Duteronomi 28 - ICIGHAN BIBILO

¹ Aluer ú ungwa imo i TER, Aôndo wou, ishima i môm je, ú waan atindi a Na a m we u nyian ne cii iko, ú eren sha mi yô, TER, Aôndo wou, Una kende u sha, ú hemba akuraior a sha won cii,

² Iveren ne cii ia va sha a we, ia va kohol we, aluer wea ver ato sha imo i TER, Aôndo wou, yô:

³ Ú lu a iveren ken gar man ú lu a iveren ken sule kpaa.

⁴ Iveren ia lu sha tsombor wou man iyiagh ki hen inya you, man ônov mba uzendenya ou, man ibua you i maren kua iyôngo you i maren kpaa.

⁵ Iveren ia lu sha ikese you man ikagh you ki hôron mwem min.

⁶ Iveren ia lu sha a we zum u ú nyôron yô, man iveren ia lu sha a we zum u ú duen kpaa.

⁷ TER Una er mbaihomov ou mba vea mough num a we, kwagh una hemba ve sha ishigh you, vea va hen a we sha gbenda môm, kpa vea gema á yevese sha ishigh you kera sha igbenda itiankarihiar je.

⁸ TER Una kaa iveren ia va sha we, sha iuna you man sha hanma kwagh u ú kôr ave sha mi; man Una ver u doo doo ken tar u TER, Aôndo wou, Una na u yô.

⁹ TER Una ver u, ú lu Un icighanikurior er A bum a we nahan; aluer ú waan atindi a TER, Aôndo wou, iko, ú zenden sha igbenda Na yô.

¹⁰ Akuraior a sha won cii aa nenge er i lu yilan we sha iti i TER yô, nahan aa cia.

¹¹ TER Una na u akaadoon wuee, sha tsombor wou man sha ônov mba uzendenya ou, man sha iyiav mbi ken sule wou ken tar u TER bum a uter ou er Una na u u la.

¹² TER Una bugh u iyou Na i koson akaa a dedoo ker la, Una nôô ura hen tar wou sha shighe u u, Una ver tom u ave ou cii doo doo kpaa; ú pwar akuraior kpishi akaa; kpa we yô, ú pwar kwagh ga.

¹³ TER Una er u ú lu ityough, ú lu tsa ga, ú zaan sha gbem, ú gba shin ga, aluer ú ver ato sha atindi a TER, Aôndo wou, a m we u nyian ne, ú waan a iko u eren sha mi kpaa,

¹⁴ man ú kaha ken iyan shin ken imese ú undu ma kwaghôron wam u m kaa u nyian ne sha u dondon mbaaôndo mbagenev civir ve ga yô.

¹⁵ Kpa, aluer ú kera ver ato sha imo i TER, Aôndo wou, ú waan atindi a Na man akaawan a Na a m we ne nyian ne cii iko ga yô, ifan ne cii ia va sha a we ia kôr u:

¹⁶ Ú lu a ifan iyol ken gar man shi ú lu a ifan iyol ken sule kpaa.

¹⁷ Ikese you man ikagh you ki hôron mwem vea lu a ifan iyol.

¹⁸ Tsombor wou man iyiagh ki ken sule wou, ibua you i maren kua iyôngo you i maren ia lu a ifan iyol.

¹⁹ Ú lu a ifan iyol zum u ú nyôron man ú lu a ifan iyol zum u ú duen yô.

²⁰ TER Una tindi u a ifan man anzughul man myange sha akaa a u kôr ave sha mi cii, zan zan ú tim ú saa ishe fese, sha ci u ifer i aeren a ou er u gbihim kera yô,

²¹ TER Una er bouange una zer a we, zan zan Una tim u ken tar u ú za nyôr ker sha u yan dyako u u la.

²² TER Una tsaha u sha houghbar man angev mbu tseeyol man kwambe man iyol i hian man icegh ki zan man mhie u uyia man yien, vea zer a we zan zan ú tim.

²³ Kwavaôndo wou u u lu u sha yô, ua hingir togula man tar u u lu sha mi yô, ua hingir iyôgh.

²⁴ TER Una gema ura u hen tar wou ua hingir vuwe man ihundu, ia due Sha ia sen sha we zan zan ú tim.

²⁵ TER Una er kwagh á hemba u sha ishigh ki mbaihomov ou, ú za sha gbenda môm sha u za nôngon ityav a ve man ú gema ú yevese sha ishigh vegh kera sha igbenda itiankarihiar je; ú hingir ityartor i sha won cii ikav i cier iyol.

²⁶ Akom a ou aa hingir kwaghyan u inyon i sha cii, kua inyamtoho; or u zendan i kera, nana lu ga.

²⁷ TER Una tsaha u sha atundu a Igipiti man imor man lagh man akpev, ú fatyô u waren akaa ne ga.

²⁸ TER Una tsaha u sha ihundu man ashe a pirin man mkondoyol;

²⁹ ú peven a pev zende iyange sha tembe er mbaapirashe ve peven ken ime nahan, ú lu a iveren sha igbenda you ga; á gbaa kighir we, á nzughul a we gbem je tsô, ma or kpaa nana yima u ga.

³⁰ Ú sôôr kwase, kpa orgen nana yav a mi; ú maa iyou, kpa u tema ker ga; ú môôr ikon i wain, kpa ú er kwagh a atam a i ga.

³¹ Á sôngo bua wou sha ashe a ou je, kpa ú ya inyam na ga; á ngohol jaki you sha apera sha ishigh you je, kpa á hide a mi ga; á gema iyôngo you á na mbaihomov ou, kpa ú zua a or u nana yima u ga.

³² Á gema ônov ou mba nomso man mba kasev á na ikurior igen, ú lu nengen sha ashe ou, ashe ou kpaa aa yina u ikôr sha ci u veren a sha a ve, sev cii, uwegh ough kpaa kua lu agee a eren ma kwagh ga.

³³ Iyiagh ki sule wou man tom wou u ican cii, ikurior igen i u fe i ga, ia ya; kpa we yô, á gbaa kighir we eren we ican gbem tsô;

³⁴ zan zan je ú hunde sha ci u kwagh u ashe ou aa nengen mi yô.

³⁵ TER Una tsaha u sha ubombaatunduv sha anu a ou man angahar a ou, mba ú fatyô u waren ve je ga, á hii shin akev angahar a ou zan zan á ar sha ihaghtyo you.

³⁶ TER Una yem a we kua tor wou u u ver un una tema tor sha a we, hen ikurior igen, i we a uter ou ne fe i ga yô, keela né za civir mbaaôndo mbagenev, ikon man awen.

³⁷ Ú hingir kwagh u cieryol, man kwagh u veren ishor a min man kwagh u wan ishenge a min ken akuraior cii, henpe TER Una za a we yô.

³⁸ Ú yar a ivor kpishi ken ityev you, kpa ú sunda kpeghee tsô, gadia ikomon ia ya i.

³⁹ Ú môôr ikon i wain man ú sôr i, kpa zar na yô, ú ma ga, ú kohol atam a i kpaa ga, gadia anyigôô una ya i.

⁴⁰ Ú lu a ikon i olev ken tar wou cii, kpa ú shighe mkurem iyol ga; gadia olev wou una ndoor kera.

⁴¹ Ú mar ônov mba nomso kua mba kasev, kpa vea lu mba ou ga, gadia á kôr ve vea hingir mbakwarev.

⁴² Ikomon ia ya ikon you cii kua iyiagh ki ken sule wou.

⁴³ Shiror u nan lu a we, nana hemba u, nana yemen hemen hemen; kpa we yô, ú hiden a hide ijime.

⁴⁴ Nana pwar u kwagh, kpa we yô, ú pwar nan kwagh ga, nana lu ityough, we yô, ú lu tsa.

⁴⁵ Ifan ne cii ia va sha a we, ia zaan a we ityô, ia kôr u zan zan ú tim; sha ci u, u kera ver ato sha imo i TER, Aôndo wou, u we atindi a Na kua akaawan a Na a A we u la iko ga yô;

⁴⁶ ia lu sha a we sha ci u ivande man kwagh u kpilighyol, man sha tsombor wou kpaa gbem sha won cii.

⁴⁷ Er u kera civir TER, Aôndo wou, a ishima i iember man i saan saan ga, sha ci u, u ngee a akaa yum yô,

⁴⁸ nahan ú er mbaihomov ou mba TER Una tindi ve hen we tom u kpan a ijen man imura man idyelegh man mban u akaa cii; Una penda u igbur i iyô sha mon, zan zan Una tim u.

⁴⁹ TER Una va a ikurior igen ken ica, ia kôr u ihom, ia due ken ikighir i tar, er iguve ka i purugh nahan; ikurior i ú ungwa zwa u i ga je;

⁵⁰ ikurior i tsughur ishigh i i we orbeenyol iko ga, wanye kpaa i zungu nan mhôônom ga;

⁵¹ ia ya ônov mba ilev you man iyiagh ki hen tar wou zan zan ú tim; ia de u iyiagh shin wain shin mkurem shin ônov mba ibuav ou shin ônov mba iyôngov ou kpaa ga, zan zan ia tim u kera.

⁵² Ia kase u sha ihindagar you cii zan zan ugôgômbagilgar ou mba u suur sha a ve la, vea gba, ken tar wou cii; ia kase u sha ihindagar you cii, ken tar wou cii, u TER, Aôndo wou, A ne u la.

⁵³ Ú ya ônov ou mba u mar, ka inyam i ônov ou mba nomso kua mba kasev, mba TER, Aôndo wou, A ne u je la, ken mkase u utya man m-imbishi u mbaihomov ou vea imbishi we yô.

⁵⁴ Nomsoor u hen ven u nan taver ga, nan fe ican ga, nana kenger anngô u nan ishe i bo, man kwase u nan u doon nan ishima kua ônov mba nan mba ve shi ker yô,

⁵⁵ nana rumun u nan mô ve môm inyam i ônov mba nan, i nan lu yan la ga, sha ci u ma kwagh ugen shi her a nan ga, ken mkase u utya man m-imbishi u orihom wou una imbishi we ken ihindagar you la cii.

⁵⁶ Kwase u hen ven u nan taver ga, nan fe ican ga man nan cihi u benden ikevnguhar i nan hen inya ga, sha ci u cian ican, man mtaverga u nan la, nana kenger nom u nan u doon nan ishima la ishe i bo man wan u nan u nomso man wan u nan u kwase kpaa,

⁵⁷ sha ci u kôndogh u a dugh her atô u angahar a nan, man ônov mba nan mba nana mar la kpaa; gadia nana ya ve myer je sha ci u mban u akaa cii, ken mkase u utya man m-imbishi u orihom wou una imbishi we ken ihindagar you la.

⁵⁸ Aluer ú kera rumun u wan iko sha kwaghôron u tindi ne cii u i nger ken ruamabera ne, sha u cian iti i icivirigh i cieryol i TER, Aôndo wou, ne ga yô,

⁵⁹ TER Una haa u man tsombor wou, atsan a cier iyol, uzegembaatsanev mba vea tsa kpishi, man shi angev mbu vihin mbu tsan kpaa.

⁶⁰ Man shi Una haa u angev mbu Igipiti la cii, mbu mbu cier we iyol la; mbua zer a we.

⁶¹ Man hanma angev kpaa, man hanma ican i i nger i ken ruamabera u tindi ne ga kpaa, TER Una va u a mi zan zan ú tim.

⁶² Er ngise ne ngee iyenge er asan a Sha nahan, nahan kpaa, né mase shin ior ciôn tsô; sha ci u ne ver ato sha imo i TER, Aôndo wou, ga yô.

⁶³ Tsô, er TER A ember ne sha u Una ver ne doo doo, man Una seer ne iyenge la, kape TER Una ember ne sha u nan ne, né saa ishe man sha u Una tim ne la; á kar a ven ken tar u ú ze sha u za ngohol u la kera.

⁶⁴ TER Una samber a we ken akuraior cii, hii hen ikighir i tar ne zan zan za ar ken ikighir i tar ngila; keela yô, né za civir mbaaôndo mbagenev mba we kua uter ou ne fe ve ga la, ikon man awen.

⁶⁵ Ken akuraior la, ú zua a ma mkpeyol ga, ikevnguhar you ia zua pe memen ga; keela TER Una gema Una na u ikarikase ken ishima man ashe a yinan ikôr man ishima i uren;

⁶⁶ uma wou kpaa una lu zenge zenge sha ashe ou; tugh man tetan ú zer cian, ú kera fa uma wou ga;

⁶⁷ pepe yô, ú kaa wer: Iyange ma i shi bee! Iyange ia been yô, ú kaa wer: Ma i lu pepe! Sha ci u mcie u ishima you u ú cie yô, man sha ci u kwagh u a lu u sha ishi, u ashe ou aa nenge yô.

⁶⁸ TER Una hide a we ken Igipiti sha utso sha gbenda u m kaa u mer: Mayange ú kera nenge a u ga la; keela né teen ayol a en ner mbaihomov enev ve̱ yam, né lu ikpan i nomso man i ukase kpaa, kpa ma or nana rumun u yamen ne ga.