha er TER A fetyô u aren a ve ken tar u A tende zwa er Una na ve la ga yô, man shi sha ci u A ker ve ihom yô, ka nahan man A due a ve er Una za tim ve ken desereti ye.

²⁹ Man ve ka ior Ou je man dyako Wou kpaa u U dugh a na sha agee Ou a hemban man sha uwegh ku naregh yô.