Duteronomi 16 - ICIGHAN BIBILO

¹ Wa uwer u Abiba iko, er TER, Aôndo wou, Paseka; gadia ka ken uwer u Abiba TER, Aôndo wou, due a we ken Igipiti tugh ye.

² Naan TER, Aôndo wou, nagh ku Paseka sha iyôngo man ibua hen ijiir i TER, Aôndo wou, Una tsuwa sha u veren iti Na ker la.

³ De kera ye bredi u i we kwa sha mi a na imôngo ga; ayange ataankarahar la cii, yaan bredi u i we kwa sha mi ga yô, a na imôngo, ka bredi u ican je la; gadia iyange u due ken tar u Igipiti fele fe fele; sha er u̱ umbur iyange i u due ken tar u Igipiti la sha ayange a uma wou cii yô.

⁴ Ayange ataankarahar la cii, i̱ de nengen a kwa ken tar wou je ga; ma ivurugh ki inyam i u ne nagh mi aikighe sha iyange i hiihii la ki̱ de luun her zan zan sev mbu aven ga.

⁵ I rumun er u̱ na nagh ku Paseka ken ma gar u TER, Aôndo wou, A lu nan we la ga,

⁶ saa hen ijiir i TER, Aôndo wou, Una tsuwa sha u Una ver iti Na i̱ lu ker la; ka her man ú na nagh ku Paseka aikighe, sha mmir u iyange, sha shighe u u due ken Igipiti la vough.

⁷ Ú jiir un, ú ya hen ijiir i TER, Aôndo wou, Una tsuwa la; kper nan yô, ú gema ú hide hen utenti ou.

⁸ Ayange ataratar cii, yaan bredi u i we kwagh sha mi ga yô; sha iyange i ataankarahar la, ú er icighanmkohol u TER Aôndo wou; iyange la de eren ma tom ga.

⁹ Ôr iyenge i ulahadi, ve̱ kuma utaankaruhar; hii sha shighe u nyôron a loji u sundan iyiagh you la je, ú ôr ulahadi utaankaruhar ye.

¹⁰ Er TER, Aôndo wou, iniongo i ulahadi sha nagh ku sha ishima i dedoo ku sha uwegh ough ku ú na sha iveren i TER, Aôndo wou, A ver u yô;

¹¹ ember sha ishigh ki TER, Aôndo wou, we man wan wou u nomso man wan wou u kwase man kpan wou u nomso man kpan wou u kwase man Orlevi u nan nyer u a nyôr, man shiror man ancôghol kua kwasecôghol mba ve lu a we, hen ijiir i TER, Aôndo wou, Una tsuwa sha u Una ver iti Na i̱ lu ker la.

¹² Umbur er ngise u lu kpan ken Igipiti yô, waan akaawan ne cii iko eren sha a kpaa.

¹³ Er iniongo i atumbe ayange ataankarahar zum u ú bee u kohol akaa sha vande wou u gbidyen alakema man sha ihungwa you i shoghol wain la.

¹⁴ Ember sha iniongo you, we man wan wou u nomso man wan wou u kwase man kpan wou u nomso man kpan wou u kwase man Orlevi man shiror man ancôghol kua kwasecôghol mba ve nyer u a nyôr yô.

¹⁵ Ayange ataankarahar er TER, Aôndo wou, iniongo hen ijiir i TER Una tsuwa, gadia TER, Aôndo wou, Una ver u doo doo sha mtser wou cii man sha tom u sha ave ou cii, ú mgbough a iember dedoo.

¹⁶ Ken inyom i môm, nomsombaiorov ou cii ve̱ va sha ishigh ki TER, Aôndo wou, kwa tar, hen ijiir i Una tsuwa la; ka sha iniongo i bredi u i we kwa sha mi ga yô, man sha iniongo i ulahadi, man sha iniongo i atumbe; ve̱ de ve sha ishigh ki TER ave gbilin ga;

¹⁷ hanma or nana̱ va na er nan fetyô yô, sha iveren i TER, Aôndo wou, A ver u yô.

¹⁸ Ver mbaajiriv man mbavesen ken agar a ou cii, a TER, Aôndo wou, Una na u, sha ikwe you yô; ve̱ ôron ior ijir sha mimi.

¹⁹ De geman ijir ga; shi de hembe wan orgen iko a orgen ga, man shi de ngohol iwua ga; gadia iwua i cirin mbafankwagh ashe, shi i gem akaaôron a mba ve lu a ibo ga la.

²⁰ Ka mimi tseegh ú keren ye, sha er ú lu uma, ú ya dyako u tar u TER, Aôndo wou, Una na u yô.

²¹ De timin ityôgh ki hanma injakon er ka Ashera hen atse a nan nagh sha mi a TER, Aôndo wou, a u te a la ga.

²² Man shi de timin ma ityôgh ki iwenegh ga, kwagh u a vihi TER, Aôndo wou, la.