Duteronomi 10 - ICIGHAN BIBILO

¹ Tsô hen shighe la TER kaa a mo er: Kua ikpandeawen ihiar er i tsuaa la nahan, shi unde sha uwo va hen Mo, man shi er areki sha ikon;

² nahan Me nger kwaghôron u yan lu sha ikpande i tsuaa i u hembe i la, sha i; gema i wa ken areki.

³ Tsô m er areki sha kon u saa, shi m kua ikpande ihiar er i tsuaa la nahan, maa m unde sha uwo la, m lu a ikpande ihiar la sha ave am.

⁴ Nahan A nger sha ikpande la er mnger u tsuaa la nahan, Atindiakaa a pue, a TER ôr ne sha uwo la ken atô u usu sha iyange i mkohol la; tsô TER gema i nam.

⁵ Nahan m gema m hungwa sha uwo, m va wa ikpande la ken areki u m er la; ngi ker je er TER kaam yô.

⁶ (Tsô Mbaiserael hembe hen Beeroti Bene-Yakan yem hen Mosera; Aron maa kpe her, i ii un her; wan na Eleasar tema sha tom u pristi sha ityough nagh.

⁷ Ve hembe heera ve yem hen Gudugoda; hen Gudugoda ve hembe, ve yem hen Yotibata, tar u lun a iwagh.)

⁸ Hen shighe la je TER maa tsegha kwe u Levi er ve̱ tôôn areki u ikuryan i TER man ve tilen sha ishigh ki TER, ve̱ eren Un tom, man sha u ve̱ naan iveren ken iti Na kpaa, zan zan va ar nyian ne.

⁹ Ka nahan man Levi a kera lu a kwar shin dyako a anmgbianev nav imôngo ga ye; ka TER je A lu dyako na ye, er TER, Aôndo wou, kaa un nahan.

¹⁰ Tsô m tsa sha uwo la er tsuaa la nahan, ayange akunduahar man aime akunduahar; hen shighe la kpaa TER shi ungwam; kera sar TER u timin we ga.

¹¹ TER shi kaa a mo er: Mough, hemen ior mban, ve̱ nyôr, ve̱ ngohol tar u M bum a uter vev Mer Me na ve la.

¹² Hegen yô, Iserael, ka nyi TER, Aôndo wou, A keren her a we, saa di u cian TER, Aôndo wou, tsô, man u zenden sha igbenda Na cii, man A̱ doo u ishima, man u̱ eren TER, Aôndo wou, tom a ishima you cii, man a uma wou cii,

¹³ man u̱ waan atindi a TER iko kua akaawan a Na a m we u nyian ne, sha er á kpe u iyol yô.

¹⁴ Nenge, Sha kua Sha u a lu sha je la, ka u TER, Aôndo wou, je, kua tar man akaa a lu sha u cii kpaa.

¹⁵ Gema ka uter ou, TER A pende ishima sha ve ye, ve doo Un ishima; ken akuraior cii, ka tsombor ve ken ijime ve A tsuwa u ye, ka ne je ne, er i lu nyian nahan.

¹⁶ Yô, tsôngo nen ipusu i asema a en, de kera shi luun nen mba nômbon ikôr ga.

¹⁷ Gadia TER, Aôndo wen, Un ka Aôndo u mbaaôndo man Ter u uter, ka Aôndo u hemban, u ageegh, u cieryol, u sangen a sange ga, ngohol inyaregh kpaa ga;

¹⁸ er ijir sha ci u ancôghol man kwasecôghol, shiror doo Un ishima, ne nan kwaghyan man akondo kpaa.

¹⁹ Yô, ne kpaa shiror a̱ doo ne ishima, gadia ne kpaa yan ne lu ushirmbaiorov ken tar u Igipiti.

²⁰ Ka TER, Aôndo wou, cian Un ye, ka Un kpaa eren Un tom, ka Un var ken Na, shi ka ken iti Na kpaa bumun nen ye.

²¹ Ka un ú wuese Un ye, Un ka Aôndo wou, u A er u uzegembaakaav mba cieryol mban, mba u nenge a mi sha ashe ou ne.

²² Uter ou yan yem ken Igipiti, lu ior akunduatargber tsô; ahegen yô, TER, Aôndo wou, gema u u ngee, iyenge you hingir er asan a Sha nahan.