Duteronomi 3 - ICIGHAN BIBILO

¹ Tsô se gema, se kôr gbenda u zan sha Bashan. Ogo tor u Bashan due gba van hen vese a ishima i num, un a ior nav cii, sha u va nôngon ityav hen Ederei.

² Tsô TER kaa a mo er: De cie un ga, gadia M na un sha ikev you a ior nav cii kua tar na kpaa; er a na er u er a Shihon tor u Mbaamor u a tema hen Heshebon la nahan.

³ Tsô TER, Aôndo wase, gema Ogo tor u Bashan na un sha ikev yase, un a ior nav cii; se hemba un je or na môm tsô kpaa nan war ga.

⁴ Se ngohol agar a na cii; hen shighe la, ma gar ve u se de ngohol lu ga, lu agar akunduatar, tar u Argobi la cii, ka tartor u Ogo ken Bashan je la.

⁵ Agar la cii i kase a sha ukpekpe mba taven, ve lu a ihinda man uishindan, shi angarev mba kiriki mba i kase ve ukpekpe ga kpaa, lu kpishi.

⁶ Se tim ve purututu, er se er a Shihon tor u Heshebon nahan; se tim hanma gar purututu a nomsombaiorov keregh man mbayev mba kiriki kpaa.

⁷ Kpa uzendenya cii kua ishar i sha agar la cii, se kura, hingir kwagh wase.

⁸ Hen shighe la se ngohol tar la sha ikev i utor mba Mbaamor uhar, mba ve lu yande Yordan la, hii hen pev u Arnon zan zan za ar hen uwo u Hermon

⁹ (Hermon ne, Mbashidon mba yer un er, Shihon, kpa Mbaamor mba yer un er, Senir),

¹⁰ agar a ken kpuun kpuun la cii, man Gileadi cii kua Bashan cii, zan zan za ar hen Saleka man Ederei, ka agar a tartor u Ogo ken Bashan je la.

¹¹ (Gadia Ogo tor u Bashan la, ka un tseegh mase shin ken Mbarefai ye; gambe na lu gambeiyô; ka ken Raba u ken ônov mba Mbaamon a lu ye gaa? Ityaven na ka aseva ataankaranyiin je, igbangese na gema ka aseva anyiin je, sha ishiva i karen kwagh a mi keke la.)

¹² Tar ne ka ken shighe la se ngohol u ye; hii hen Aroer u a lu hen pev u Arnon la man vegher u tar u iwoogh u Gileadi a agar a ken u, m na Mbaruben man Mbagadi;

¹³ vegher u Gileadi u a shi la kua Bashan cii, ka tartor u Ogo je la, m gema m na vegherkwe u Manase; ka tar u Argobi la cii. Bashan la cii mba yer un er tar u Mbarefai.

¹⁴ Yair wan u Manase ngohol tar u Argobi cii zan zan za ar hen ikighir i Mbageshur man Mbamaaka, ka Bashan je la; a ii u iti sha iti na iyol na, er, Havoti-yair, zan zan nyian.

¹⁵ Makir yô, m na un Gileadi.

¹⁶ Mbaruben man Mbagadi, m gema m na ve, hii hen Gileadi zan zan za ar shin pev u Arnon, atô u pev a lu ikighir i u, zan zan za ar hen uwagh u Yaboki u u lu ikighirtar i ônov mba Amon la,

¹⁷ kua Araba kpaa, man Yordan lu ikighir, hii hen Kinereti zan zan za ar hen Zegemnger u Araba, ka zegemnger u bar je la, shin soughsough u Pisega, vegher u sha ityoughkitaregh la.

¹⁸ Hen shighe la, m wa ne tindi, mer: TER, Aôndo wen na ne tar ne sha u ne̱ ngohol u; kange nen iyol i utya, per hemen nen anmgbianev enev, Mbaiserael, ne anomaior cii;

¹⁹ kpa kasev enev man mbayev enev mba kiriki kua uzendenya enev (m fa ne mba a uzendenya kpishi), ve̱ lu ken agar a en a m ne ne ne;

²⁰ zan zan TER A̱ na anmgbianev enev mmem er A ne ne nahan, man ve kpaa ve̱ ngohol tar u TER, Aôndo wen, Una na ve yande Yordan la; tsô hanmô wen nana hide hen kwagh u nan, u m ne nan yô.

²¹ Hen shighe la m kaa a Yosua mer: Ashe a ou nenge akaa a TER, Aôndo wen, A er a utor mba uhar mban cii, kape TER Una er a ityartor i né per né nyôron ken i cii la.

²² De cie nen ve ga, gadia TER, Aôndo wen, ka Un, A nenge ityav sha ci wen ye.

²³ Mo kpaa m zamber a TER hen shighe la, m kaa mer:

²⁴ TER, Aôndo, U hii u tesen wanakiriki wou icivir You man uwegh Ough ku ageegh, gadia ma aôndo ugen u a lu Sha shin shin tar u una fatyô u eren imbaityom man aeren a vesen er We nahan, ngu je kpa?

²⁵ Shi de, m̱ nenge tar u dedoo u yande Yordan la, uwo u doon ashe la man Lebanon.

²⁶ Kpa TER gema yuwem a yuwe sha ci wen, ungwam her ga; man shi TER kaa a mo er: Kwagh ne kuma ve; de kera shi er kwagh a Mo sha kwagh ne ga.

²⁷ Unde sha ityough ki Pisega, gema ashe ou shin ityôtar man ken imbusutarimese man ken imbusutariyan man sha ityoughkitaregh, nenge sha ashe a ou je, gadia peren you Yordan ne ga.

²⁸ Kpa wa Yosua kwagh, a̱ er sha icihi, taver un ishima, gadia ka un una hemen ior mban, una per a ve, shi ka un una na ve vea ya dyako u tar u wea nenge a u la ye.

²⁹ Tsô se tema hen pev hen ishigh ki Bete-peor la.