Duteronomi 31 - ICIGHAN BIBILO

¹ Tsô Mose za ôr Iserael cii akaa ne.

² A kaa a ve er: Nyian ka anyom am deri man ikundu je ne; m kera ngu fan ityô u nyôron man duen ga; TER kpaa kaa a mo er: Peren you Yordan ne ga.

³ TER, Aôndo wou, ka Un, Una hemen we u peren; Una tim akuraior ne sha ishigh you kera, ú ngohol tar ve; ka Yosua, una hemen we u peren ye, er TER lu kaa yô.

⁴ Man TER Una er a ve, er lu er a Shihon man Ogo, utor mba Mbaamor, man tar ve nahan, mba A tim ve la.

⁵ TER Una na ve sha ikev yen, er nen a ve sha tindi u m we ne ne cii.

⁶ Taver ishima lu icihi, de cie ga, de luun a mciem iyol sha kwagh ve kpaa ga; gadia TER, Aôndo wou, ka Un A ze a we imôngo ye; Una kende u ga, Una undu u kpaa ga.

⁷ Tsô Mose yila Yosua, a kaa a na sha ashe a Iserael cii er: Taver ishima, lu icihi, gadia ka we ú yem a ior mban ken tar u TER lu bum a uter vev er Una na ve u la ye; shi ka we kpaa ú na ve vea ngohol u kpaa ye.

⁸ Ka TER Una hemen we ye; Una lu a we, Una kende u ga, Una undu u kpaa ga; de cie ga, de luun a mciem iyol kpaa ga.

⁹ Tsô Mose nger tindi ne, na un sha ikev i upristi ônov mba Levi, mbatôôn areki u ikuryan i TER, man mbatamen mba Iserael cii.

¹⁰ Mose kaa a ve er: Sha mbee u hanma inyom i ataankarahar, sha shighe u i ver sha inyom i den injô la vough, sha iniongo i atumbe la,

¹¹ zum u Mbaiserael cii ve kohol sha ishigh ki TER, Aôndo wou, ken ijiir i Una tsuwa la yô, ôr tindi ne sha ishigh ki Iserael cii, sha ato ve.

¹² Kohol ior, nomso man kasev man mbayev mba kiriki kua shiror wou u nan nyer u a nyôr, ve̱ ungwa, ve̱ hen ve̱ cian TER, Aôndo wou, ve̱ waan akaaôron a tindi ne cii iko, ve̱ eren sha mi;

¹³ ônov vev mba ve fe ga kpaa, ve̱ ungwa, ve̱ hen u cian TER, Aôndo wen, sha ayange a né tema ken tar u né lu zan ner né per Yordan né za ngohol u la cii.

¹⁴ Tsô TER kaa a Mose er: Ayange ou a ú kpe, mgbôghom ve; yô, yila Yosua, za nen ken tenti u kohol ker la, Me wa un kwagh. Nahan Mose vea Yosua ve za, ve za tile ken tenti u kohol ker la.

¹⁵ TER ande ken tenti ken ityôgh ki ibeenegh, ityôgh ki ibeenegh tile hen hunda u tenti.

¹⁶ Tsô TER kaa a Mose er: Nenge, yaven you a uter ou imôngo; ior mban vea mough vea er idya sha u dondon mbaaôndo mba hev mba hen tar u ve lu zan sha u vea za tema ken u la, vea gbihim kera vea vihi ikuryan Yam i M ye a ve ne.

¹⁷ Tsô sha iyange la iyugh Yam ia kende sha a ve, Me gbihi ve kera, Me yer ve ishigh Yagh, á omon ve, akaavihin man atsan kpishi aa tser ve; sha iyange la vea kaa er: Kera ka sha ci u Aôndo wase A lu a vese ga, man akaabo ne a tser se nahan ye gaa?

¹⁸ Mo kpaa Me yer ishigh Yagh kera sha iyange la, sha ci u ifer i ve er la cii, er ve gem ve ze hen mbaaôndo mbagenev yô.

¹⁹ Yô, nger nen icam ne sha ci wen, tese nen ônov mba Iserael i, wa ve i ken zwa sha er icam ne i̱ hingir Mo shiada sha Mbaiserael yô.

²⁰ Gadia zum u Me va a ve ken tar u M bum a uter vev, tar u dumbur a atumbabua man iyough la, vea yaan, vea iden, vea kehen, nahan vea gema vea za hen mbaaôndo mbagenev vea civir ve, vea laham, vea vihi ikuryan Yam.

²¹ Tsô zum u akaavihin kpishi man atsan aa tser ve yô, icam ne ia pase kwagh sha ishigh vegh er ka shiada yô; gadia ia hungul ken zwa u tsombor ve ga, gadia M fa mhen ve u ve lu a mi nyian ne, je er M lu a za a ve ken tar u M bum a ve la ga yô.

²² Nahan Mose nger icam ne sha iyange la, tese Mbaiserael i.

²³ Tsô A kaa a Yosua wan u Nun er: Taver ishima lu icihi, gadia ka we ú za a Mbaiserael ken tar u M bum a ve la ye; Me lu a we imôngo.

²⁴ Tsô zum u Mose kure u ngeren akaaôron a tindi ne ken ruamabera been cii yô,

²⁵ Mose kaa a Mbalevi, mbatôôn areki u ikuryan i TER la er:

²⁶ Tôô nen ruamabera u tindi ne, ver nen hen kpe u areki u ikuryan i TER, Aôndo wen, a̱ hingir shiada sha we keregh.

²⁷ Gadia mo m fa ihembeato you man ikôrnômbon you; nyian er m lu uma a ven imôngo ne kpaa ne mba hendan a TER man gema shighe u me kpe keraa?

²⁸ Kohol nen mbatamen mba sha ikwe yen cii man mbahemenev enev her a mo, ôr akaa ne sha ato ve je; m yila Sha man tar ve̱ lu shiada sha ve.

²⁹ Gadia m fa ken ijime i ku wam, né er dang, né undu gbenda u m kaa ne ne; kwaghbo una tser ne sha ayange a masetyô, sha ci u nea er kwaghbo sha ishigh ki TER, sha u bamen Un sha tom u ave a en.

³⁰ Tsô Mose ôr asember a icam ne sha ato a ior mba Iserael cii zan zan bee.