Duteronomi 26 - ICIGHAN BIBILO

¹ Zum u ú nyôr ken tar u TER, Aôndo wou, Una na u er u̱ hingir dyako wou, ú ngohol u, ú tema ker yô,

² pande atam a tsutswa a iyiagh ki tar la cii, a u kur a mi ken sule wou, u TER, Aôndo wou, A ne u la, haa a shin ikese, za a mi hen ijiir i TER, Aôndo wou, Una tsuwa sha u veren Iti Na er i̱ lu ker la.

³ Va hen pristi u una tema hen ayange la, kaa a na wer: Nyian m pase TER, Aôndo wou, mer, m nyôr ken tar u TER bum a uter asev er Una na se u ne ve.

⁴ Nahan pristi a̱ ngohol ikese la, sha uwegh ough, a̱ ver i sha ishigh ki atse a nanden nagh sha mi a TER, Aôndo wou.

⁵ Shi gema kaa sha ishigh ki TER, Aôndo wou wer: Terem lu Oraramia u azende azende, a yem ken Igipiti, a za lu shir ker a ior kpeghee, a hingir ikurior ker i vesen i ageegh, i ngeen kpaa;

⁶ Mbaigipiti er se ican i bo, kighir se, man na se tom u kpan u vihin tsung;

⁷ tsô se vaa a TER, Aôndo u uter asev; TER kpaa ungwa mliam asem, A nenge ican yase man tom wase u ican kua mkighir u i lu kighir se la;

⁸ nahan TER due a vese ken Igipiti sha uwegh ku ageegh man uwegh ku naregh man akaacieryol a vesen man uivande kua akaakpilighyol;

⁹ A va a vese hen ijiir ne, A va na se tar ne, tar u dumbur a atumbabua man iyough.

¹⁰ Hegen yô, nenge, m va a atam a tsutswa a iyiagh ki hen inya ne, ki u nem yô, TERE. Nahan ver a sha ishigh ki TER, Aôndo wou; gure inya sha ishigh ki, TER, Aôndo wou.

¹¹ Ember sha akaa a dedoo a TER, Aôndo wou, A ne u a ya wou cii yô, we man Orlevi kua shiror u a nyer u a nyôr la kpaa.

¹² Zum u u dugh môm-ken-upue u iyiagh you cii, u bee, ken inyom i sha utar la yô, ka inyom i dughun môm-ken-upue je la, gema na Orlevi man shiror man ancôghol kua kwasecôghol, ve̱ ya ken ihindagar you i̱ kuma ve;

¹³ tsô ú kaa sha ishigh ki TER, Aôndo wou, wer: M due a uicighanmbaakaav hen ya wam kera, m na Orlevi man shiror man ancôghol kua kwasecôghol sha imo You i U kaam cii yô, m per ma tindi môm ken atindi Ou ga, m hungul a kpaa ga.

¹⁴ M pande kwagh ker m ya, zum u m lu zungwen ku ga; m tôô ma kwagh u ker kera, zum u m lu wang ga la kpaa ga; shi m pande ma kwagh m na mbakpenev kpaa ga, m wa imo i TER, Aôndo wam, iko, m er akaa a U kaam cii.

¹⁵ Sha icighanjiir Wou u teman u Sha la, shir ashe Ou nenge, man ver ior Ou Iserael doo doo kua tar u U ne se er U bum a uter asev yô, tar u u dumbur a atumbabua man iyough ne.

¹⁶ Nyian TER, Aôndo wou, wa u akaawan kua akaaôron a jirigh ne, nahan waan a iko a ishima you cii man uma wou cii, eren sha mi.

¹⁷ Nyian u rumun er TER A lu Aôndo wou ve, ú zaan sha gbenda Na ú waan akaawan a Na man atindi Na kua akaaôron a jirigh a Na iko man ú ungwan imo Na kpaa.

¹⁸ Nyian kpaa TER rumun er we, u̱ lu ikurior Na iyol Na jim, er A kaa a we nahan, man ú waan atindi Na cii iko;

¹⁹ nahan Una kende u sha, ú hemba akuraior a A gbe a cii iwuese man gwa u zan man icivir, ú lu TER, Aôndo wou, icighanikurior er A kaa nahan.