Duteronomi 34 - ICIGHAN BIBILO

¹ Tsô Mose mough hen ukpuunkpuun mba Moabi unde sha uwo u Nebo sha ityough ki Pisega, u a lu sha ishigh ki Yeriko la. TER tese un tar la cii, hii hen Gileadi zan zan ar hen Dan,

² man Nafetali cii man tar u Eferaim kua Manase kua tar u Yuda cii, zan zan za ar shin zegemnger u shin ityôtar la;

³ man imbusutariyan la, kua kpuun kpuun u pev u Yeriko, gar u avilegh la, zan zan za ar hen Soar.

⁴ TER kaa a na er: Ungun ka tar u M bum a Aberaham man Isaka man Yakob Mer: Me na tsombor wou u je ne; M tese u, u nenge u sha ashe ou, kpa ú per ú nyôr ker u ga.

⁵ Tsô Mose wanakiriki u TER kpe her ken tar u Moabi sha imo i TER.

⁶ A ii un shin pev la, ken tar u Moabi sha ishigh ki Bete-peor; zan zan nyian, ma or fa uwar na ga.

⁷ Mose tsa anyom deri man ikundu zum u a kpe la; ishe na wa ime ga, agee a iyolough na kpaa hide ijime ga.

⁸ Mbaiserael vaa Mose hen ukpuunkpuun mba Moabi ayange ikundugber; tsô ayange a vaan ku u Mose la bee.

⁹ Tsô Yosua wan u Nun iv a jijingi u mfe, gadia Mose vande pendan un ave sha ityo; Mbaiserael ver ato sha a na, ve er er TER kaa Mose nahan.

¹⁰ Ma profeti ugen kera mough ken Iserael er Mose, u TER fa un ishigh a ishigh nahan ga,

¹¹ sha uivande cii man akaakpilighyol a TER tindi un sha u eren a ken tar u Igipiti a Farao man mbayev nav cii,

¹² man sha uwegh ku ageegh cii, kua akaacieryol a Mose er sha ishigh ki Iserael la cii.