Duteronomi 14 - ICIGHAN BIBILO

¹ Ne mba ônov mba TER, Aôndo wen, je; nahan yô, de gberen nen avav iyol ga, shi de torough nen ityough hen icul sha ci u or u nan kpe ga.

² Gadia u ngu TER, Aôndo Wou, icighanikurior je; ken akuraior sha won cii, ka we, TER A tsough u, u hingir ikurior Na jim ye.

³ De ye ma kwagh u ihôngorough ga.

⁴ Ishôso i né yaan yô, ka i ne: bua man iyôngo kua ivo,

⁵ ashim man morya man ikpam man ivambe man ishuhu man kpo man makpe.

⁶ Man hanma swase u u pav apande ahar, a pav dedoo man a kengese kwaghyan yô, ka i né yaan je la.

⁷ Nahan igen i i kengese kwaghyan man i pav apande i né yaan i ga yô, ka rakumi man alôm man ikuwa, gadia ve mba kengese kpa ve pav apande ga, nahan ve̱ lu ne kwagh u a lu wang ga yô;

⁸ igo kpaa, gadia i pav apande kpa i kengese kwaghyan ga, nahan i kpaa i̱ lu ne kwagh u a lu wang ga yô, de ye nen inyam i i ga, gundu u i tsô kpaa, de benden nen a min ga.

⁹ Akaa a shin mnger a né yaan di yô, ka a ne: Hanma kwagh u a lu a atsaase man avuu yô, ka ve né yaan ye;

¹⁰ man hanma kwagh u a lu a atsaase man avuu ga yô, de ye nen ga, a̱ lu ne kwagh u a lu wang ga yô.

¹¹ Inyon i wang cii yô, i rumun er né ya.

¹² Kpa i né yaan ga yô, ka i ne: iguve man gafa man iwua;

¹³ man azembe man ajanta, anza la cii;

¹⁴ man hanma inja gugôô, anza la cii;

¹⁵ man konkofi man kpire man shimiu man kunkure, anza la cii;

¹⁶ man kaaki man ivungu man akiki;

¹⁷ man akumedu man apu man ayaicambev;

¹⁸ man ôô—ôô man ipevnor, anza la cii; man inyonalôm man inima.

¹⁹ Ankaam ma ma lu a ingur cii, ma̱ lu ne kwagh u a lu u wang ga yô, de ye nen ma ga.

²⁰ Inyon i wang cii yô, i rumun er né ya.

²¹ De ye nen ma kwagh u a gbe kpen tsô la ga; kpa i rumun er u̱ na shiror u nan va nyer u a nyôr la, nana̱ ya; gayô, tee, or u ken nongo ugen nana̱ yam, gadia u ngu TER, Aôndo wou, icighanikurior je. De jiir wanivo sha atumba a ngô na ga.

²² Dughun môm-ken-upue u iyiav youv mbi u zough a mi ken sule wou anyom anyom la.

²³ Ijiir i TER, Aôndo wou, Una tsuwa sha u veren iti Na i̱ luun ker yô, ka hen i, ú yaan môm-ken-upue u iyiav you sha ishigh ki TER, Aôndo wou ye, kua u wain wou man u mkurem ou man ônovmbaiundav mba ibua you man iyôngo you kpaa, sha er ú hen u cian TER, Aôndo wou, gbem yô.

²⁴ Man aluer ijiir la ia gba u ca yum, wea fatyô u zan a mi her ga yô, sha ci u ijiir i TER, Aôndo wou, Una tsuwa sha u veren iti Na ker, i gbe u ca yum yô, zum u TER, Aôndo wou, Una ver u dedoo la,

²⁵ nahan gema akaa la tee, yam inyaregh a mi, kange inyaregh kila kôr sha uwe, za hen ijiir i TER, Aôndo wou, Una tsuwa la,

²⁶ gema inyaregh kila yam hanma kwagh u a sar u cii a mi, shin a lu ibua, shin a lu iyôngo, shin a lu wain, shin a lu kwaghman u taver, shin nyityô kwagh i i sar u kpaa; ya heregh sha ishigh ki TER, Aôndo wou, ember, we a ior ou.

²⁷ Orlevi u nan nyer u a nyôr kpaa, de nengen sha nan dang ga, gadia nan ngu a kwar shin dyako a we imôngo ga.

²⁸ Sha mbee u hanma anyom atar yô, dugh môm-ken-upue u iyiav mbi u zough a mi ken inyom la cii, va ver hen ihindagar you;

²⁹ Orlevi (sha er nan lu a kwar shin dyako a we imôngo ga yô) man shiror man ancôghol man kwasecôghol mba ve nyer u a nyôr yô, ve̱ va ya, i̱ kuma ve; sha er TER, Aôndo wou A̱ ver u dedoo ken tom u u eren sha ave ou cii yô.