Duteronomi 13 - ICIGHAN BIBILO

¹ Aluer ma profeti una mough her a we, shin or u mnyam ma cien nan, una tese u ma ivande shin kwagh u kpilighyol,

² man ivande la shin kwagh u kpilighyol la á va er sha mi vough, sha kwaghôron u a vande ôron we sha mi er: Sé dondo nen mbaaôndo mbagenev mba u fe ve ga, sé civir nen ve,

³ yô, de veren ato sha akaaôron a profeti la, shin or u mnyam ma cie nan la ga; gadia TER, Aôndo wen, ngu karen ne a kar sha er Una fa shin TER, Aôndo wen, doo ne ishima a ishima yen cii man a uma wen cii kpaou.

⁴ Dondo nen TER, Aôndo wen, cian nen Un, waan nen atindi Na iko, ungwa nen imo Na, civir nen Un, Var nen a Na.

⁵ Profeti shon la, shin or u mnyam ma cie nan la, i̱ wua nan sha ci u nan tese er i̱ hendan kwagh a TER, Aôndo wen, u A dugh a ven ken tar u Igipiti A paa u hen ya u ikpan la yô; sar nan ka urugh we sha gbenda u TER, Aôndo wou, A kaa u er u̱ za sha mi la kera. Kape ú er man ú dugh ifer ken a we kera ne.

⁶ Aluer anngôu u ngô môm, shin wan wou, shin wan wou u kwase, shin kwase wou u ishima ishima, shin huror wou u a lu er ka uma wou nahan je, una mee u myer, er: Sé za civir nen mbaaôndo mbagenev, mba u fe ve ga, uter ou kpaa ve fe ve ga yô,

⁷ ka mbaaôndo mba akuraior a a kase ne a a lu ikua ikua a we, shin a a gbe ca a we kpaa, hii hen ikighirtar ingin zan zan za ar ikighirtar igen je,

⁸ de rumun kwagh la a na ga, shi de ongo imo na kpaa ga; a̱ de ker u mhôônom ashe ga, de zungu un mhôônom ga, de yeren kwagh na la ga,

⁹ kpa wua un kpee; uwegh ough ku̱ vande lun sha a na sha u wuan un man ave a ior mbagenev cii aa mase ye.

¹⁰ Ta un awen, a̱ kpe, sha ci u a nenge u urugh we er, u̱ undu TER, Aôndo wou, u A dugh a we ken tar u Igipiti ken ya u ikpan la yô.

¹¹ Nahan Iserael cii vea ungwa, vea cia, mayange vea kera seer eren ma injaifer er ingin nahan ken a we ga.

¹² Aluer u ungwa mba ôron kwagh ken ma gar wen u Aôndo wou Una na u sha u ú za tema ker la, mba kaan er:

¹³ Agbilinaior agen due ken a we je ve urugh mba ken gar ve, mba kaan er; Sé za nen, sé za dondo nen mbaaôndo mbagenev mba ne fe ve ga yô,

¹⁴ yô, time kwagh la, tôv, pine dedoo, aluer kwagh la una lu nahan mimi keng je, er i er kwagh u ihôngorough ne ken a we yô,

¹⁵ tim mba ve tem ken gar la sha zwa u sanker, ú tim un purututu a akaa a a lu kimi cii, kua uzendenya mba ker kpaa, sha zwa u sanker.

¹⁶ Kohol ishar i ker cii, haa hen atô u tembe na, nande gar la sha usu kua ishar na jimin cii, sha ci u TER, Aôndo wou, a̱ hingir tihialôgh gbem sha won, i̱ de kera shi maan un mayange ga.

¹⁷ Ma kwagh u i tswer un, de saan a mi ga, sha er TER A̱ de iyugh Na i tsung la, A̱ zungwe u mhôônom, mhôônom ma kôr Un a we, A̱ seer we iyenge er A̱ bum a uter ou nahan,

¹⁸ aluer u ver ato sha imo i TER, Aôndo wou, ú waan atindi a Na iko cii, a m we u nyian ne, sha er ú er kwagh u a lu vough sha ashe a TER, Aôndo wou yô.