Duteronomi 2 - ICIGHAN BIBILO

¹ Tsô se mough se ver ishigh hen desereti, se gba yemen sha gbenda u zan hen Zegemnger u Nyian la, er TER kaa nahan; se ningir hen uwo u Seir ayange kpishi;

² tsô TER ôr kwagh a mo kaa er:

³ Ne ningir uwo ne kuma; yô, gema nen ver nen ishigh vegher u ken imbusutarimese.

⁴ Kaa ior wer: Karen yen hegen sha tar u anmgbianev enev ônov mba Isou, mba ve tem sha Seir la; vea cia ne; yô, ver nen ayol a en dedoo,

⁵ de nenge nen num a ve ga, gadia Me pande tar ve Me na ne ga, shin côhin er ikevnguhar nahan tsô kpaa ga, sha ci u M vande nan Isou uwo u Seir hingir kwagh na je.

⁶ Yam nen kwaghyan a ve sha inyar sha u né yaan yô; mngerem kpaa, yam nen a ve sha inyar sha u né maan yô.

⁷ Gadia TER, Aôndo wou, ver u doo doo sha tom wou u aveegh cii; A fa zende wou u ken zegedeserti ne; anyom akunduahar ne, TER, Aôndo wou, lu a we imôngo; ma kwagh ban u ga.

⁸ Nahan se kar hen anmgbianev asev ônov mba Isou, mba ve tem ken Seir la, se gbihi gbenda u Araba la kua Elati man Eshion-geber ijime. Se gema, se gba yemen gbenda u zan ken desereti u Moabi la.

⁹ TER kaa a mo er: De bamen Moabi ga, man de nenge num a ve kpaa ga; gadia Me pande tar ve, Me na u Mer u̱ hingir kwagh wou ga, sha ci u M vande geman Ar, M na ônov mba Loti hingir kwagh ve.

¹⁰ (Tsuaa yô, lu Mbaemi tema hen ijiir la ye, ve lu ior mba gban akôr, ve ngee, shi ve tav er Mbaanaki nahan;

¹¹ mban kpaa i nengen ve er ka Mbarefai, vough er Mbaanaki nahan; kpa Mbamoabi yilan ve er Mbaemi.

¹² Tsuaa la yô, lu Mbahori ve tema hen Seir ye; kpa ônov mba Isou ve ngohol tar ve la, gema tim ve sha ishigh vegh kera, maa ve kar ve tema ker, vough er Iserael kpaa er a tar u TER na ve, ve ngohol u la nahan.)

¹³ Hegen yô, mough nen, per nen uwagh u Seredi. Tsô se mough se per uwagh u Seredi.

¹⁴ Ayange a zende wase cii, hii hen Kadeshi-barnea zan zan per uwagh u Seredi yô, lu anyom ikundugber kar anigheni zan zan mbautyav mba kov la cii ve kpe ve bee ken afo er TER bum a ve yô.

¹⁵ Gadia uwegh ku TER lu ihom a ve, A tim ve ken afo kera, ve kpe je, ve bee.

¹⁶ Tsô zum u mbautyav cii, ve kpe ve bee ken ior yô,

¹⁷ TER ôr kwagh a mo kaa er:

¹⁸ Nyian ú kar hen Ar sha ikighirtar i Moabi.

¹⁹ Zum u ú va mgbôghom a ônov mba Amon yô, de bamen ve ga, de nenge num a ve kpaa ga, gadia Me pande tar u Amon me na u ga, sha ci u ka ônov mba Loti M ne ve u, u hingir u ve ye.

²⁰ (U kpaa i nenge u er ka tar u Mbarefai; Mbarefai tema ker tsuaa la, kpa Mbaamon yô, ve yilan ve er Mbasamsumi;

²¹ lu ior mba gban akôr, ve ngee ve tav er Mbaanaki nahan, kpa TER tim ve sha ishigh vegh kera, ve ngohol tar ve, ve kar ve tema ker;

²² er A er a ônov mba Isou mba ve tema ken Seir la nahan, zum u A tim Mbahori sha ishigh vegh kera la; ve ngohol tar ve, ve kar ve tema ker zan zan nyian;

²³ man Mbaavi mba ve tema ken angarev zan zan za ar hen Gasa la kpaa, Mbakafetor mba ve za va ken Kafetor la ve va tim ve kera, ve kar ve tema ker.)

²⁴ Mough yem nen za per nen pev u Arnon, nenge, M na Shihon Oramor tor u Heshebon a tar na cii sha ikev you; yô, gba ase mi ngohol u je, nôngo ityav a na.

²⁵ Nyian je, Me hii u haan mcieryol wou man mciem ma á cian we sha akuraior a sha won cii; mba vea ungwa kwagh wou, vea gbire akarkase iyol, asema á yina ve sha ci wou.

²⁶ Ken desereti u Kedemoti la, m tindi mbatyomov hen Shihon tor u Heshebon, a akaaôron a bem, m kaa mer:

²⁷ De, m̱ kar hen tar wou, me za sha gbenda gbenda, me kaha ken iyan shin ken imese kpaa ga.

²⁸ Kwaghyan kpaa, teem a tee sha inyar m̱ ya; mngerem kpaa nam sha inyar m̱ ma, kpa de m̱ kar sha angahar a am,

²⁹ er ônov mba Isou mba ve tem hen Seir, man Mbamoabi mba ve tem ken Ar, ve er a mo la nahan, zan zan me per Yordan me nyôr ken tar u TER, Aôndo wase, A lu nan se la.

³⁰ Kpa Shihon tor u Heshebon rumun u se̱ kar her a na ga, gadia TER, Aôndo wou, taver jijingi na, cighir un ishima kpaa, sha u Una na un sha ikev you er i lu nyian nahan.

³¹ TER kaa a mo er: Nenge, M hii u nan we Shihon a tar na ve; yô, gba ase mi ngohol je, ngohol tar na u̱ hingir u wou.

³² Tsô Shihon due gba van hen vese a ishima i num, un a ior nav cii, sha u va nôngon ityav hen Yahashi.

³³ Kpa TER, Aôndo wase, gema na un sha ikev yase, se hemba un a ônov nav kua ior nav cii.

³⁴ Se ngohol agar a na cii hen shighe la, se tim hanma gar purututu, nomsombaiorov mba keregh man kasev man mbayev mba kiriki kpaa se de or môm nan war ga,

³⁵ saa uzendenya tseegh, se ye ishar sha mi ye, kua ishar i sha agar a se hemba a la kpaa.

³⁶ Hii hen Aroer u a lu hen kpe u pev u Arnon man gar u shin pev la, zan zan za ar hen Gileadi, ma gar môm hemba se ga; TER, Aôndo wase, na se a cii;

³⁷ saa tar u ônov mba Amon la tseegh u mgbôghom a u ga ye, ka kpewaghegh u Yaboki cii, man agar a sha tar u iwoogh kua hanma ijiir i TER, Aôndo wase, A yange se yô.