Duteronomi 22 - ICIGHAN BIBILO

¹ Aluer u nenge bua u anngôu ngu tsumen, shin iyôngo i nan kpaa, de geman ashe kera ga, kpa hide a mi hen anngôu la kpee.

² Man aluer anngôu la, nana lu ikua a we ga, shin wea fa nan ga yô, va a mi hen ya wou, a̱ lu hen we zan zan shighe u anngôu la nana ker un, tsô ú hide nan a mi.

³ Kape ú er a jaki i nan kpaa la; man kape ú er a riga u nan kpaa la; man shi kape ú er a hanma kwagh u a saa anngôu la; kwagh u a saa nan man ú za ande sha mi yô, de gem ashe keela ga.

⁴ Aluer ú nenge jaki i anngôu ia gba sha gbenda shin bua u nan kpaa, de gem ashe kera ga, kpa wase nan u moughon a mi kpee je.

⁵ Kwase nana̱ de hee ikav mbi nomso iyol ga, nomsoor kpaa nana̱ de hee ikondo i ukase ga; gadia hanma or u nana er akaa ne yô, nan ngu TER, Aôndo wou, kwagh u ihôngorough je.

⁶ Aluer ú zua a iya i inyon hen gbenda, sha ma kon, shin hen inya, a ônov shin aji ker, ngô kpaa una uve sha ônov mbala shin sha aji la yô, de ker ngô la a ônov mbala imôngo ga,

⁷ kpa pase ngô la a̱ yem; ônov yô, i rumun er ú tôô; sha er á kpe u iyol man á seer we ayange kpaa yô.

⁸ Zum u ú maa iyou i he yô, wa igyar sha haav mbu i sha, kase cii sha er ú va a ibo i awambe sha iyou you ga, aluer or nana osough sha nana gba yô.

⁹ De lee ivor anza ahar ken sule wou u ikon i wain ga, sha er mtser la cii a̱ de hingir kwagh u á tsegha un sha ci u icighanjiir ga, ivor i u lee la kua atam a ikon i wain la kpaa.

¹⁰ De zough bua vea jaki sha u ve̱ kaha sule imôngo ga.

¹¹ De cirin ikondo i i kor i sha akondo atô ahar ul kua mou ga.

¹² Ta anzôr sha azongo a anyiin a ikondo you i u cir iyol a mi la.

¹³ Aluer or nana er kwase, nana tsa a na man nana gema nana venda un,

¹⁴ nana kôso un sha kwagh u dang, nana za un gwa u bo nana kaa er: M er kwase ne kpa zum u m mgbôghom a na yô, m kera nenge un lu a ikav i iniunugh ga;

¹⁵ nahan ter u wankwase la kua ngô na ve̱ tôô ikav i iniun i kwase la ve̱ va a mi hen mbatamen mba hen gar la sha hundagar,

¹⁶ ter u wankwase la a̱ kaa a mbatamen mbala er: M na or ne wan wam u kwase, a hingir kwase na, kpa a venda un,

¹⁷ man nenge a kôso un sha kwagh u dang, a kaa er: M zua wan wou u kwase a ikav i iniunugh ga; kpa nenge, ka ikav i iniun i wan wam u kwase ne. Nahan ve̱ samber ikondo la, sha ishigh ki mbatamen mba hen gar la.

¹⁸ Nahan mbatamen mba hen gar la ve̱ kôr or la ve̱ tsaha nan;

¹⁹ ve̱ ya nan zwajirigh sha ushekel mba azurfa deri, ve̱ na ter u wankwase la, sha ci u nan ze iniunkwase i Iserael gwa u bo yô; shi una lu kwase u nan kpaa sha ayange a uma u nan cii, nana fatyô u paven a na ga.

²⁰ Kpa aluer kwagh la a lu mimi je, i zua wankwase la a ikav i iniunkwase ga yô,

²¹ ve̱ due a wankwase la hen hunda u ya u ter na, nomsombaiorov mba hen gar na la ve̱ ta un awen a̱ kpe sha ci u a er ibumekwagh ken Iserael, er a er idya ken ya u ter na yô; kape ú er man ú dugh ifer ken a we kera ne.

²² Aluer á kohol or nana lu yaven a kwase u orgen yô, ve̱ uhar cii ve̱ kpe, or u a yav a kwase la, man kwase la kpaa; kape ú er man ú dugh ifer ken Iserael kera ne.

²³ Aluer wankwase u a lu iniun u a tende zwa a nom man orgen nan gem nan zough a na ken gar, nan yav a na yô,

²⁴ due nen a ve uhar cii hen hundagar la, ta nen ve awen ve̱ kpe, un wankwase la yô, ka sha ci u a lu ken gar je, kpa a gbir vaa ga yô, man or la yô, ka sha ci u nan hee kwase u or u nan we ndor a nan yô; kape ú er man ú dugh ifer ken a we kera ne.

²⁵ Man aluer or la nana kohol wankwase u i sôôr un a sôôr la ken toho man nana kighir un sha apera, nana yav a na yô, or u nan yav a na la, nana̱ kpe tswen;

²⁶ kpa wankwase la yô, de eren un kwagh ga; hen wankwase la ma isholibo i kuman ku ngi ga, gadia kwagh ne ngu er or u nan te num sha anngô u nan, nan woo un yô;

²⁷ gadia nan kohol un ken toho, un wankwase u i sôôr un la, a gbile vaa, kpa ma or u yiman un lu ga.

²⁸ Aluer or nana zua a wankwase u a lu iniun, kpa i lu a sôôr un ga, man nan kôr un nan yav a na man á kohol ve yô,

²⁹ or u nan yav a na la, nana̱ na ter u wankwase la ushekel mba azurfa akunduahargber, a̱ maa a̱ hingir kwase u nan sha ci u nan hee un yô; sha ayange a uma u nan cii nana fatyô u paven a na ga.

³⁰ Or nana̱ de vese kwase u ter u nan ga, man nana̱ de bughun ikondo i ter u nan ga.