Daniel 9 - ICIGHAN BIBILO

¹ Sha inyom i hiihii i Dariu wan u Ahasueru, u ken tsombor u Mbamedia, u i ver un tor sha tartor u Mbakaldi,

² sha inyom i hiihii i mtemtor na la, mo Daniel m nenge ken ruamabera, iyenge i anyom i TER ôr profeti Yeremia, sha u kuren kwagh u mvihi u Yerusalem la, lu anyom akunduatargber je.

³ Nahan m gema ishigh hen Ter Aôndo, sha u eren msen man uzamber a kwaghyan u hôron man a ikondo i tan uya man a mtwem.

⁴ Tsô m sôn TER, Aôndo wam, m rumun ibo kpaa, m kaa mer: Tere, Aôndo u hemban, u cier iyol, u U we ikuryan man mhôônom ma zungwen iko a mba U doo ve ishima man mba ve eren sha atindiakaa a Ou kpaa yô;

⁵ se er isholibo, se er kwagh u dang, se er ifer, se hendan kpaa, se kaha se undu atindi a Ou man ajiraôron a Ou kpaa;

⁶ se ver ato sha mbatomov Ou uprofeti kpaa ga, mba ve lu ôron kwagh ken iti You a utor asev man mbatarev asev man uter asev kua ior i tar la cii.

⁷ Ka We U lu a perapera ye, Tere; kpa se yô, gema ka ahenge a van, er i lu nyian nahan; hen ior i Yuda man hen mba ve tem ken Yerusalem man hen Iserael cii, mba ve lu ikua man mba ve lu ca, ken ityar i U sambe ve la cii, sha ci u mimi ga ve u ve er a We sha mimi ga la.

⁸ Ka hen vese, TERE, ahenge a van a lu ye, hen utor asev man hen atiator a ase man hen uter asev, sha ci u se er U isholibo yô.

⁹ Ka hen TER, Aôndo wase, mhôônom ma zungwen man mde u asorabo ve lu ye; gadia se hendan a Na;

¹⁰ se wa imo i TER, Aôndo wase, iko sha u zenden sha atindi a Na, a A ver se sha ishi sha ikev i mbatomov Nav uprofeti la ga.

¹¹ Iserael cii per atindi a Ou, ve kaha, ve kera wa imo You iko ga; ka nahan man i we se ifan, man mbum u i nger ken atindiakaa a Mose, ortom u Aôndo la, a ker se kpaa ye; gadia se er Un isholibo.

¹² A er sha akaaôron a Na vough a A ôr sha a vese man sha mbaajiriv asev mba ve er se ijir la, sha u van a zegekwaghbo sha a vese; gadia sha won cii, mba a er imbakwagh i i er a Yerusalem ne nahan ga.

¹³ Er i nger ken atindiakaa a Mose nahan la, kape kwagh u bo ne cii a tser se ne; nahan kpaa se kera zamber TER, Aôndo wase, ser A̱ zungwe se ga, se de aferakaa a ase ga man se wa mimi Wou iko kpaa ga.

¹⁴ Ka nahan man TER A lu per sha u van a kwagh u bo ne sha a vese ye; gadia TER, Aôndo wase, ka u perapera ken aeren a Na cii a A eren yô, kpa se wa imo Na iko ga.

¹⁵ Hegen yô, Tere, Aôndo wase, u U dugh a ior Ou ken tar u Igipiti sha uwegh ku ageegh, U na iti You i za gwa er i lu nyian nahan, se er isholibo, se er kwagh u ifer.

¹⁶ Yô, Tere, sha aeren a Ou a perapera cii, shi goom a ishima i vihin You man iyugh You sha gar Wou Yerusalem kera, ka icighanwo Wou je la; gadia sha ci u asorabo ase, man aferakaa a uter asev, Yerusalem man ior Ou gema hingir kwagh u lahan hen mba ve kase se cii.

¹⁷ Hegen yô, Aôndo wase, ungwa msen u wanakiriki Wou, man uzamber nav, na ishigh You ki̱ wanger sha icighanjiir Wou u a hingir ice la, sha ci u iti i Ter.

¹⁸ Aôndo wam, kegh ato, ungwa, bugh ashe a Ou, nenge mbamyôhôl asev, man gar u i yer sha iti You la; gadia se mba van a uzamber asev sha ishigh You, ka sha uperapera mba sha ayol a ase ga, kpa ka sha ci u mhôônom Ou ma zungwen ma vesen la.

¹⁹ Tere, ungwa! Tere, de se asorabo! Tere, ver ato! Er sha mi; de ngôôr ga, sha ci Wou, We, Aôndo wam; gadia mba yilan gar Wou man ior Ou sha iti You.

²⁰ Er m lu ôron kwagh ave, eren msen man pasen isholibo yam man isholibo i ior av Iserael, man m lu van a zamber wam sha ishigh ki TER, Aôndo wam, sha ci u icighanwo u Aôndo wam;

²¹ er m lu ôron kwagh ken msen ave la je, Gaberiel, or u m vande nengen a na ken mpase hiihii la, purugh fefa va her a mo sha shighe u nagh ku nan ku aikighe nahan.

²² A na m kav, man a ôr kwagh a mo, a kaa er: We, Daniel, m va hegen sha u nan we kwaghfan man mkav.

²³ Sha mhii u uzamber ou yô, imo due, man m va sha u kaan we i; gadia u doo ior ishima kpishi; yô, ver ishima sha kwagh ne, man kav mpase ne.

²⁴ I ver ulahadi akunduatargber sha ior Ou man icighangar wou, sha u been tindi u peren, man sha u been asorabo, sha u nan iwom sha ci u iferkwagh, man sha u nyôron a perapera u tsôron, man shi sha u veren ikav sha mpase u sha mnenge man kwaghôron u profeti, man sha u shighen icighanjiir u hemban la mkurem.

²⁵ Nahan yô, fa man kav kpaa, hii sha mdugh u tindi sha u sôron man u maan Yerusalem zan zan ar hen u i shigh Un mkurem, ka Tor je la, á lu ulahadi utaankaruhar; man ulahadi akunduatar kar uhar, á maa un a ityembe man ukpekpe, kpa a lu sha shighe u ican je.

²⁶ Ken masejime u ulahadi akunduatar kar uhar la, á gber u i shigh Un mkurem la kera, Una lu a ma ibo ga; ior mba tor u una va la, vea hembe gar man icighanjiir la; mkur na una lu sha avenge a saren, man zan zan mkur kpaa ityav mbia lu; mbamtim vea lu kpee je.

²⁷ Una ya ikur i taveraa a ior kpishi lahadi môm man ker atô u lahadi la una er nagh ku sha samuyia kua bunde; sha kpelegh ku akaahôngorough or u nan mtim la, una va zan zan mkur u i ver la kuma, á haa iyugh sha or u nan mtim la.