Daniel 7 - ICIGHAN BIBILO

¹ Sha inyom i hiihii i Beleshasar tor u Babilon la, mnyam cie Daniel, a nenge mbampase er a yav sha gambe na yô; nahan a nger mnyam mara, a ôr homonkwagh u ma.

² Daniel ôr kwagh kaa er: M nenge ken mpase wam tugh; yô, nenge, ahumbe a anyiin a sha la, ve gbuusu zegemnger.

³ Inyam i vesen inyiin due shin zegemnger, hanimô lu kposo a igen.

⁴ I hiihii lu er begha nahan, i lu a akper a ugafa; er m lu kenger yô, i tsuwa i akper kera, man i tôô i hen inya i kende a i sha, i er i i tile sha angahar ahar er or nahan, man i na i ishima i or kpaa.

⁵ Man shi nenge inyam igen, i sha uhar, lu er dwem nahan, i kende vegher u môm sha, i nyuma ahan atar ken zwa u i sha anyi; i kaa a i er: Mough sha, ya inyam kpishi.

⁶ Ken masejime ne yô, shi m nenge igen lu er anyam nahan, i lu a akper a inyon anyiin sha ijime i i, inyam la lu a ityouv inyiin; i na i tahav kpaa.

⁷ Ken masejime ne shi m nenge ken mbampase mba utuuv, yô, nenge, inyam i sha unyiin, i cier iyol, ta ihindi, man i taver iyol kpishi kpaa; lu a uzegembaanyiiv mba iyôôv; i ya kwagh i hembe avur avur, kwagh u a shi la i shoghol angahar a i sha mi; i lu kposo a inyam igen i i vande a i cii; man i lu a akor pue.

⁸ Er m lu timen sha akor la, nenge korough kugenegh ku kiriki gema due ken a, i tsuwa akor atar a a vande lun la sha ishigh ki ku kera; man nenge, ashe lu sha korough kun er ashe a or nahan, man zwa u ôron uzegembaakaav kpaa.

⁹ Er m lu kenger her yô, i ver mkônom ma torom; or u tsan sha won kar za tema, akondo a na kungu er senou nahan, man ice i sha ityough nagh kpaa lu er mou u wang nahan; ikônough Nagh ki torough ki teman sha mi lu inyomborusu akaver a na lu usu u yeghen.

¹⁰ Ifi u usu due gba kuwan sha ishigh nagh; ior udubu dubu lu eren Un tom, man dubu pue kwa dubu pue tile sha ishigh Nagh; i tema ijirôron man i bugh uruamabera.

¹¹ M lu kenger her sha ci u imo i akaaôron a vesen a korough kura lu ôron yô; er m lu kenger her yô, i wua inyam la, i tim iyol i i kera, i na i sha u i̱ nande i sha usu.

¹² Inyam i i shi la yô, i ngohol i tahav kera; kpa i de i i̱ hira lu uma her shighe kar.

¹³ M nenge ken mbampase mba utuuv, yô, nenge Or gba van sha abeen a sha aôndo, lu er ka wan u or nahan, A va zan zan A va ar hen Or u tsan sha won la, i va a Na sha ishigh Nagh.

¹⁴ I na Un tor sha won cii man icivir man tartor, sha u ior man akuraior man ijô cii ve̱ er Un tom; mtemtor Na ka mtemtor u tsôron, u una kar kera mayange ga, man tartor Na kpaa ka u timin kera mayange ga.

¹⁵ Mo Daniel yô, jijingi wam a ure ken atô u iyol yam, mbampase mba m nenge a mi tam mciem iyol.

¹⁶ M kporom hen ugen ken mba ve tile her la, m pine un inja i kwagh ne cii. Nahan a kaam, a pasem inja i akaa ne cii.

¹⁷ Inyam i vesen i inyiin ne ka utor unyiin mba vea mough ken tar je la.

¹⁸ Kpa uicighanmbaiorov mba Uhembansha vea ngohol tartor, man vea ya tor gbem, een, gbem sha won.

¹⁹ Nahan sarem pe fan kwagh u inyam i sha unyiin, i i lu kposo a igen cii, i i cier iyol yum la, i anyi a i lu iyôgh man akughul a i lu togula, i ka i ya kwagh i hembe avur avur, man kwagh u a shi la i shoghol angahar a i sha mi la;

²⁰ man sha kwagh u akor pue a a lu sha ityough ki i, man korough kugenegh ku ku due sha man agen atar gba sha ishigh ki ku la; ka korough ku ku lu ashe man zwa u ôron uzegembaakaav, ku ku lu er ku hemba kehen a akar a ku la.

²¹ M nenge korough kun, ku nôngo ityav a uicighanmbaiorov, ku hemba ve;

²² zan zan Or u tsan sha won la za va, man i na uicighanmbaiorov mba Uhembansha ishô sha ijirôron; man shighe kuma u uicighanmbaiorov ve̱ ya dyako u tartor la.

²³ A kaa nahan er: Inyam i sha unyiin la, ia lu tartor u sha unyiin sha tar, u ua lu kposo a ityartor igen cii, ua vihitar cii, ua ndyar u, ua her u avur avur.

²⁴ Man akor a pue la yô: ken tartor ne, utor pue vea mough; ugen shi una mough ken ijime ve, una lu kposo a mbahiihii mbala, una gbihi utor utar inya.

²⁵ Una ôr akaavihin sha Uhembansha, una er uicighanmbaiorov mba Uhembansha ican; una ver ishima u geman ashighe man atindi, man á na ve sha ikev na zan zan shighe môm man ashighe man vegher u shighe.

²⁶ Kpa á ôr ijir man á ngohol un tor kera, á tim un kera, kwagh na una bee sha won.

²⁷ Á gema tartor man mtemtor man ivesen i ityartor i sha won cii, á na nongo u icighanmbaiorov mba Uhembansha; tartor ve ka tartor u tsôron, man ityahav cii mbia er ve tom, mbia ungwa ve.

²⁸ Ka mkur u kwagh shon ne je ne. Mo Daniel yô, mbamhen av tam mciem iyol kpishi, mluashe u ishigh yagh kpaa gema, kpa m koso kwagh shon ken ishima yam.