Duteronomi 24 - ICIGHAN BIBILO

¹ Aluer or nana er kwase, nana vôso un man i kera doo nan a kwase la ga, sha ci u nan zough a kwagh u doon ga hen kwase la yô, nahan nana̱ nger un takerada u paven, nana̱ na un sha ikev, nana̱ na un gbenda a̱ due hen ya u nan kera.

² Zum u una due hen ya u nan kera yô, a̱ yem, a̱ za lu kwase u orgen;

³ aluer nom u dondon la kpaa nana venda un yô, nana̱ nger un takerada u paven, nana̱ na un sha ikev, nana̱ na un gbenda er a̱ due hen ya u nan kera yô, shin aluer nom u dondon u nan er un la, nana kpe yô,

⁴ nom na u hiihii u yan na un gbenda kera la, nana kera fatyô u shi eren un, er a vande hôngor kera la ga, gadia ngun ka kwagh u ihôngorough je sha ishigh ki TER; de ve a isholibo sha tar u TER, Aôndo wou, Una na u dyako sha u la ga.

⁵ Aluer or á er kwase u he yô, nana̱ de ze ityav ga, man i̱ de naan nan ma kwagh u eren kpaa ga; nana̱ gba teman a ne nagh hen ya u nan inyom i môm, nana̱ na kwase u nan er la, iember ken ishima.

⁶ Or nana̱ de ngohol nase shin anishwa sha ityungu ga, gadia nahan ka uma u or je nan ngohol ityungu ye.

⁷ Aluer á kohol or nana lu iin or u ken anmgbianev mba nan ken Mbaiserael, nan gema un, una hingir kpan, shin nan ngu teen un yô, ormbaiv la nana̱ kpe; kape ú er man ú dugh ifer ken a we kera ne.

⁸ Ver ishima sha angev mbu imandev, wa iko, er akaa cii a Mbalevi mba ve lu upristi yô, vea tese ne; er m kaa ve nahan, kape ver ishima er nen la.

⁹ Umbur kwagh u TER, Aôndo wou, lu er a Miriam sha gbenda, zum u ne due ken Igipiti la.

¹⁰ Zum u ú pwar anngôu ma kwagh yô, de nyer ken iyou na wer ú za ngohol ityungu na ga.

¹¹ Tile ken won, un or u u pwar un kwagh la, a̱ due a ityungu a̱ va na u ken won.

¹² Aluer una lu icanor yô, de tse a ityungu na ga;

¹³ hide un a ityungu kpee, zum u iyange ka i been nahan, a tsa a ikondo na i cirin man a ver u doo doo; nahan kwagh la una gema á hingir perapera wou sha ishigh ki TER, Aôndo wou.

¹⁴ Ortom u sha tôndo u a lu icanor, or u ibanave yô, de eren nan ican ga, shin nana lu or u ken anmgbianev ou, shin nana lu or u ken ushirmbaiorov mba ken tar wou mba ve nyer u a nyôr la kpaa.

¹⁵ Na nan injar i nan sha iyange i nan, iyange i̱ de mir a i ga, gadia nan ngu icanor je, nan ngu veren ishima i nan sha mi; sha er nana̱ de vaan ieren you a TER, i̱ hingir isholibo hen we ga.

¹⁶ De woo uter sha ci u isholibo i uôn ga; man shi de woo ônov sha ci u isholibo i uter ga; hanma or ka sha ci u isholibo i nan iyol i nan á wua nan ye.

¹⁷ De vihin ijir i shiror shin ancôghol kpaa ga; man de ngohol ikondo i kwasecôghol ityungu ga.

¹⁸ Umbur er u lu kpan ken tar u Igipiti man er TER, Aôndo wou, A paa u ker yô; ka nahan man m kaa u mer, er kwagh ne ye.

¹⁹ Zum u ú sunda iyiagh you ken sule wou man ú hungul ma ile ken sule yô, de hidi wer ú za tôô u ga, u̱ lu sha ci u shiror man wancôghol man kwasecôghol, sha er TER, Aôndo wou, A̱ ver u doo doo sha tom u ave ou cii.

²⁰ Zum u ú gbire olev yô, de kimbir u shi gbiren agbaa ga; kwagh u a shi yô, a̱ lu sha ci u shiror man wancôghol kua kwasecôghol.

²¹ Zum u ú zôr atam a wain ken sule wou yô, de kera hiden yaren twar ga, a̱ lu sha ci u shiror man ancôghol man kwasecôghol.

²² Umbur er ngise u lu kpan ken tar u Igipiti yô; ka nahan man m kaa u mer, er kwagh ne ye.