Duteronomi 33 - ICIGHAN BIBILO

¹ Ka iveren i Mose or u Aôndo, ver Mbaiserael er a lu a kpe ga la ne;

² a kaa er: TER due hen Senai va, A mough hen Seir, A za her a ve; A ta iwanger sha uwo u Paran, A mough hen uicighanmbaiorov dubu pue; usu lu yeghen sha uwegh Nagh ku yanegh.

³ Mimi je, ikwe la doo Un ishima; uicighanmbaiorov Nav cii ve mba sha ikev You, ve haa hen angahar a Ou; hanmô ve nan ngohol kwagh sha akaaôron a Ou.

⁴ Mose na se atindiakaa, ka dyako u ior i Yakob je la.

⁵ TER ya tor ken Yeshurun, zum u utyombaiorov mba ior kohol, ikwe i Iserael cii kohol imôngo la.

⁶ Ruben a̱ lu uma, a̱ de kpeen ga; kpa ior nav yô, ve̱ de ngeen ga.

⁷ Sha kwagh u Yuda yô, a kaa er: TERE, ungwa imo i Yuda, nyôr a na ken ior nav, a̱ nôngo num sha ave na iyol na je; hingir orwasen un sha mbaahendanev nav.

⁸ Sha Levi yô, a kaa er: Tumim Wou man Urim Wou mba a or u i doo U a na la, u U kar un hen Mase la, u U hendan kwagh a na hen mngerem ma Meriba la;

⁹ u a teren ter na man ngô na er: M nenge a ve ga; man a rumun anngôôv nav kpaa ga, ônov nav kpaa a fa ve ga; gadia ve wa kwaghôron Wou iko, ve ver ishima sha ikuryan You kpaa.

¹⁰ Vea tese Yakob akaaôron a Ou a jirigh, vea tese Iserael tindi Wou; Vea ver kwaghhumandoon sha ishigh You, man nagh ku nanden ku jimin sha atse Ou a nanden nagh sha mi la.

¹¹ TERE ver agee na doo doo, rumun tom u sha ave na; sombo mba ve mough num a na awenge, kua mba ve ker un ihom kpaa, sha er vea kera mough ga yô.

¹² Sha Benyamin yô, a kaa er: Wen u a doo TER ishima la, una tema bem bem a Na; Una shi yisan un didi, man ka ken huwa u avandeaveegh na A tem ye.

¹³ Sha Yosev yô, a kaa er: Tar na u̱ lu a iveren i TER sha akaa a injaa a Sha man sha avure, man sha zegemnger u shin atôtaregh,

¹⁴ man sha akaa a injaa a atam a iyange, man sha akaa a injaa a mvese u iwer,

¹⁵ man sha akaa a hemban a utsembaiwoov, man sha akaa a injaa a uicôronmbaagunguv,

¹⁶ man sha akaa a injaa a tar man akaa a a lu ken u, man mdoo u i doo Un u A tem ken ageva la a na la. Iveren i̱ sen sha ityough ki Yosev, sha ihaghtyo i un u i tsegh un, i ver un kposo a anmgbianev nav la.

¹⁷ Nombua na u iunda ngu a mhembe; akor a na ka akorayaregh je; ka sha a je una mgbegha akuraior cii, je á za ar ken aikighir a tar je; ka udubu pue pue mba Eferaim, man udubu mba Manase je la.

¹⁸ Sha Sebulon yô, a kaa er: Ember Sebulon sha mdugh wou, we Isakar kpaa ken utenti ou.

¹⁹ Vea lôhô akuraior er a̱ za sha uwo, vea na iniav mbi perapera sha her; gadia vea suse akaa a zegemnger a a dumbur la, man inyaregh ki ken myer ki waarawa kpaa.

²⁰ Sha Gadi yô, a kaa er: I̱ wuese Un u A gbanger Gadi la; a uve er ngôbegha nahan, a ande uwegh kua ihaghtyo je kpaa.

²¹ Kwar u hiihii a tsuwa sha ci na iyol na, gadia i tsegha kwar u orjir keela; a va kohol uityombaiorov, a er perapera u TER, kua akaaôron a Na a jirigh a Iserael imôngo.

²² Sha Dan yô, a kaa er: Dan ka wanbegha, u tsuwen duen ken Bashan je.

²³ Sha Nafetali yô, a kaa er: Nafetali ide sha mkpeyol, iv a iveren i TER, ngohol zegemnger man imbusutarimese.

²⁴ Sha Asher yô, a kaa er: Sha won cii, i hemba veren Asher doo doo; a̱ lu or u hemban doon anngôôv nav ishima; a̱ civ nguhar na shin mkure.

²⁵ Uishindan ou ve̱ lu iyôv man togula je; er ayange a ou a lu nahan, kape agee ou kpaa a̱ lu la.

²⁶ Mô môm ngu er Aôndo ga, we Yeshurun, A zenden sha Usha, sha u wasen we, man sha kwavaôndo kpaa sha mhembe Na.

²⁷ Aôndo u tsôron ka ijiir you i teman, vegher u shin yô, ave a tsôron nga. A zenda orihom sha ishigh you kera, A kaa er: Tim.

²⁸ Nahan Iserael tema bem bem. Imbor i Yakob tema kposo, ken tar u alakema man wain; a er, Usha nav mba nôndon avure.

²⁹ Saan we iyol Iserael, ka an nan lu er we nahan? ikurior i TER A yem i perutya u iwasen you, man sanker u mhembe wou; mbaihomov ou vea var u inya, we, ú ndyar sha ajiir a ve a taven.