Duteronomi 30 - ICIGHAN BIBILO

¹ Tsô zum u akaa ne cii aa va tser u, iveren man ifan i m ver u sha ishi ne, man wea umbur a ken akuraior cii, henpe TER, Aôndo wou, A zende u u yem la,

² man wea hide hen TER, Aôndo wou, wea ungwa imo Na, sha akaa a m kaa u nyian ne cii, we kua ônov ou, a ishima you cii man a uma wou cii yô,

³ nahan TER, Aôndo wou, Una gema mlu wou, Una zungwe u mhôônom, Una shi á kohol we ken akuraior cii, henpe TER, Aôndo wou, vande samben we u za lu la.

⁴ Shin ior ou mba i sambe ve la, vea lu ken ikighir i Sha je kpaa; keela kpaa TER, Aôndo wou, Una kohol we, keela kpaa Una za tôô u;

⁵ TER, Aôndo wou, Una va a we ken tar u uter ou iyange lu ker la, ú ngohol u kpaa; Una er a we dedoo, Una seer we iyenge je ú hemba uter ou.

⁶ TER, Aôndo wou, Una tsôngo ishima you, man ishima i tsombor wou, sha er TER, Aôndo wou, A̱ doo u ishima a ishima you cii man a uma wou cii, sha er u̱ lu uma yô.

⁷ TER, Aôndo wou, Una na afan ne cii aa kôr mba ve lu iyongo a we man mba ve ker u ihom ve tev u a ican la.

⁸ Kpa we ú shi ú ungwan imo i TER, ú eren sha atindi a Na a m we u nyian ne cii;

⁹ TER, Aôndo wou, Una na u akaadoon wuee, sha tom u ave ou cii man sha tsombor wou man ônov mba uzendenya ou man iyiav mbi hen sule wou kpaa; gadia TER shi Una ember we sha u á kpe ne iyol, er lu ember uter ou nahan,

¹⁰ aluer ú ver ato sha imo i TER, Aôndo wou, ú waan atindi a Na man akaawan a Na a i nger ken ruamabera u tindi ne iko yô, aluer ú gema hen TER, Aôndo wou, a ishima you cii man uma wou cii yô.

¹¹ Gadia tindi u m we u nyian ne a hemba u agee ga, man ngu ca kpaa ga;

¹² ngu sha aôndo ga, er ú kaa wer; Ka an nana unde sha aôndo nana va a mi her a vese nana na er sé ungwa un sha er sé waan un iko?

¹³ Shi ngu yande zegemnger kpaa ga, er ú kaa wer: Ka an nana per zegemnger nana za va se a mi, nana na er sé ungwa un sha er sé waan un iko?

¹⁴ Kpa kwaghôron ngu ikua ikua a we je, ken zwa wou man ken ishima you sha er u̱ er sha mi yô.

¹⁵ Nenge, m ver u uma man mkpeyol, ku man shi kwaghbo sha ishi nyian,

¹⁶ er m lu kaan a we nyian mer: TER, Aôndo wou, A̱ doo u ishima, zenden sha igbenda Na, waan atindi a Na man akaaôron a Na a jirigh iko sha er u̱ lu uma, u̱ seer iyenge; man shi sha er TER, Aôndo wou, Una ver u doo doo ken tar u ú lu nyôron sha u za ngohol u la yô.

¹⁷ Kpa aluer ishima you ia gema, ú kera ver ato ga, i urugh we, ú za civir mbaaôndo mbagenev, ú er ve tom yô,

¹⁸ m pase ne nyian, mimi je né tim kpee; ayange a en aa ngee ken tar u ú per Yordan wer ú nyôr ú za ngohol u la, ga.

¹⁹ M yila Sha man tar, ve̱ lu shiada sha a ven nyian, er m ver uma man ku sha ishigh you, man shi iveren man ifan; yô, tsuwa uma sha er ú lu uma, we a tsombor wou;

²⁰ er TER, Aôndo wou, A̱ doo u ishima, u̱ ungwan imo Na, u̱ var a Na, gadia ka uma wou man ayange ou a ngeen je la, sha er u̱ tema ken tar u TER bum a uter ou, Aberaham man Isaka man Yakob, er Una na ve u la.