Duteronomi 18 - ICIGHAN BIBILO

¹ Mbalevi mba ve lu upristi, kwe u Levi la cii, mba a kwar shin dyako a Mbaiserael imôngo ga; vea yaan iniav mbi usuv mbi TER kua dyako Na.

² Una zua a ma dyako ken anmgbianev nav ga; ka TER A lu dyako na ye, er A kaa un nahan.

³ Kwar u upristi vea zua a mi hen ior mba ve ne nagh sha bua shin sha iyôngo yô, ka u né naan pristi kpaakpawe man ahenge ahar kua ihir.

⁴ Iyiav mbi tsutswav you, alakema wou man wain wou man mkurem ou man aive a tôndon a hiihii a iyôngo you, ú na un.

⁵ Gadia TER, Aôndo wou, tsuwa un ken ikwe you cii, sha u a̱ tile a̱ eren tom ken iti i TER, un a ônov nav gbem sha won.

⁶ Aluer ma Orlevi nana due ken ma gar u ken Iserael cii, u nan lu shir ker la, nana va a ishima i nan cii, hen ijiir i TER Una tsuwa la yô,

⁷ nahan nana er tom ken iti i TER, Aôndo u nan, er anmgbianev mba nan Mbalevi cii, mba ve til sha ishigh ki TER nahan;

⁸ kwar u kwaghyan u vea yaan yô, ua lu môm, á wa kwagh u nan zough a mi sha dyako u nan u nan tee la ker ga.

⁹ Zum u ú nyôr ken tar u TER, Aôndo wou, Una na u la yô, de henen u eren aeren a ihôngorough a akuraior la ga.

¹⁰ Or u nan er wan u nan u nomso shin u kwase a kar ken usu, i̱ de zough a nan ken a we ga, shin or u kpehen ishor, shin or u eren ahir, shin or u pasen uivande, shin or u lamen ishor,

¹¹ shin or u yangen akombo, shin or u nan pin jijingi u orkpen kwagh, shin nan pin jijingi u tsengan pasen akaa kwagh, shin or u lamen a mbakpenev.

¹² Gadia hanma or u nan eren akaa angan cii, nan ngu TER kwagh u ihôngorough je; ka sha ci u akaa a ihôngorough ne man TER, Aôndo wou, A lu zendan ve sha ishigh you kera ye.

¹³ Lu vough sha ishigh ki TER, Aôndo wou.

¹⁴ Gadia akuraior a ú zenda a la, nga veren ishima sha mbaahiriv man mbaasorov, kpa we yô, TER Aôndo rumun er ú er nahan ga.

¹⁵ TER, Aôndo wou, Una ver u Profeti, Una due hen atô wou ken anmgbianev ou je, er mo nahan, ka Un né ver ato sha a Na ye.

¹⁶ Ka vough er u sôn TER, Aôndo wou, hen Horebi sha iyange i mkohol la, u lu kaan wer: M̱ de kera ungwan imo i TER, Aôndo wam, ga, man m̱ de kera seer nengen zegeusu ne kpaa ga, sha er me kpe ga yô.

¹⁷ Nahan TER kaa a mo er: Kwagh u ve kaa la, ve kaa vough.

¹⁸ Me ver ve Profeti, Una due ken anmgbianev vev, er we nahan; Me na akaaôron Am ken zwa Na, Una ôr ve akaa cii a Me kaa Un yô.

¹⁹ Nahan hanma or u nana ver ato sha akaaôron Am a Una kaa ken iti Yam ga yô, Mo Me pine nan kwagh la.

²⁰ Kpa profeti u nana cihi nana ôr kwagh ken iti Yam, u M kaa a nan Mer nana̱ ôr ga, shin nana ôr kwagh ken iti i mbaaôndo mbagenev yô, profeti la nana̱ kpe.

²¹ Kpa aluer u kaa ken ishima you wer, á er nan man sé fa kwagh u i lu TER A kaa un ga laa?

²² Yô, zum u ma profeti nana ôr kwagh ken iti i TER man kwagh la una er nahan ga, man una lu nahan kpaa ga yô, kwagh la, TER kaa un ga; profeti la gba ôron un sha icihi tsô; yô, de cie nan ga.