Duteronomi 25 - ICIGHAN BIBILO

¹ Aluer kwagh u anyiman una mough hen atô u nomsombaiorov man vea va hen ijir man i kure ve ijir, i na ormimi la ishô, i gema i na orifer la ibo,

² aluer ibo i orifer la ia kuma gbidiv yô, orjir a̱ kaa i̱ samber nan inya, i̱ gbidye nan sha ishigh nagh sha ifer i nan la vough, i̱ ôr iyenge;

³ ka kwa akunduahar una gbidye nan ye, i̱ de karen ga; sha er anngôu a̱ de heen sha ishigh you ga zum u á gbidye nan kpishi á hemba heela yô.

⁴ De we bua kper sha zwa zum u a lu shoghol iyiagh la ga.

⁵ Aluer anngôôv vea tema ijiir i môm, man mô ve ugen nana kpe nana lu a wan ga yô, kwase u or u a kpe la, a̱ de vese orgen ken won kposo ga, ka anngô u nom na la, nana̱ tsa a na, nana̱ tôô un a̱ hingir kwase u nan, nana̱ er a na er anngô u nom na nana er la.

⁶ Nahan waniunda, u kwase la una mar la, nana ya iti i anngô u nan u a kpe la, sha er i̱ de esen iti i nan ken Iserael kera ga yô.

⁷ Kpa aluer á doo or la u tôôn kwase u anngô u nan ga yô, kwase u anngô u nan la, a̱ za hen mbavesen hen hundagar, a̱ za kaa er: Anngô u nomom venda u veren anngô na tse ken Iserael, a rumun u eren a mo er anngô u nom ka nan er la nahan ga.

⁸ Nahan mbatamen mba hen gar u or la, ve̱ yila nan ve̱ ôr kwagh a nan; kpa nana̱ venda ngeghekeke, nana̱ kaa er: Sarem u tôôn un ga yô,

⁹ kwase u anngô u nan la, a̱ va her a nan sha ishigh ki mbatamen, a̱ va tsuwa nan ikôvough ki shin nguhar, a̱ haa nan ijer sha ishi, shi a̱ gema a̱ kaa a nan er: Kape á er a or u nan maa ya u anngô u nan ga la.

¹⁰ Nahan á yila iti i nan ken Iserael er: Ya u or u i tsough nan ikôvough ki shin nguhar kera.

¹¹ Aluer nomsombaiorov mba nôngon num ayol a ve, man kwase u mô ve una va sha u una va yima nom na sha ikev i u a gbidye un la, man una za uwegh una kôr or la sha alegh a nan a ken myer yô,

¹² tôndo un uwegh kera; ashe ou a̱ de zungu mhôônom ga.

¹³ De luun a uikaren mba myoho anza ahar, u vesen kua u kiriki ken ikpa you, ga.

¹⁴ De luun a ikav mbi karen kwagh a mi anza ahar, ki vesen kua ki kiriki, ken ya wou ga.

¹⁵ Ka ikaren u vough u mimi ú lu a mi ye; man shi ka ikagh ki karen a mi ki vough ki mimi kpaa, ú lu a mi ye; sha er á seer we ayange ken tar u TER, Aôndo wou, A lu nan we yô.

¹⁶ Gadia mbaeren akaa angan ne, ka mba ve eren dang cii je la, ve mba TER, Aôndo wou, kwagh u ihôngorough je.

¹⁷ Umbur kwagh u Amaleki lu er u sha gbenda, zum u ne due ken Igipiti la;

¹⁸ er a kohol we sha gbenda yô, a wua mba ve lu van we ken ijime, mba ve lu a agee iyol ga, ve gbe ijime la cii, zum u iyol kpe u u vôr la; mayange a cia Aôndo ga.

¹⁹ Nahan yô, zum u TER, Aôndo wou, Una na u mmem sha mbaihomov ou cii mba ve kase u ken tar u TER, Aôndo wou, Una na u u, sha u u̱ ngohol u dyako la yô, ese m-umbur u ma i umbur Amaleki sha won la kera; de hungul ga.