Duteronomi 29 - ICIGHAN BIBILO

¹ Angan ka akaaôron a ikuryan i TER kaa Mose er a̱ ya i a Mbaiserael ken tar u Moabi, seer sha ikuryan i A ya a ve hen Horebi la.

² Tsô Mose yila Mbaiserael cii, kaa a ve er: Ne ayol a en je, ne nenge akaa cii a TER er a Farao man mbatomov nav cii kua tar na cii sha ashe a en ken tar u Igipiti la;

³ ka uzegembaikarenev mba ashe a ou nenge mi, ivande man akaakpilighyol a vesen;

⁴ kpa zan zan hegen TER ngu a na ne ishima i kaven man ashe a nengen man ato a ungwan ga.

⁵ Anyom akunduahar M hemen ne ken desereti; akondo a ne lu a mi iyol la, bee iyol ga, ikôvough ki shin nguhar ou kpaa, bee iyol ga.

⁶ Ne ya ruam ga, ne ma wain shin kwaghman u taver kpaa ga; sha er ne̱ fa er Mo TER M lu Aôndo wen yô.

⁷ Man zum u ne va ar hen ijiir ne kpaa, Shihon tor u Heshebon man Ogo tor u Bashan due va ta num sha vese, kpa se hemba ve;

⁸ se ngohol tar ve, se gema u se na Mbaruben man Mbagadi man vegherkwe u Manase ve ya dyako sha mi.

⁹ Yô, waan nen akaaôron a ikuryan ne iko, eren nen sha mi, sha er ne zua a mkpeyol sha tom wen cii yô.

¹⁰ Ne cii ne mba tilen nyian sha ishigh ki TER, Aôndo wen; uityombaiorov enev, man ikwe yen, man mbatamen enev man mbahemenev enev, nomsombaiorov man Iserael cii,

¹¹ kua mbayev enev mba kiriki man kasev enev man shiror wou u nan lu hen atô u afo ou kua or u nan taven we ikon man or u nan kesen we mngerem kpaa;

¹² sha u u̱ nyôr ken ikuryan i TER, Aôndo wou, man ken mbum Na u TER, Aôndo wou, A bum a we nyian ne;

¹³ sha er Una ver u nyian u̱ hingir ikurior Na, man Una lu Aôndo wou er A kaa u nahan man er A bum a uter ou Aberaham man Isaka man Yakob yô.

¹⁴ Man ka ne tseegh, M ya ikur ne a ven tseegh ga, shi M bum a ven tseegh kpaa ga;

¹⁵ kpa ka mba ve lu a vese imôngo nyian ne sha ishigh ki TER, Aôndo wase, kua mba ve lu a vese imôngo nyian ne ga kpaa.

¹⁶ Gadia ne fa injamtem i se tema ken tar u Igipiti, man mkar wase u se kar ken atô u akuraior a ne kar ken a ne;

¹⁷ man ne nenge aeren a ve a ihôngorough kua akombo a ve, a sha ikon man awen man azurfa man zenaria, a a lu her a ve la;

¹⁸ sha er i̱ de zuan a nomsoor ker a ven shin kwase shin tsombor shin kweior, u ishima ve i gem nyian sha u undun TER, Aôndo wase, yemen za civir mbaaôndo mba akuraior la ga; sha er ma mise u menden umen megh man kwaghyuan u̱ de lu ken a ven ga yô;

¹⁹ man zum u or la nana ungwa akaaôron a mbum ne yô, nana ver iyol i nan doo doo ken ishima i nan nana kaa er: Me zua a bem shin er m ze sha ishima yam i hemban ato nahan kpaa; nahan nana va a mtim sha kwagh u ndor kua u ombor imôngo cii.

²⁰ TER Una de nan kwaghbo u nan ga, kpa shighe la iyugh i TER man iwuhe Na ia yughur sha or la, ifan i i nger ken ruamabera ne cii ia lu sha a nan, TER Una ese iti i nan sha won kera.

²¹ TER Una dugh nan ken ikwe i Iserael cii, Una ver nan ken ican i bo sha inja i afan a ikuryan a i nger ken ruamabera u tindi ne cii.

²² Kov u u ve la, ônov enev mba vea mough ken ijime yen la, man or u hen nongo ugen u nan dugh ken tar u icaa kpaa, vea ôr kwagh zum u vea nenge atsan a hen tar la, man angev mbu TER A hee u mbu la;

²³ er inya i tar la cii kpaa i hingir sulfur man bar sha mnande u i nande u la, i kera lee kwagh sha i ga, man i mende iyiagh kpaa ga, ma kwagh môm kpaa kera mende sha i ga, er mtim u Sodom man Gomora man Adema man Seboim nahan, mba TER tim ve sha ishima i vihin Na man iyugh Na,

²⁴ nahan akuraior cii aa kaa er: Ka nyi TER A er a tar ne nahana? Inja i iyugh i vihin i i kehe yum ne ka nyi?

²⁵ Nahan ior vea kaa er: Ka sha ci u ve undu ikuryan i TER, Aôndo u uter vev yô, i A ya a ve, zum u A due a ve ken tar u Igipiti la;

²⁶ ve yem ve za civir mbaaôndo mbagenev, ve gure ve civir ve, mbaaôndo mba ve fe ga, man mba A ne ve kpaa ga yô;

²⁷ ka nahan man iyugh i TER i kende sha tar ne, A ve u a ifan i i nger ken ruamabera ne cii ye;

²⁸ TER wuhe ve ken tar ve kera sha iyugh man ishima i vihin man ishima i nyoon i tsung, A gbihi ve ken tar ugen er i lu nyian nahan.

²⁹ Akaamyer ka a TER, Aôndo wase, kpa akaa a i pase yô, ka a ase kua a ônov asev gbem sha won cii, sha er ne er sha akaaôron a tindi ne cii yô.