Duteronomi 8 - ICIGHAN BIBILO

¹ Hanma tindi u m we u nyian yô, waan nen iko eren nen sha mi, sha er né lu uma, né seer iyenge, né nyôr, né ngohol tar u TER lu bum a uter enev er Una na u yô.

² Man shi umbur gbenda la cii, u TER, Aôndo wou, hemen we anyom akunduahar ken desereti sha u hiren a iyol you ijime, man u karen we, sha u fan kwagh u a lu u ken ishima, shin ú waan atindi Na ikoou, shin ú waan a iko gaou.

³ A hide a iyol you ijime, A de ijen kôr u, kpa A shi A koso u sha mana, kwagh u u fe un ga je yô, uter ou kpaa fa un ga, sha er Una tese u, u̱ fa er i lu sha kwaghyan tseegh man or a lu uma ga yô, kpa i lu sha hanma kwaghôron u a dugh ken zwa u TER man or a lu a uma sha mi yô.

⁴ Anyom akunduahar la, ikondo you i haan iyol, bee iyol ga, nguhar tsô kpaa, mura u ga.

⁵ Umbur dedoo, er or ka nan tsaha wan u nan nahan, kape TER, Aôndo wou kpaa, A tsaha u la.

⁶ Yô, waan atindi a TER, Aôndo wou, iko, zenden sha igbenda Na, cia Un kpaa.

⁷ Gadia TER, Aôndo wou, ngu van a we ken tar u dedoo, tar u lun a iwagh man amboramnger man mngerem ma duen shin upev man sha iwo,

⁸ tar u lun a alakema man shair man ikon i wain man ikon i tur man upomegraneti, tar u lun a mkurem ma olev man iyough,

⁹ tar u ú ya kwaghyan ker, akorakor ga, ma kwagh una ban u ker ga; tar u awen a ker a lu iyôgh ki iligh, iwo i ken u kpaa, ú time togula sha i.

¹⁰ Ú yaan á kuma u gbing gbing, ú wuese TER, Aôndo wou, sha ci u tar u dedoo u A ne u la.

¹¹ Kura iyol you, TER, Aôndo wou, A̱ de hungul we er ú kera waan atindi Na man akaaôron a Na a jirigh kua akaawan a Na, a m we u kwagh sha mi nyian ne iko ga ze;

¹² sha er, zum u ú ya á kuma u man ú maa uya mba doon, ú tema ker,

¹³ man zum u ibua you man iyôngo you ia seer ngeen man azurfa wou man zenaria wou kpaa vea seer ngeen man kwagh u u lu a mi cii una seer ngeen yô,

¹⁴ Ú gba moron iyol je, TER, Aôndo wou, u A dugh a we ken tar u Igipiti ken ya u ikpan la Una hungul we,

¹⁵ Un u A kar a we ken zegedeserti u cieryol la, henpe iyô i usu lu man ayese man tar u tseghe tseghe, henpe mngerem lu ga, u A due u a mngerem ken vande u taver la,

¹⁶ u A koso u ken desereti sha mana, kwagh u uter ou fa un ga, sha u Una hide a iyol you ijime man Una kar u sha er ken masejime Una ver u doo doo yô.

¹⁷ Yô, de henen ken ishima you wer: Ka tahav av man agee a uwegh agh ve nem inyaregh kin ga.

¹⁸ Kpa umbur TER, Aôndo wou, ka Un A ne u tahav mbu zuan a inyaregh ye, sha er Una er sha ikuryan Na i A bum a uter ou, er i lu nyian nahan.

¹⁹ Tsô aluer TER, Aôndo wou, á hungul we, wea gema wea dondo mbaaôndo mbagenev, wea eren ve tom, wea guren, wea civir ve yô, m pase ne nyian ne, né tim kpee.

²⁰ Er akuraior a TER A lu timin a sha ishigh yenegh la nahan, kape nea tim la, sha ci u ne vende u ungwan imo i TER, Aôndo wen, yô.