Duteronomi 15 - ICIGHAN BIBILO

¹ Sha mbee u hanma anyom ataankarahar yô, de injô.

² Mde u ú de injô la, ka nahan: Or u nan injô, nana̱ de injô i nan ne u a we ndor a nan la; nana̱ de cirin or u a we ndor a nan man nan lu anngô u nan kpaa yô, injô ga; gadia i yôô mde u injô u TER.

³ Kpa or u nongo ugen yô, i rumun er ú cir nan injô, kpa hanma kwagh wou u a lu hen anngôu yô, de a̱ saa.

⁴ Icanor nana̱ de lu hen we ga, gadia TER Una ver u dedoo ken tar u TER, Aôndo wou, Una na u dyako er ú ngohol u la,

⁵ aluer u ver ato dedoo sha imo i TER, Aôndo wou, ú waan atindi a m we u nyian ne cii iko yô.

⁶ Gadia TER, Aôndo wou, Una ver u doo doo er A tôndo zwa a we nahan, ú pwar akuraior kpishi akaa, kpa we yô, u pwar kwagh ga; ú ya tor sha akuraior kpishi, kpa we yô, vea ya tor sha a we ga.

⁷ Aluer ma icanor á lu hen a we, á lu mô anngôu, ken ma gar ken tar wou u TER, Aôndo wou, A lu nan we la, yô, de cighir ishima you ga, de kusun uwegh ough a anngôu u a gbe ican la ga;

⁸ kpa bugh uwegh ough kpee je, pwar un kwagh a̱ kuma sha kwagh u a gbe un la;

⁹ kura iyol you, mhen u dang, a̱ de lu ken ishima you, er ú kaa wer; inyom i sha utaankaruhar, inyom i den injô la mgbôghom ve, ga, man ú gba kenger anngôu u a gbe ican la dang, ú nyume un kwagh man una gema á vaa ieren you la a TER; nahan yô, hingir isholibo je u er ye.

¹⁰ Na un kpee, i̱ de vihin we, shighe u u lu nan un la kpaa ga, gadia ka sha ci u kwagh ne je man TER, Aôndo wou, Una ver u dedoo sha tom wou cii man sha hanma kwagh u u ker ave sha mi kpaa ye.

¹¹ Gadia mayange mbaatsanev vea bee sha tar ga, ka nahan man m kaa Mer, bugh uwegh ough, wase anngôu man or u kwagh a gbe nan man icanor ken tar wou ye.

¹² Aluer anngôu or u Heberu shin kwase u Heberu nana tee iyol i nan wea yam yô, nana̱ er u tom u kpan anyom a taratar, inyom i sha utaankaruhar la pase nan, nana̱ due hen we, nana̱ yem.

¹³ Kpa aluer ú pase nan wer nana̱ due hen awe yô, de deen, nana̱ yemen ave gbilin ga;

¹⁴ wa nan ikav dedoo, pande ilev you man kwagh u sha vande wou u gbidyen alakema sha mi la, man sha ihungwa you i shoghol wain shimi, na nan sha mver u TER, Aôndo wou, A ver u yô.

¹⁵ Umbur er ngise u lu kpan ken tar u Igipiti man TER, Aôndo wou, paa u yô; ka nahan man M kaan we kwagh ne nyian ye.

¹⁶ Man aluer nana kaa a we er: Me due hen we ga, sha ci u u doo nan ishima kua ya wou kpaa, man sha ci u mtem u nan tem a we la doo nan yô,

¹⁷ tôô suagh pev nan togh i̱ kôr ken hunda, nahan una lu kpan wou gbem. Kape ú er a kpan wou u kwase kpaa la.

¹⁸ I̱ de vihin we u pasen nan nana̱ yem ga, gadia tom u nan er u anyom ataratar la, kuma injar i ortom u sha tôndo kwa har; TER, Aôndo wou, Una ver u doo doo sha hanma kwagh u u eren yô.

¹⁹ Ônovmbaiundav mba ibua you man iyôngo you i mar cii, mba ve lu anom yô, tsegha TER, Aôndo wou, ve; de eren tom a gumbua u iunda wou ga, man de tende aive a gumiyôngo u iunda wou kpaa ga.

²⁰ We man ior ou, yaan nen ve sha ishigh ki TER, Aôndo wou, anyom anyom hen ijiir i TER, Aôndo wou, Una tsuwa la.

²¹ Man aluer una lu a ma ihogholough yô, de ne TER, Aôndo wou, nagh sha mi ga.

²² Ka ken uya ou ú yaan un ye; mba ve lu wang ga kua mba ve lu wang cii, ve̱ gba yan tsô, er ka i yaan inyam i ashim man morya nahan;

²³ saa awambe na tsô, de ye a ga, haa a inya er mngerem nahan.